Xi rucaa laanu gucheechenu diidxaʼ
1. Xi rucaa laanu gucheechenu diidxaʼ.
1 Gucheechenu ca diidxaʼ nacubi ne galán stiʼ Reinu stiʼ Dios nga ti cosa ni jma galán gúninu yanna, purtiʼ ora rúninu ni cayúninu ni na chupa mandamientu jma risaca riʼ: gannaxhiinu Jiobá ne gannaxhiinu binni (Mar. 12:29-31). Guendarannaxhii ca nga ni jma rucaa laanu gucheechenu diidxaʼ biaʼ gándatiʼ (1 Juan 5:3).
2. Ximodo rusihuínninu nadxiinu Jiobá ora rucheechenu diidxaʼ.
2 Purtiʼ nadxiinu Jiobá. Cumu nadxiinu Jiobá, Dios ni nabé xhamígunu la? nga rucaa laanu gábinu binni rúnibe ni jneza neca Binidxabaʼ maʼ ziné biaʼ 6,000 mil iza de caníʼ mal de laabe (2 Cor. 4:3, 4). Binidxabaʼ nga napa donda pur cani runi cré binni, casi nuu tu laa runi cré Dios nga runi castigar ca binni ni ruchee ndaaniʼ ti infiernu ne laaca riniʼcaʼ nácabe ti trinidad ni raca nagana para stale binni guiene tu laa ne laaca riniʼcaʼ qué rizaaláʼdxibe binni. Dede nuu stale binni riníʼ ique gastiʼ diʼ Dios. Ñee cadi ñuuláʼdxinu ñanna binni ni dxandíʼ de Bixhózenu ni nuu guibáʼ la? Ora rúninu stipa pur gucheechenu diidxaʼ ne stale gana rusiéchenu ladxidóʼ Jiobá ne qué rúninu ni na Binidxabaʼ (Prov. 27:11; Heb. 13:15, 16).
3. Xiñee rusihuínninu nadxiinu binni ora rucheechenu diidxaʼ.
3 Purtiʼ nadxiinu binni. Ora rucheechenu diidxaʼ rusihuínninu nadxiinu binni. Laanu nánnanu caquiiñepeʼ gucaadiaga binni ca diidxaʼ nacubi ne galán lu ca últimu dxi jma nagana riʼ. Stale de laacabe zeeda gácacabe casi ca ninivita bibani ca dxi stiʼ Jonás purtiʼ laacaʼ qué ñánnacaʼ «gunáʼ nga nacaʼ derechu ne nacaʼ bigaʼ» (Jon. 4:11). Peru ora rucheechenu diidxaʼ zanda gusíʼdinu binni guibani galán ne guibani nayecheʼ (Is. 48:17-19). Ne laaca riguíxedxinu ladxidóʼcabe (Rom. 15:4). Ne pa gucaadiágacabe ne gúnicabe ni guiziidicabe la? zalácabe (Rom. 10:13, 14).
4. Xii nga ni qué ziuu dxi guiaandaʼ Jiobá.
4 Ora dxandíʼ nadxii tuuxa bixhoze, guiráʼ ora rusihuínnini ne cadi nuu si tiru. Zacaca nga rúninu, cumu nadxiinu Dios ne nadxiinu binni la? nga rucaa laanu gucheechenu diidxaʼ ora tiica ne cadi ora si maʼ ziuunu de yoo pur yoo. Nga runi, cadi gusaana de gucheechenu diidxaʼ (Hech. 5:42). Pa gúninu ni, qué ziuu dxi guiaandaʼ Jiobá pabiáʼ nadxiinu laa (Heb. 6:10).