Modo gucheecheluʼ diidxaʼ jma jneza: bisiidiʼ estudiante stiluʼ guiaa guni estudiar

Xiñee risaca gúniluʼ ni. Para guiniisi estudiante stinu en sentidu espiritual la? cadi naquiiñeʼ si gápabe ca cosa qué iganna rusiidiʼ Biblia ndaaniʼ íquebe ne ndaaniʼ ladxidoʼbe, laaca naquiiñeʼ guiziidibe cani jma nagana zeeda luni (Heb. 5:12–6:1). Dxandíʼ, napa xidé gúninu stipa para guni estudiarnu, purtiʼ caquiiñeʼ guchaaganu cani maca nánnanu né cani deruʼ cazíʼdinu ne guidúʼyanu ximodo gúninu cani lu xquendanabáninu (Prov. 2:1-6). Para ganda guiene estudiante stinu xiixa ni racalaʼdxiʼ ganna de lu Biblia la? naquiiñeʼ guiziidiʼ guni investigar stubi si. Stipa gúnibe pur guibánibe modo caziidibe zacané ni laabe gudxiilube intiica guendanagana ridxaagalú ca xpinni Cristu (Luc. 6:47, 48).

Ximodo zanda gúniluʼ ni:

Bizeeteʼ pabiáʼ risaca nga guni orartu Jiobá para gacané laatu cada biaje guni estudiartu (Juan 14:26; 1 Cor. 2:10).
Dede primé biaje gúʼndaneluʼ estudiante stiluʼ, guluu gana laa guʼndaʼ dede ante ni chiguni estudiartu. Zanda gusiidiluʼ laabe guni marcarbe ca diidxaʼ o ca oración jma risaca ne guluiʼluʼ laabe ximodo rúniluʼ ni lu libru stiluʼ.
Gunabaʼ estudiante ca iquiiñeʼ diidxaʼ ni guiree de ndaaniʼ ladxidóʼ para guicabi. Ora guinabadiidxaluʼ laabe xiixa, biyubi modo cadi guiniʼbe ni cá si lu libru stibe.
Guluu gana estudiante stiluʼ guʼndaʼ Biblia guiráʼ dxi. Gudxi laabe nuu ti programa lu sitiu jw.org ni zacané laabe quixhe chaahuibe modo gúʼndabe Biblia. Naroʼbaʼ stipa nga naquiiñeʼ gúnibe para guiaabe gúʼndabe Biblia, peru stale ni zabeendube pa gúnibe ni (Sal. 1:2, 3).
Bisiidiʼ estudiante stiluʼ iquiiñeʼ BIBLIOTECA NI NUU LU INTERNET Watchtower o folletu Ca tema ni huabee ca testigu stiʼ Jiobá para guidxela modo ricabi Biblia cani rinabadiidxaʼ. Zanda gusíʼdinu laabe gunibiaʼbe símbolo stiʼ ca publicación ni jma riquiiñeʼ lu guendaridagulisaa.

Biʼniʼ stipa guʼnuʼ ndiʼ beeu riʼ:

Ora guiluxe gúʼndaneluʼ estudiante stiluʼ ti subtítulo o ti capítulo gunabaʼ laa iquiiñeʼ chupa chonna si diidxaʼ para gusiene ni biziidiʼ. Pa qué gápaluʼ nin ti estudiante la? biindaʼ ti relatu zeeda lu Biblia o ti párrafo stiʼ revista Torre stiʼ ni rapa ne biquiiñeʼ chupa chonna si diidxaʼ para gusiéneluʼ ni. Nga zacané lii guiene chaahuiluʼ ni gúʼndaluʼ.