Ñee jneza modo rusíʼdinu binni de Biblia la?
1. Xi naquiiñeʼ guni guiráʼ publicador ni rusiidiʼ binni de Biblia.
1 Qué zanda gaca tuuxa xpinni Jiobá pa qué «cuidxi be laa» (Juan 6:44). Neca zacá, napa xidé gacanenu binni guidxiña Bixhózenu ni nuu guibáʼ (Sant. 4:8). Peru naquiiñeʼ gaca preparar chaahuinu. Para ganda gacanenu laacabe guiénecabe Stiidxaʼ Dios ne guibánicabe modo nabe la? cadi naquiiñeʼ si guinábanu laacabe gúʼndacabe ca párrafo ca ne guicábicabe ca guendarinabadiidxaʼ stícani.
2. Xi caquiiñeʼ gúninu para gusíʼdinu binni de Biblia jneza.
2 Para ganda gusíʼdinu binni de Biblia jneza la? naquiiñeʼ gacané publicador ca estudiante stiʼ guni cani chiguzéʼtenu riʼ: 1) guiene ni rusiidiʼ Biblia, 2) guni cré ni ne 3) guni ni caziidiʼ (Juan 3:16; 17:3; Sant. 2:26). Zándaca zadiʼdiʼ beeu para gúnibe cani maʼ bizéʼtenu riʼ, peru naquiiñeʼ gúnibe cada tobi de laacani para ganda chuʼbe gaxha de Jiobá ne gudiibe xquendanabánibe laa.
3. Xi guendarinabadiidxaʼ naquiiñeʼ gúninu para gusiʼdinu binni de Biblia jma jneza, ne xiñee.
3 Xi riníʼ ique estudiante ca yaʼ. Para gánnanu pa cayene binni ca ne cayuni cré ni rusiidiʼ Biblia la? cadi puru laasinu guininu, sínuque gudiʼnu lugar guiniʼbe ni riníʼ íquebe (Sant. 1:19). Ñee cayene estudiante ca ni rusiidiʼ Biblia de tema ni cayuundaʼ ca la? Zanda guiniʼbe ni modo biénebe ni la? Xi riníʼ íquebe de tema ca. Pur modo riniʼbe rusihuínnibe rusisácabe ni rusiidiʼ Biblia la? (1 Tes. 2:13.) Ñee maʼ bidiibe cuenta naquiiñeʼ guchaabe modo nabánibe la? (Col. 3:10.) Para gánnanu xipeʼ nga riníʼ ique estudiante ca, naquiiñeʼ guiníʼ ique chaahuinu xi guinabadiidxanu laabe ne gúninu ni né stale respetu, ne naquiiñeʼ gucaadiaganu laabe ora guiniʼbe (Mat. 16:13-16).
4. Xi naquiiñeʼ gúninu pa cayaca nagana para estudiante stinu guiene o guibani modo rusiidiʼ Biblia.
4 Zándaca zandaa para guchaa ti binni modo riníʼ ique ne cani maca biaa guni (2 Cor. 10:5). Xi gúninu pa cayaca nagana para estudiante stinu guni cani caziidiʼ de Biblia lu xquendanabani yaʼ. Cadi guireʼnu gana ne gudiʼnu lugar tiidiʼ tiempu ti ganda chindá Stiidxaʼ Dios ndaaniʼ ladxidoʼbe ne gacané espíritu santu laabe guchaabe (1 Cor. 3:6, 7; Heb. 4:12). Pa cayaca nagana para laabe guiénebe xiixa tema cayuundatu o qué ganda gúnibe ni lu xquendanabánibe la? galán guchaatu de tema. Pa qué guireʼnu gana ora gusíʼdinu laabe cani zeeda lu Biblia ne gúninu ni né stale guendarannaxhii la? nga zucaa laabe guchaabe xquendanabánibe.