Caniisi xhiiñaʼ Reinu ra nuu binni ni riníʼ sti diidxaʼ ni nuu Méjicu
1 Riéchedu nga gábidu laatu pabiáʼ dxiiñaʼ cayaca ra nuu ca binni ni riníʼ sti diidxaʼ ni nuu Méjicu. Maʼ nuu 1,253 neza binni ridagulisaa lu 46 diidxaʼ ni riníʼ binni Méjicu. Ne cumu lu beeu enero dede junio stiʼ iza riʼ zie ca precursor ca sti lugar la? ribézadu gacanécabe jma binni guiziidiʼ de Jiobá. Iza gudiʼdiʼ ca guca invitar caadxi si precursor ne guyecaʼ caadxi si lugar, peru iza riʼ jma naroʼbaʼ zácani. Ne rihuinni guleendúcabe ni galán pur ni guníʼ bíʼchinu riʼ.
2 Ti bíʼchinu ni guyé ra riníʼcabe tsotsil, na: «Rudiéʼ xquíxepeʼ Jiobá pur ndaayaʼ ni bidii naa ra guyaa lu primé neza stiʼ ca precursor, nécapeʼ qué gannaʼ gastiʼ de diidxaʼ ca la? peru ni bicaa naa chaa nga purtiʼ biale de ndaaniʼ ladxiduáʼ gusiideʼ binni de Stiidxaʼ Dios lu stiidxacaʼ, ne bidiicabe naa ti cursu para guiziideʼ diidxaʼ riʼ nagueenda ne ni bisiidicabe naa de diidxaʼ ca nabé gucaneni naa. Ra bicheecheʼ diidxaʼ ra nuu ca binni riʼ la? gucaneni naa guchaa modo nacaʼ ne guiniiseʼ jma lu stiidxaʼ Dios. Ne cumu racalaʼdxeʼ guneʼ jma lu xhiiñaʼ Jiobá la? chiguiaanaʼ ra nuu ca binni ridagulisaa ni riníʼ diidxaʼ riʼ, naa nannaʼ zaguu ndaayaʼ Jiobá stipa cayuneʼ, purtiʼ dxiiñaʼ riʼ zeeda gácani casi dxiiñaʼ runi ca misioneru».
3 Lu ca beeu riʼ maʼ nuu ca precursor riʼ sti guidxi. Ora chetu ca lugar ra huaxiéʼ rireeche diidxaʼ la? naquiiñeʼ gánnatu dede ante xi gúnitu. Cadi gucheechesitu diidxaʼ pur gunduuxetu stale territorio, purtiʼ zacá la? qué zacanédini guiziidiʼ binni jma de Dios. Jma galán cuitu ti lugar ra riuulaʼdxiʼ binni gucaadiaga ti ganda guzulú gúʼndanetu laacaʼ de Biblia. Ne tiidiʼ si dxi la? maʼ zanda gucheechetu diidxaʼ sti lugar. Ne zándaca nuu de ca precursor ca ziaanacaʼ jma tiempu pa guidxélacaʼ binni ni riuulaʼdxiʼ guiziidiʼ jma. Ne xcaadxi la? zándaca guiaanacaʼ ra nuu ca binni ridagulisaa ni riníʼ diidxaʼ caziidicabe ca. Nanna dxíchidu zadxélatu jma binni ni riuulaʼdxiʼ guiziidiʼ ora gucheechetu diidxaʼ ra nuu cani riníʼ sti diidxaʼ lu iza 2008 ne zuiʼtu xi guiráʼ guizaacatu.