Ndaa ra rinabadiidxaʼ

◼ Ñee jneza nga gutoʼnu xiixa cosa ni maca biquiiñeʼ o gúninu sti cosa para gucasaanu bueltu ti gacanenu neza binni ridagulisaa ra riuunu la?

Nuu religión nabé rúnicaʼ stale cosa casi: guendaroxhi o rúnicaʼ saa ti gutópacaʼ bueltu para iquiiñecaʼ ndaaniʼ religión sticaʼ. Nuu binni na rúnicani purtiʼ riuuláʼdxicaʼ gacanecaʼ. Peru intiica gúnicabe, ni dxandíʼ nga canábacabe bueltu binni ne ca testigu stiʼ Jiobá qué rúnicaʼ zacá.

Guiropa númeru stiʼ revista Watch Tower (Torre stiʼ ni rapa), stiʼ agosto 1879, bisiéneni xiñee qué rinabaʼ ca testigu stiʼ Jiobá bueltu casi runi ca binni de sti religión. Nani sicaríʼ: «“Nánnadu JIOBÁ nga ni cayacané para gaca revista Torre stiʼ ni Rapa stiʼ Sión”, ne biaʼ tiempu gacanebe para gácani la? qué ziuu dxi guicá lu revista ca caquiiñeʼ gudii binni guna o caquiiñeʼ gacané binni para gácaruʼ jma de laani. Purtiʼ Jiobá guníʼ: “Guiráʼ oro ne plata ni nuu ndaaniʼ ca dani ca stinneʼ cani”. Nga runi, ora maʼ qué gacanebe para chuʼ bueltu ni iquiiñeʼ para gácaruʼ revista la? óraque zánnadu maʼ qué zácaruʼ ni».

Laanu cayúninu ni na ca diidxaʼ riʼ: «Cada tobi udii biaʼ ruluiʼ laʼdxiʼ, ne cadi acaná ladxidóʼ ti ma bidii ni, nin udii ni purti canaba cabe ni laa, purti nadxii Dios ni rudii ni laa de idubi ladxidóʼ» (2 Cor. 9:7). Ndaaniʼ Yoo stiʼ Reinu nuu caja para gusaba binni bueltu biaʼ náʼ ladxidóʼ pa racalaʼdxiʼ gacané (2 Rey. 12:9). Qué rucaadícabe binni gusaba bueltu, ne pa gudiicaʼ la? qué zabézadicaʼ guicaacaʼ xiixa pur ni bíʼnicaʼ.