Ti scuela ni rusiidiʼ laanu iquiiñenu ni cazíʼdinu
1 Ora gúʼndanu cani zeeda lu Cani Chitiidiʼ lu Scuela stiʼ Cani Rucheeche Diidxaʼ stiʼ iza 2006 la? zúninu stipa pur gúninu ni cazíʼdinu de Biblia lu xquendanabáninu ne ora gucheechenu diidxaʼ. Quixe íquenu gúninu cani izíʼdinu (Juan 13:17; Fili. 4:9).
2 Cani ricábinu. Iza riʼ, cani ricabi ra bibí ra biuundaʼ Biblia nápacaʼ sti minutu jma para gúnicaʼ ni. Nga runi bíchinu ni utiidiʼ libana ca naquiiñeʼ guietenaláʼdxibe maʼ gaayuʼ minutu si nga nápabe para iniʼbe, maʼ cadi xhoopaʼ diʼ. Cani icabi ca naquiiñeʼ gúʼyacabe pabiáʼ tiempu nga iquiiñecabe. Pa maca nápacabe ni iníʼcabe la? zanda icábicabe xiixa ni acané irácabe lu treinta si segundu o jma huaxiéʼ tiempu. Zacá la? dede zanda icabi biaʼ chii bíchinu o bizáʼnanu lu gaayuʼ minutu ni nuu para icabi cani cucaadiaga.
3 Ca libana ni rusiidiʼ. Cani bibí ra biuundaʼ Biblia ne primé libana naquiiñeʼ usihuínnicabe lu cani pabiáʼ zacané cani laanu ora chigucheechenu diidxaʼ ne lu xquendanabáninu. Ni udii ca libana ca cadi naquiiñeʼ si ucaabe cani cucaadiaga ca gúnicaʼ xiixa, laaca naquiiñeʼ gábibe laacaʼ xi naquiiñeʼ gúnicaʼ, ximodo gúnicabe ni ne xi zabeendúcabe. Zanda iniʼbe: «Textu riʼ rusiidini laanu...» o «Sicaríʼ nga zanda iquiiñenu ca versículo riʼ ora chigucheechenu diidxaʼ». Cumu ca binnigola ne ca siervu ministerial ca nánnacabe ximodo nuu ca binni ridagulisaanécabe la? naquiiñeʼ iníʼcabe modo ganda iquiiñeʼ cani cucaadiaga iráʼ ni zeeda lu ca libana riʼ.
4 Ora uluíʼcabe ximodo zanda iquiiñeʼ cani cucaadiaga ni la? laaca jma jneza nga iquiiñecabe ca ejemplu zeeda lu Biblia. Ni cudii libana ca zanda uzeetebe ti ejemplu zeeda lu Biblia ne de racá iniʼbe: «Zándaca chuʼ dxi izaacatu ni uninu riʼ». Dede ante naquiiñeʼ gúʼyabe pa biaʼsi chigusiénebe ejemplu ca ne textu chiguiniʼbe ca, ne gúʼyabe pa biaʼsi nuuni ne iráʼ ni zeeda lu Biblia ne ni maʼ biree lu ca libru o revista ra cusiene «mozo ni nuu xpiaaniʼ ne ni runi jneza» ni (Mat. 24:45).
5 Rusihuínninu nuu xpiaaninu nga ora gánnanu gúninu ni galán. «Guendanuuxpiaaniʼ nga ni jma risaca.» (Pro. 4:7.) Scuela stiʼ Cani Rucheeche Diidxaʼ ca racané ni laanu ácanu binni nuu xpiaaniʼ ni zanda iquiiñeʼ ni riziidiʼ ne gánnanu usíʼdinu xcaadxi ácacaʼ binni nuu xpiaaniʼ.