Zuni Jehová ne Jesús laanu binni libre

¿Xi guendanagana ridxaagaluluʼ guiráʼ dxi? ¿Ñee rúniluʼ stipa biaʼ gándatiʼ pur gudiiluʼ ni caquiiñeʼ familia stiluʼ la? ¿Ñee stúbiluʼ cusiniisiluʼ xiiñiluʼ ne apena rugaanda xpueltuluʼ la? ¿Ñee rizíñecabe lii o runi búrlacabe lii ra scuela la? ¿Ñee huaraluʼ o maʼ zigólaluʼ la? Guiranu nga nápanu guendanagana, peru nuu tu laa napa jma. Galán si maʼ cadi candaa ziaananu libre de guiráʼ ca cosa riʼ (2Co 4:16-18).

Laga cabézanu guedandá dxi ca la? ratadxí ladxidoʼno gánnanu riene Jehová guiráʼ ni cadídinu, riéchebe gúʼyabe cayuni huantarnu ne cayúninu stipa cadi guixélenu de laabe. Ne maʼ guniʼbe zacaanu stale ndaayaʼ (Jer 29:11, 12). Laaca rizaalaʼdxiʼ Jesús laanu. Pa gúninu stipa gúninu xhiiñaʼ Dios, qué ziuu dxi guixeleʼ Jesús de laanu (Mt 28:20). Pa cueenu tiempu para guiníʼ íquenu modo guibáninu dxi maʼ gácanu libre lu Reinu stiʼ Dios, jma nadipaʼ zaca esperanza stinu ne zápanu jma stipa para guni huantarnu guiráʼ guendanagana guidxaagalunu (Ro 8:19-21).

DESPUÉ DE GÚʼYALUʼ VIDEU NI LÁʼ CADI GUSAANA DE GUYADXINU CRISTU, PURTIʼ MAʼ ZEEDA DXIÑA TIEMPU NAGANA, ZANDA GUICÁBILUʼ CA PREGUNTA RIʼ:

• ¿Ximodo bixeleʼ binni de Dios ne xi bizaaca pur laani?

• ¿Xi cabeza ca xpinni Jehová ni qué guixeleʼ de laa?

• ¿Xiñee zanda cuézanu guibáninu jma galán?

• ¿Xi promesa jma cabézaluʼ gaca cumplir lu guidxilayú cubi ca?