«Pur ni runi binni rihuinni tu laa»
1. Xi riníʼ ique caadxi binni de dxiiñaʼ rúninu.
1 Nuu tiru qué riná binni gucaadiaga laanu ora maʼ zigucheechenu diidxaʼ. Zándaca huaxiéʼ galán ruuyaʼ binni dxiiñaʼ ni cayúninu o riníʼ ique cadi jneza xiixa ni runi ca testigu stiʼ Jiobá pur ni biiyaʼ lu tele o lu periódicu. Ne nuu lugar riníʼcabe nácanu ti «grupu ni runi cosa ni cadi jneza». Xi gúninu ora guizaaca nga yaʼ.
2. Xi zacané laanu para cadi guireʼnu gana ora guiníʼcabe mal de laanu.
2 Cadi guidxiichinu. Lu primé siglu que guyuu stale binni ni qué ñuulaʼdxiʼ cani biʼniʼ Jesús ne cani biʼniʼ xcaadxi xpinni Jiobá, ne gundísacabe falsu luguiacaʼ (Hech. 28:22). Peru bicheecherúcabe diidxaʼ sin nituilúcabe neca caníʼ binni mal de laacabe. Jesús guníʼ: «Pur ni runi binni rihuinni tu laa» (Mat. 11:18, 19). Ne bíʼnirube ni na Bixhózebe né stale gana, purtiʼ nánnabe risaca ca diidxaʼ nacubi ne galán que para ca binni ni racalaʼdxiʼ ganna ni dxandíʼ. Ora guietenaláʼdxinu laaca bíʼnicabe Xiiñiʼ Dios guiráʼ ni rúnicabe laanu la? zacaneni laanu para cadi guireʼnu gana.
3. Xiñee qué ridxagayaanu ora riníʼcabe mal de laanu ne ora rucaalúcabe laanu.
3 Jesús guníʼ zaca nanaláʼdxicabe ca xpinni cásica guca nanaláʼdxicabe laa (Juan 15:18-20). Nga runi, qué ridxagayaadinu ora guiníʼcabe mal de laanu ne ora gucaalúcabe laanu. Ne cumu nabáninu lu ca últimu dxi ne yanna nga jma cadxiichi Binidxabaʼ la? nga runi zeʼ dxi jmaruʼ si riníʼcabe mal de ca xpinni Dios ne rucaalúcabe laacaʼ (Apo. 12:12). Riéchenu gánnanu maʼ cadi candaa diʼ para guinitilú guidxilayú stiʼ Binidxabaʼ.
4. Ximodo jma galán guicábinu tuuxa ora qué naʼ gucaadiaga laanu.
4 Bicabi né diidxaʼ nadóʼ. Ora qué naʼ binni gucaadiaga laanu la? galán gácanu nachaʼhuiʼ ne guicábinu né diidxaʼ nadóʼ (Pro. 15:1; Col. 4:5, 6). Pa gúʼyanu zanda ne gudii binni ca lugar laanu la? galán guinabadiidxanu laa xiñee riníʼ ique zacá o gusiénenu laa nuu stale cosa ni cadi dxandíʼ ni riníʼcabe de ca testigu stiʼ Jiobá. Ora guicábinu né diidxaʼ nadóʼ, zándaca gucaani binni ca guiníʼ ique cadi dxandíʼ ni gúdxicabe laa de laanu ne pur nga maʼ gucaadiaga sti biaje chiganna ti Testigu laa. Peru pa cadxiichipeʼ binni ca la? jma galán gábinu laabe maʼ chuunu, peru gúninu ni né respetu. Ne riquiiñeʼ gánnanu ti cosa: neca qué chuulaʼdxiʼ binni dxiiñaʼ rúninu, para Jiobá nabé risaca nga gucheechenu diidxaʼ (Isa. 52:7).