Guyuu xhupa hermanu lu Grupu ni Zániru
SÁBADU 5 de octubre iza 2024, lu reunión anual guca ti anunciu especial, luni biete: maʼ naca hermanu Jody Jedele ne Jacob Rumph parte de Grupu ni Zániru stiʼ ca testigu stiʼ Jehová. Maʼ xadxí cayúnicabe xhiiñaʼ Jehová sin guixélecabe de laa.
Jody Jedele ne Dámaris, xheelaʼ
Gule hermanu Jedele ndaaniʼ guidxi Misuri (Estados Unidos). Bisiidiʼ bixhózebe ne jñaabe laabe de Jehová, ne gulézacabe ti lugar ra huaxiéʼ nuu hermanu. Ngue runi gunda binibiaʼbe stale hermanu de gadxé gadxé guidxi ni rié para gacané gaca predicar ndaaniʼ guidxi riʼ. Ra bíʼyabe pabiáʼ nadxiisaa ca xpinni Jehová ne nuucaʼ tobi si guizáʼ gucaneni laabe. Guyuunísabe 15 de octubre de iza 1983 ne guizáʼ riuuláʼdxibe guni predicarbe. Ngue runi ora bilúxebe scuela, gúcabe precursor regular lu beeu septiembre de iza1989.
Dxi nahuiinicabe laabe ne bizáʼnabe nabé riné bixhózecabe ne jñaacabe laacabe Betel. Gucané ngue laacabe quixhe íquecabe gúnicabe dxiiñaʼ Betel. Ne guirópacabe guyécabe. Lu beeu septiembre de iza 1990 bizulú bíʼnibe dxiiñaʼ Betel ni nuu Wallkill. Guyuube lu Departamento de Limpieza ne despué lu Servicios Médicos.
Tiempu que, gaxha de Betel nuu caadxi congregación diidxastiá ne nagueenda caroobaʼ cani ne caquiiñecabe jma hermanu. Guyé hermanu Jedele tobi de ca congregación que ne bizulú biziidiʼ diidxastiá. Ne qué nindaa binibiaʼbe ti precursora ni láʼ Dámaris ni nuu circuito ra nuube que. Ne despué bichaganácabe ne bíʼnicabe dxiiñaʼ Betel.
Lu iza 2005 bireecabe de Betel para gápacabe jñaa hermanu ca ne para gápacabe jñaa ne bixhoze hermana ca. Tiempu que gúcacabe precursor regular, ne chupa chonna biaje guca hermanu ca instructor stiʼ Escuela del Servicio de Precursor. Laaca guyuube lu Comité de Enlace né ca Hospital ne lu Comité Regional de Construcción ni nuu zona ra nabézacabe que.
Lu iza 2013, bibiguétacabe Betel para gúnicabe dxiiñaʼ lu proyectu de construcción stiʼ Warwick. Ne dede lu iza riʼ laaca huayúnicabe dxiiñaʼ Patterson ne Wallkill. Biʼniʼ hermanu Jedele dxiiñaʼ lu Departamento Local de Diseño y Construcción ne Servicios de Información sobre Hospitales. Lu beeu marzo de iza 2023 beeda gácabe tobi de ca ni racané lu Comité de Serviciu. Sicaríʼ guniʼbe de ca dxiiñaʼ ni huayápabe ndaaniʼ xquidxi Jehová: «Nuu biaje zadxíbiluʼ ora guicaaluʼ xiixa asignación nacubi. Peru ora guizaacani risaca nga gápanu confianza Jehová, purtiʼ laabe reeda gácabe ni racaláʼdxibe gácabe».
Jacob Rumph ne Inga, xheelaʼ
Gule hermanu Rumph ndaaniʼ guidxi California (Estados Unidos). Dxi nahuiinibe, guyuu jñaabe inactiva. Peru neca zaqué biʼniʼ jñaabe stipa gusiidiʼ laabe de lu Biblia. Guiráʼ iza rigánnabe jñaabiidabe, ti hermana ni guizáʼ nadxii Jehová ne laa nga gucané laabe chuuláʼdxibe gúnibe ni ná Jehová. Ngue runi dxi nápabe 13 iza gunábabe gudiicabe laabe estudiu. Ne guyuunísabe 27 de septiembre de iza 1992 dxi jovenhuiiniruʼ laabe. Biguetaʼ guyé jñaabe reunión ne biʼniʼ predicar ne guiráʼ familia stibe guyuunísacaʼ.
Dxi nahuiiniʼ hermanu Rumph, biiyabe guizáʼ nayecheʼ nabani ca precursor. Ngue runi ora bilúxebe scuela, gúcabe precursor lu beeu septiembre de iza 1995. Lu iza 2000, guyebe guidxi Ecuador, lugar ra caquiiñeʼ jma hermanu para guni predicar. Raqué binibiaʼbe ti precursora de guidxi Canadá ni láʼ Inga, ne despué bichaganácabe. Dxi nacubi bichaganácabe, yeguni servírcabe ra nuu ti grupuhuiiniʼ de hermanu ndaaniʼ ti guidxihuiiniʼ stiʼ guidxi Ecuador. Tiempu riʼ maʼ ti congregación naróʼbani.
Ra gudiʼdiʼ tiempu gúcacabe precursor especial, ne despué maʼ gúcacabe de circuito. Lu iza 2011 guca invitárcabe chécabe clase 132 stiʼ Galaad. Despué de guca graduárcabe, guyécabe gadxé gadxé guidxi ne bíʼnicabe dxiiñaʼ casi betelita, misioneru ne viajante. Laaca guca hermanu Rumph instructor stiʼ Escuela para Evangelizadores del Reino.
Pur pandemia stiʼ COVID-19, bibiguétacabe Estados Unidos. Ne guca invitárcabe gúnicabe dxiiñaʼ Betel ni nuu Wallkill, ne raqué nga gucuaa hermanu Rumph capacitación lu Departamento de Servicio. Despué biseendacabe laacaʼ sucursal ni nuu Ecuador, ne guyuu hermanu Rumph lu Comité de Sucursal. Ne lu iza 2023, guyécabe Warwick, ne lu beeu enero de iza 2024 beeda gaca hermanu Rumph tobi de ca ni racané lu Comité de Serviciu. Sicaríʼ guniʼbe de ca lugar ra huayuucabe: «Para laadu qué risaca paraa cayúnidu xhiiñaʼ Jehová, sínuque ni jma risaca nga tu cayuninedu xhiiñabe: ca hermanu».
Guizáʼ rusisácanu dxiiñaʼ ni runi ca hermanu riʼ ne qué rusaana de gannaxhiinu laacabe (Filip. 2:29).