Cayacanenu binni guchaa modo riníʼ ique
1 Maʼ raca stale iza nga de caguite Binidxabaʼ ique binni, ne para nga riquiiñebe stale cosa ni cadi jneza ni rusiidiʼ stale religión. Ndaaniʼ stale religión rusiidicabe chonna binni nga naca ti dios, rusiidicabe napa binni ti alma ni qué rati ne riníʼcabe nuu ti lugar ra cayaʼquiʼ binni. Laaca rucaa Binidxabaʼ binni guiníʼ ique gastiʼ Dios ne guiníʼ íquecaʼ cadi dxandíʼ ni cá lu Biblia. Nuu binni riníʼ ique jma risaca raza ne guidxi stiʼ que stobi, laaca riquiiñeʼ Binidxabaʼ ca nga para gusicahui xpiaaniʼ binni ti cadi guiziidicaʼ de Dios (2 Cor. 4:4). Ximodo zanda cueenu guiráʼ nga ndaaniʼ ique ca binni ca yaʼ (2 Cor. 10:4, 5).
2 Ora runi cré binni cani de guidubi ladxidóʼ. Stale de ca cosa ca runi cré binni cani de guidubi ladxidoʼ; nuu binni dede yanna runi cré ni bisiidicabe laa dede dxi nahuiiniʼ. Pa racaláʼdxinu gacanenu laacabe la? naquiiñeʼ gusihuínninu runi respetarnu modo riníʼ íquecabe (1 Ped. 3:15).
3 Ti modo gusihuínninu runi respetarnu binni nga gudiʼnu lugar laacaʼ gábicaʼ laanu xi runi crecaʼ ne xiñee (Sant. 1:19). Casi pa runi crebe napa binni ti alma ni que rati la? zándaca runi crebe zacá purtiʼ guti ti binnilídxibe ne racaláʼdxibe gúʼyabe laa sti biaje. O zándaca rúnibe ca saa stiʼ ca religión ni cadi dxandíʼ ca purtiʼ riníʼ íquebe óraca si nga zanda chúʼnebe ca binnilídxibe tobi si. Ora gucaadiáganu laabe zacaneni laanu para gánnanu xi runi sentirbe, zacá zanda guicábinu laabe jma jneza (Pro. 16:23).
4 Jesús nga ejemplu stinu. Nápanu ti ejemplu galán stiʼ Jesús ora bicábibe ti hombre ni nabé nanna de Ley. Qué ñabi diʼ Jesús laabe xi gúnibe, purtiʼ nanna qué zuni diʼ hombre que ni pur cani runi cré. Biluíʼ Jesús laabe ni cá lu Stiidxaʼ Dios, bidii lugar guiniʼbe ximodo ruuyabe ni ne biquiiñeʼ ti ejemplu para gusiene ni laabe (Luc. 10:25-37).
5 Neca maʼ xadxí nga de runi cré binni ca cosa ni cadi jneza ni rusiidiʼ stale religión la? Stiidxaʼ Dios zanda gacané binni para gusaana de guni cré cani (Heb. 4:12). Pa gusiénenu binni ni rusiidiʼ Biblia ne diidxaʼ nadóʼ la? zanda gacanenu laacaʼ gusaanacaʼ guiráʼ ni cadi jneza ni runi crecaʼ ne zacá guni crecaʼ ni dxandíʼ (Juan 8:32).