Ndaa ra rinabadiidxaʼ

◼ Xi naquiiñeʼ ganna tuuxa ni racalaʼdxiʼ gusaanané guiráʼ ni napa, o caadxi de laacani, xquidxi Jiobá ora gati.

Ora rati binni gadxé tu riaanané cani napa (Ecl. 9:5, 6). Nga runi stale binni runi ti testamentu ra rusiene ximodo racalaʼdxiʼ guiaaziʼ ca cosa ni napa (2 Rey. 20:1). Ne lu guiʼchiʼ riʼ laaca ricá lá binni ni chiguuya gaca ni maca gudixhe binni ca ante gati. Ndaaniʼ stale guidxi, ora qué runi binni guiʼchiʼ riʼ nezalú ti juez ne málasi gueeda gati la? maʼ cani runi mandar ndaaniʼ xquidxi nga guiníʼ ximodo guiaaziʼ cani napa. Yanna, pa racaláʼdxinu gusaananenu guiráʼ cani nápanu, o caadxi de laacani, xquidxi Jiobá la? naquiiñeʼ gucaʼnu cani lu ti guiʼchiʼ ni risaca nezalú juez ne guʼyaʼ chaahuinu tu binni zanda guʼyaʼ gaca ni maca gudíxhenu. Pa nuu xcaadxi cosa ni ñuuláʼdxiluʼ ñánnaluʼ de testamentu o fideicomiso ora chigudiiluʼ xiixa la? zanda guinabadiidxaluʼ Betel.

Naroʼbaʼ dxiiñaʼ napa binni ni chiguuya gaca ni maca gudixhe tuuxa ante gati. Para gutópabe guiráʼ ni bisaana binni ca ne quíʼzibe cani lú ca nexheʼ guicaa cani la? riquiiñeʼ tiempu, jmaruʼ si pa stale cani ne pa nabé risaca cani. Ne cani runi mandar ndaaniʼ ca guidxi ca riguíxhecaʼ caadxi cosa ni naquiiñeʼ chinanda binni ora chitiizi cani bisaana tuuxa binni ni maʼ guti. Peru cadi pur ridagulisaanenu tuuxa guiníʼ íquenu zanda guinábanu laa guʼyaʼ gaca ni maca gudíxhenu ante gátinu. Binni ni cuinu ca naquiiñeʼ gaca tuuxa ni ganda guni dxiiñaʼ riʼ jneza ne ni dxandíʼ zuni ni gudíxhenu gaca (biiyaʼ tema ni láʼ «Los beneficios de la planificación patrimonial», ni zeeda lu ¡Despertad! 8 stiʼ diciembre 1998).

Ora cuícabe lii gúʼyaluʼ gaca ni maca gudixhe tuuxa ante gati. Pa cuí tuuxa binni lii para gúʼyaluʼ gaca ni maca gudixhe ante gati, primé naquiiñeʼ gúʼyaluʼ xi guiráʼ dxiiñaʼ chigúniluʼ, ne despué de guni orarluʼ Dios biiyaʼ pa zanda gúniluʼ ni (Luc. 14:28-32). Ora gati binni ca, naquiiñeʼ gábiluʼ ni cani chiguiaanané ca cosa stibe. Ne laaca nápaluʼ derechu quíʼziluʼ ca cosa stibe casi na ley ne casi zeeda lu testamentu ni bisaana binni ca ante gati. Laaca cadi naquiiñeʼ guiaandaʼ lii ti binni ni runi dxiiñaʼ ca cadi naquiiñeʼ guni sti cosa ni cadi zeeda lu testamentu ca, neca huaxiéʼ cani bisaana binni ni guti ca. Guiráʼ ca cosa ni rusaana binni para tobi de ca lá ni riquiiñeʼ ca testigu stiʼ Jiobá stiʼ xquidxi Dios cani (Luc. 16:10; 21:1-4).