Ti dxiiñaʼ ni ruchátipa ladxidoʼno
1. Xi dxiiñaʼ rúninu yanna ni zeeda gaca casi ora ñanda binni.
1 Nabé nayecheʼ guyuu ladxidóʼ ca binni ni biʼyaʼ modo bianda binni lu primé siglu que (Luc. 5:24-26). Yanna riʼ, laaca riuʼnu nayecheʼ purtiʼ cayacanenu xcaadxi binni gunibiaʼcaʼ Jiobá, ne nga zeeda gácani casi ora ñándacabe de xiixa guendahuará (Apo. 22:1, 2, 17). Cadi dxandíʼ nabé nayecheʼ runi sentirnu ora guidúʼndanu xiixa relatu ni caníʼ ximodo ruchaa Stiidxaʼ Dios ne espíritu santu xquendanabani binni la? Neca zacá, jma nayecheʼ runi sentirnu ora gacanenu tuuxa guiniisi lu stiidxaʼ Dios.
2. Xiñee riéchenu ora rusíʼdinu tuuxa de stiidxaʼ Dios.
2 Tu láʼ Dios. Xiñee cudiibe lugar nuu guendananá. Xi chiguni Reinu stibe pur binni. Nabé riuuláʼdxinu guicábinu ca guendarinabadiidxaʼ riʼ ne jmaruʼ si ora guidúʼyanu pabiáʼ nayecheʼ rihuinni nuu lú ca binni ca ora gánnacaʼ ni dxandíʼ (Pro. 15:23; Luc. 24:32). Ne ora jma maʼ ziziidibe la? maʼ ruzulú riquiiñebe lá Jiobá, maʼ ruchaabe modo rácube lari ne modo ruzuchaahuibe, rusaanabe ca costumbre malu gúpabe dxiqué ne maʼ riníʼnebe xcaadxi binni de ni caziidibe. Pa gudiibe laabe Jiobá ne chuʼnísabe la? zeeda gácabe ti xpinni Cristu ne maʼ zacanebe laanu guireeche diidxaʼ. Ora gúnicabe ca nga nabé rusiecheʼ cani laanu (1 Tes. 2:19, 20).
3. Xi guiráʼ naquiiñeʼ gúninu para ganda guidxélanu tuuxa gúʼndanenu Biblia.
3 Ñee zanda gacaneluʼ la? Pa racaláʼdxiluʼ gacaneluʼ lu dxiiñaʼ ni rusiecheʼ binni riʼ la? gunabaʼ Jiobá gacané lii para ganda gúʼndaneluʼ tuuxa binni de Biblia ne biʼniʼ stipa pur gusihuínniluʼ cayúniluʼ ni gunábaluʼ laabe lu ca oración stiluʼ (1 Juan 5:14). Bicheeche diidxaʼ ra zanda guidxeʼluʼ binni ne ora zanda guidxeʼluʼ laacabe. Ne ora gúʼyaluʼ zanda la? gudxi laabe pa zuundaneluʼ laabe de Biblia (Ecl. 11:6). Ne pa ruuyaluʼ riuuláʼdxibe guiziidibe jma la? bizuluca biindané laabe ne bibiguetaʼ stiʼ dxi para gúʼndatu jma, nga zeeda gaca casi ora nudxiibaluʼ ti biidxiʼ ne nibiguétaluʼ para nuzeeluʼ ni (1 Cor. 3:6-9).
4. Xiñee yanna nga jma caquiiñeʼ gúʼndanenu binni de Biblia.
4 Yanna riʼ nuuruʼ stale binni ni racalaʼdxiʼ guiziidiʼ ni jneza. Tu laa zanda gacané laacabe guiziidicabe de Biblia yaʼ (Mat. 5:3, 6). Gúninu dxiiñaʼ riʼ né stale gana ne zacá zacanenu guiluxe guireeche diidxaʼ ne gacanenu binni gaca xpinni Cristu ante guiluxe guiasa cosecha riʼ (Isa. 6:8).