MODO RÚNINU XHIIÑAʼ DIOS
Bidii Pablo xquíxepeʼ Dios ne guyuu nayecheʼ
Ora gunna ca hermanu de congregación stiʼ Roma zeeda Pablo neza, caadxi de laacaʼ biʼniʼ viajarcaʼ biaʼ 64 kilómetru para yechagalucaʼ laabe. ¿Ximodo gucané guendarannaxhii ni bisihuinni ca hermanu que Pablo yaʼ? Ora biʼyaʼ Pablo laacabe, bidii xquíxepeʼ Dios ne biecheʼ (Hch 28:15). Stale biaje Pablo nga riguu gana ca congregación, peru biaje riʼ la? laabe nga caquiiñeʼ cúʼcabe gana, purtiʼ deguyoobe (2Co 13:10).
Ca dxi stinu riʼ, ca superintendente de circuito rigánnacaʼ ca congregación para cuʼcaʼ gana ca hermanu. Nuu tiru laaca ridxágacabe, riuucabe xizaa o raca desanimárcabe, cásica guiranu. ¿Xi zanda gúninu para cuʼnu gana ca superintendente de circuito ne xheelacaʼ, ne zacá gacanésaanu pur fe stinu ora chigánnacabe laanu yaʼ? (Ro 1:11, 12).
Chuunu ca reunión ni raca ante guireʼnu predicación. Nabé riuu superintendente de circuito gana ora guʼyaʼ cayúninu stipa pur guni apoyarnu semana visita ca (1Te 1:2, 3; 2:20). Gúninu stipa gácanu precursor auxiliar beeu chigápanu visita. ¿Ñanda ñúninu plan para ñuni predicarnenu superintendente de circuito o xheelaʼ, o niguninenu laacabe estudiu la? Cadi guiníʼ íqueluʼ huaxieʼruʼ tiempu nápaluʼ de runi predicarluʼ o guiníʼ íqueluʼ cadi jneza rúniluʼ ni, nabé riuuláʼdxicabe guireenécabe guiráʼ publicador de congregación.
Gácanu hospitalariu. ¿Ñee ñanda nudiʼnu hospedaje laacabe ra lídxinu o ñuni invitarnu laacabe ti guendaró la? Pa gúninu ni, cusihuínninu nadxiinu laacabe. Ne cadi cabézacabe guni invitarnu laacabe xiixa guendaró caru o ni rudii dxiiñaʼ (Lu 10:38-42).
Gucaʼdiáganu conseju stícabe ne gúninu cani. Né stale cariñu racané superintendente de circuito laanu para guni servirnu Jiobá jma galán. Zándaca ziuu biaje zudiicabe laanu ti conseju nadipaʼ (1Co 5:1-5). Pa guzúʼbanu diidxaʼ ne gúninu ni gábicabe laanu de guidubi ladxidoʼno, zacanenu laacabe para gúnicabe dxiiñaʼ stícabe né stale guendanayecheʼ (Heb 13:17).
Gudiʼnu xquíxepeʼ laacabe. Gudxi superintendente de circuito ne xheelaʼ pabiáʼ huayuuluʼ gana pur guiráʼ cosa ni maʼ bíʼnicabe pur lii. Zanda guidxíñaluʼ ne guiníʼneluʼ laacabe o zanda gucaaluʼ ni lu ti tarjeta o lu ti nota (Col 3:15).