Biquiiñeʼ Stiidxaʼ Dios casi ti espeju

Discípulo Santiago guníʼ zeeda gaca Biblia casi ti espeju purtiʼ racaneni laanu guidúʼyanu ximodo peʼ nácanu (Sant. 1:​22-25). Yanna, ¿xi naquiiñeʼ gúninu para iquíʼñenu espeju riʼ jneza yaʼ?

Guiduʼndaʼ chaahuinu Stiidxaʼ Dios. Pa nagueenda guidúʼyanu laanu lu ti espeju, zándaca qué zaduʼya chaahuinu modo rihuínninu ne paraa caquiiñeʼ guni chaahuinu. Zaqueca rizaaca pa guidúʼndanu Biblia nagueenda o ti luguiáʼ si, qué zadúʼyanu paraa caquiiñeʼ guchaʼnu. Nga runi, caquiiñeʼ guiduʼndaʼ chaahuinu ni.

Guiduʼyaʼ chaahuinu laanu ne cadi sti binni. Lu ti espeju zanda guidúʼyanu modo rihuinni xcaadxi binni ne paraa caquiiñeʼ guchaacaʼ. Zacaca zándaca guizaacanu ora guidúʼndanu Biblia, zándaca guiníʼ íquenu ndiʼ peʼ nga ni caquiiñeʼ fulanu. Peru pa gúninu zacá, qué zuchaʼnu ra caquiiñeʼ guchaʼnu.

Gácanu binni riuu razón. Pa puru si ra qué riuuláʼdxinu de laanu guidúʼyanu ora maʼ zuhuaʼnu lu ti espeju la? zareʼnu gana. Para cadi guizaacanu ni bizéʼtenu riʼ ora guidúʼndanu Biblia, gácanu binni riuu razón ne cadi guiaandaʼ laanu qué ribeza Jehová gúninu ni qué zanda gúninu (Sant. 3:17).