«Cadi usaana de sanándatu naa»
1 Stale binni nabani para guni ni riuulaʼdxiʼ si, neca zacá la? cadi nabánicabe nayecheʼ. Peru Jesús guníʼ naquiiñeʼ uyúbinu modo acanenu binni purtiʼ nga nga ni jma zusiecheʼ laanu (Hech. 20:35). Laabe uniʼbe: «Tu gacalaʼdxi gaca xpinne la? usiaanda laca laa [...] ne sa nanda naa» (Mar. 8:34). Dxandíʼ, ácanu xpínnibe cadi rinábani usaananu caadxi si cosa ni riuuláʼdxinu gúninu. Rinábani ibáninu iráʼ dxi cadi para gúninu ni riuuláʼdxisinu, sínuque para usiéchenu Jiobá (Rom. 14:8; 15:3).
2 Ininu de ni biʼniʼ apóstol Pablu. Laabe bisaanabe iráʼ ni udixhe íquebe gúnibe lu xquendanabánibe ne ucuá íquebe gúnibe jma lu xhiiñaʼ Dios, purtiʼ binibiaʼbe Cristu Jesús Señor stibe ne laasi bisaca jma para laabe (Fili. 3:7, 8). Ne uniʼbe: «Qué ziaʼya unite irá ni napa pur laatu, dede nin xpida qué ziaʼya» para ganda acaniá binni (2 Cor. 12:15). Iranu naquiiñeʼ inabadiidxanu laca laanu: «Paraa caquiiñeʼ tiempu stinneʼ, stipa, cani nanna guneʼ ne bueltu ni napa yaʼ. Ñee primeru nga ricá iqueʼ guneʼ cani racalaʼdxeʼ, o cayuneʼ stipa pur usiecheʼ Jiobá la?».
3 Modo zanda acanenu. Xquidxi Jiobá rúnicaʼ stale millón de hora iráʼ iza lu ti dxiiñaʼ ni rulá binni: nga nga ucheechecabe stiidxaʼ Reinu. Biaʼ tiica iza napa ca xpinni Jiobá, rúnicabe adxé adxé dxiiñaʼ para acanécabe binni. Laaca stale dxiiñaʼ nga riquiiñeʼ aca ora rápanu ca endaridagulisaa de ti dxi, de chupa ne de chonna gubidxa ca, zacaca riquiiñeʼ stale tiempu para aca chaahuiʼ ne aca ca yoo ni riquiiñenu para guni adorarnu Jiobá. Ne cadi usiaandanu dxiiñaʼ runi ca Grupu de Binnigola ni Riniʼné ca Doctor ne ca Grupu ni Riganna cani Huará. Ca bíchinu ne ca bizánanu dxandipeʼ nga stale ni ribeendúcabe pur iráʼ dxiiñaʼ ni raca pur laacabe (Sal. 110:3).
4 Ora rizaaca xiixa ni guniná binni casi ti xu ne ora málasi izaaca xiixa la? oracá nga riquiiñeʼ chuʼ tu acané binni. Peru laaca zanda acanenu ne uguʼnu gana ca bíchinu ne ca bizánanu ni zinanda Cristu ora gúʼyanu xi caquiiñecabe (Pro. 17:17). Ra uyúbinu modo acanenu iráʼ binni ne acanenu aca xhiiñaʼ Reinu jma la? cusihuínninu zinándanu ejemplu stiʼ Jesús (Fili. 2:5-8). Nga runi, cadi usaananu de uyúbinu modo acanenu iráʼ binni.