Guinínenu binni xi chiguni Reinu stiʼ Dios

¹ Lu ca dxi nagana nabáninu riʼ stale binni qué gánnacaʼ tu laa zanda gacané laacaʼ (Efe. 2:12). Xcaadxi ribézacaʼ gacané xpuéltucaʼ, ca binni ni runi mandar o ciencia laacaʼ, peru nánnanu qué zanda diʼ gudii ca cosa riʼ laacabe ti guendanabani galán. Peru laanu cabézanu gacané Dios laanu ne nga zeeda gaca para laanu «casi rinaaze ancla barcu para qué iniibi». Ñee cadi nabé rusiecheʼ nga laanu la? (Heb. 6:19.)

² Reinu stiʼ Dios zuni Guidxilayú riʼ ti paraísu. Ca binni ni nadxiinu ziásacaʼ lade gueʼtuʼ (Hech. 24:15). Stuudxi huiiniʼ si maʼ qué ziuu binni pobre, binni malu, guendahuará, maʼ guirutiʼ zioʼxho ne maʼ qué zati binni (Sal. 9:18; Mat. 12:20, 21; Apo. 21:3, 4). Maʼ cadi candaa diʼ zadúʼyanu gaca ca cosa riʼ ne xcaadxiruʼ ni maʼ guníʼ Dios. Gunáʼ de cani maʼ guninu riʼ cabézaluʼ gaca yaʼ.

³ Guininu ca diidxaʼ nacubi ne galán stiʼ Dios. Caquiiñeʼ guinínenu xcaadxi binni xi chiguni Reinu stiʼ Dios xcaadxi huiiniʼ si. Cumu nadxiinu Dios ne nadxiinu binni la? nga rucaa laanu gúninu cásica biʼniʼ Jesús, purtiʼ laa guníʼ: «Nuu né Espíritu sti Dios naa, purti ma ulí naa güe nia ca pobre diidxa ni usieche laacaʼ. Biseenda be naa gueda ndee yuuba ladxidóʼ binni, [...] ne usinaya cani nacheepa lú, ne ulaʼya cani cuxhii cabe laa» (Luc. 4:18). Apóstol Pablu guníʼ ca diidxaʼ nacubi ne galán stiʼ Dios ndaaniʼ luguiaa ne intiica lugar nuu binni, «qué ñaana dxí Pablu de ñuiʼ stiidxa Dios» (Hech. 18:5). Pa gúninu casi biʼniʼ Pablu, qué zagubayú guiráʼ ni nuu lu guidxilayú riʼ laanu ne qué zudiʼnu lugar cueechú bidxichi laanu de cani chigudii Dios laanu (Mar. 4:19).

⁴ Neca guidxaagalunu binni ni qué rizaalaʼdxiʼ cani chiguni Dios, qué naʼ gucaadiaga ni chiguni Reinu stiʼ Dios xcaadxi huiiniʼ si o gucaalú tuuxa laanu la? qué rireʼnu gana gúninu xhiiñaʼ Dios, purtiʼ naaze «dxiichi nu ni ma runi cre nu» ne laaca qué rituí lunu guininu stiidxabe (Heb. 10:23; Rom. 1:16). Zándaca ra guʼyaʼ binni runi crenu dxandíʼ zacané Dios laanu ne qué rusaana de guinínenu laacaʼ la? gucaani laacaʼ guchaacaʼ modo riníʼ íquecaʼ ne gucaadiágacaʼ laanu.

⁵ Gastiʼ naca guininu guiráʼ ca cosa malu ni cayaca lu guidxilayú riʼ ne ximodo cayaca guiráʼ ni cá lu Biblia, peru cadi guiaandaʼ laanu rucheechenu diidxaʼ cadi para guininu chiguinitilú guiráʼ ca cosa malu ni nuu luni. Coʼ, sínuque ni jma naquiiñeʼ gábinu binni nga xi chiguni Reinu stiʼ Dios xcaadxi huiiniʼ si, ya, gábinu laacabe ca diidxaʼ nacubi ne galán stiʼ Dios. Nga runi, quixhe íquenu gucheechenu diidxaʼ sin guidxíbinu ne gúninu ni ne stale gana «ti icaa[nu] irá ni racalaʼdxi be udii be laa[n]u» (Heb. 6:11).