MODO RÚNINU XHIIÑAʼ DIOS
«Primeru biʼniʼ chaahuiʼ guendanagana napaneluʼ hermanu stiluʼ»
Bixuiʼlú nabézaluʼ Galilea, tiempu bibani Jesús. Ne guyeluʼ Jerusalén para guni celebrarluʼ saa ra rucuícabe Ranchuhuiiniʼ. Laaca maʼ yendá binni de gadxé gadxé lugar ne guizáʼ dxaʼ binni raqué. Ni racaláʼdxiluʼ nga gudiiluʼ ti ofrenda Jiobá, ngue runi zeluʼ ra templu que, peru cumu dxaʼ binni ndaaniʼ ca calle ca ne zineluʼ chivu stiluʼ nabé nanene zeluʼ, ne ora yendaluʼ raqué biiyaluʼ dxaʼ binni raqué dede nin ra guxhatañeeluʼ purtiʼ guiráʼ tu nuu gudii sacrificiu stiʼ. Yanna huaxa maʼ lii raca caber gudiiluʼ chivu stiluʼ ca sacerdote. Peru ora chigúniluʼ ni, bietenaláʼdxiluʼ nápaluʼ ti guendanagana né ti hermanu, ne zándaca nuube lade guiráʼ ca binni que o sti lugar ndaaniʼ guidxi que. Jesús bisiene xi naquiiñeʼ gúniluʼ pa gueeda guizaacaluʼ zaca (biindaʼ Mateo 5:24). ¿Ximodo zanda chinándaluʼ lii ne hermanu ca mandatu stiʼ Jesús ne guni chaahuitu guendanagana stitu yaʼ? Biʼniʼ marcar lu cada lista xii nga ni jma jneza gúnitu.
NI NAQUIIÑEʼ GÚNILU
Guiníʼneluʼ hermanu ca pa guiníʼ íqueluʼ dxandíʼ nápabe razón para guidxiichibe.
Gábiluʼ hermanu ca nadá ne laaca napa donda.
Bicaadiaga laabe né stale paciencia ne gunabaʼ laabe guni perdonarbe lii neca qué ñacaláʼdxiluʼ ñuninaluʼ laabe.
NI NAQUIIÑEʼ GUNI HERMANU CA
Chitídxibe xcaadxi hermanu ni bíʼniluʼ para chuʼcaʼ pur laabe.
Guchabe ni luluʼ, ne gábibe lii xi guiráʼ cosa bíʼniluʼ laabe ne gucaabe lii guiniʼluʼ nápaluʼ donda.
Gusisácabe valor ne humildad ni nápaluʼ purtiʼ guyeluʼ ra nuube para guiníʼneluʼ laabe ne guni perdonarbe lii de guidubi ladxidoʼbe.
Neca yanna riʼ maʼ qué rúninu sacrificiu para guni adorarnu Dios, ¿xiñee guníʼ Jesús caquiiñeʼ guni chaahuinu guendanagana napanenu tuuxa hermanu stinu ti chuulaʼdxiʼ Jiobá modo runi adorarnu laa?