Carta stiʼ Grupu ni Zaniruʼ

Bíchidu ne bizánadu:

¡Riéchedu stale nga gucaʼdu ca diidxaʼ riʼ para laatu! Runi sentirdu ni biʼniʼ sentir apóstol Juan ora guníʼ dxandíʼ nadxii ca xpinni Cristu ne biéchebe ora gúnnabe zinándacaʼ ni dxandíʼ (2 Juan 1, 4). Ti ndaayaʼ naroʼbaʼ nga nánnanu ni dxandíʼ zeeda lu Stiidxaʼ Dios. Maʼ gucaneni laanu guixélenu de Babilonia guidxi roʼ, de cani rusiidini ne de ca costumbre ni qué riuulaʼdxiʼ Dios. Cumu rúninu ni na Stiidxaʼ Dios la? racaneni laanu gannaxhiinu binni, gácanu nachaʼhuiʼ ne guianu laacaʼ. Ne laaca pur laani zanda chuʼnu nayá nezalú Dios ne cuézanu guicaanu ti guendanabani ni qué zaluxe.

Rudiʼnu xquíxepeʼ Jiobá pur espíritu ni rudii laanu para gánnanu xi gúninu ne gudii stipa laanu guiráʼ dxi. Ribézadu guyuuláʼdxitu ni bisiénecabe de espíritu ni rudii Dios laanu riʼ lu guendaridagulisaa de chonna gubidxa «Gudiʼnu lugar gacané espíritu stiʼ Dios laanu». Cumu jma nagana ziyaca modo nabani binni la? jma caquiiñeʼ guni crenu zacané espíritu stiʼ Jiobá laanu para gánnanu xi gúninu ca dxi nagana zeeda ca.

Ora guidúʼndanu lu Anuario 2009 ra cá ni bizaaca ca xpinni Cristu, ni huayacanacaʼ pur fe sticaʼ, runiibini ladxidoʼno. Ne ridxagayaanu gánnanu stale de laacaʼ deruʼ guyuunísacaʼ o caʼruʼ liica chúʼnisacaʼ ora gudíʼdicaʼ ca guendanagana ca. ¡Nadxiinu laacabe stale purtiʼ qué nucheenécabe Dios ne bíʼnicabe ni jneza! Ejemplu stícabe dxandipeʼ racaneni laanu quixhe íquenu cadi gusaananu de gúninu ni na Reinu stiʼ Dios neca gápanu intiica guendanagana (1 Tes. 1:6-8).

Bíchidu ne bizánadu, nánnadu raca nagana para laatu gudiitu ni caquiiñeʼ binnilídxitu ne cudxiilutu xcaadxi guendanagana para ganda chúʼnetu laacaʼ tobi si ne gannaxhiitu laacaʼ. Laaca nánnadu raca nagana para caadxi de laatu gucheechetu stiidxaʼ Reinu ne gacanetu lu xcaadxi dxiiñaʼ ni runi ca binni ridagulisaa. Nga runi, despué de gunidu ne biʼniʼ orardu Jiobá la? gudíxhedu guidxaa modo gaca ca guendaridagulisaa ca ra guzulú 1 stiʼ enero 2009. Nánnadu zabeendutu ni galán de laacani ne zápatu jma tiempu para gúʼndatu Stiidxaʼ Dios laasitu ne gúʼndanetu binnilídxitu.

Nabé biéchedu ora gúnnadu guyuunisa stale binni lu ca guendaridagulisaa roʼ ni guca iza gudíʼdicaʼ, ládecabe nuu caadxi ni nahuiiniʼ. Laatu, cani napa xiiñiʼ, cayábidu laatu sicarú dxiiñaʼ cayúnitu purtiʼ cusiiditu ca xiiñitu gannaxhiicaʼ ni cá lu Stiidxaʼ Dios ne cayacanetu laacaʼ gúnicaʼ ni na Jiobá laga nahuiinicaʼ. Ra guyuunísacabe neca cadxaagalúcabe guendanagana ra scuela, rusihuínnini jneza nga modo cusiiditu ne cusiniisitu laacabe (Sal. 128:1-6).

Sti cosa ni nabé rusiecheʼ laadu nga gánnadu cadale cani ruundanetu de Biblia, raríʼ rihuinni dxiiñaʼ ni cayuni ca misioneru ne ca precursor especial. Cada tobi de laadu, ni nuu lu Grupu ni Zaniruʼ, nabé rusisácadu dxiiñaʼ ni cayuni guiratu lu guidubi Guidxilayú para gábitu binni ni nachaʼhuiʼ «gueda gué nisa ni rudii enda nabani sin quixe» (Apo. 22:17). Cayábidu ca 289,678 binni ni guyuunisa iza gudiʼdiʼ ca, cayéchedu stale purtiʼ maʼ guyuucaʼ ndaaniʼ xquidxi Jiobá.

Galán guietenaláʼdxinu ca diidxaʼ ni bicaa apóstol Juan riʼ: «Canitilú guidxilayú ne irá ni nuu ndaani ni que, peru qué ziuu dxi initilú ni guni ni na Dios» (1 Juan 2:17). Guizáʼ mayaca nga para guinitilú ca cosa malu nuu ndaaniʼ guidxilayú riʼ, nga runi naquiiñeʼ quixhe íquenu gúninu ni na Jiobá ne gatananu (Mat. 24:42). Qué ziuu dxi gaca arrepentirnu pa gúninu ni zacá, ne zadúʼyanu pabiáʼ nachaʼhuiʼ Jiobá ne laanu (Isa. 63:7).

Zeeda jma relatu de stale guidxi lu Anuario 2009 ne ribézadu uguucani gana laatu para quixhe íquetu gúnitu jma lu xhiiñaʼ Reinu. Laganna rietenaláʼdxidu laatu ne ruzéʼtedu laatu lu ca oración stidu ne nadxiidu laatu. Jiobá uguu ndaayaʼ laatu stálepeʼ.

Ca bíʼchitu,

Grupu ni Zaniruʼ stiʼ ca Testigu stiʼ Jiobá