Xi naquiiñeʼ gucaa lii gusaanaluʼ ni
«Ca binni ni bisaana de cubaʼ gueza, bíʼnicabe ni purtiʼ laapecabe gucuaacabe decisión gusaanacabe ni» (Stop Smoking Now! [¡Deje de fumar ahora!])
STI modo zanda guininu ni nga pa racaláʼdxiluʼ gusaanaluʼ de cúbaluʼ gueza la? naquiiñeʼ chuʼ xiixa ni gucaa lii gúniluʼ ni. ¿Xi zacané lii gusaanaluʼ de cúbaluʼ ni yaʼ? Primeca la? guníʼ ique xi guiráʼ zabeenduluʼ pa gusaanaluʼ de cúbaluʼ ni.
Zaguu chaahuiluʼ stale bueltu. Pa guiráʼ dxi cúbaluʼ ti caja gueza la? lu ti iza zunítiluʼ stale mil de dolar. «Qué nudieeʼ cuenta pabiáʼ stale bueltu biniteʼ ra guduʼbaʼ gueza» (Gyanu, de Nepal).
Zabániluʼ jma galán. «Zanda peʼ guinieeʼ dxi bisaanaʼ de cubaʼ gueza nga casi ñaca bizulú xquendanabaneʼ sti biaje ne zeʼ dxi jma galán nabaneʼ» (Regina, de Sudáfrica). Ora gusaana binni de cubaʼ gueza la? jma galán modo riuuxii, nanixe ró, rapa jma stipa ne dede gadxé modo rihuinni.
Ziuuluʼ jma nazaaca. «Binni de gadxé gadxé iza, cásica gunaa, zaqueca hombre, pa gusaanacaʼ de cúbacaʼ gueza la? zabeenducaʼ stale cosa galán ne ziuucaʼ jma nazaaca» (Centros para el Control y la Prevención de Enfermedades, de Estados Unidos).
Zápaluʼ confianza laca lii. «Bisaanaʼ de cubaʼ gueza purtiʼ qué racalaʼdxeʼ gacaʼ depender de laani, sínuque gacaʼ depender de naa» (Henning, de Dinamarca).
Zacané ni familia stiluʼ ne ca xhamíguluʼ. «Ora riguʼbaʼ binni gueza la? runi huará ni ca binni ni nuu gaxha de laa. [...] Ca estudiu ni huayúnicabe rusihuínnicani cada iza rati mil de binni de cáncer de pulmón ne nuu de laacaʼ ruzuhuaadxí xcorazón caʼ purtiʼ reʼcaʼ ca gu’xhu’ ni ribee ca binni ni riguʼbaʼ gueza» (Sociedad Americana contra el Cáncer).
Ziuulaʼdxiʼ Dios ni rúniluʼ. «Hermanu ni nadxieeʼ caʼ, [...] gusianu laanu de guiráʼ ni runi biidiʼ cuerpu stinu» (2 Corintios 7:1). «Rinabaʼ laatu gudiitu cuerpu stitu casi ti sacrificiu [...] santo ne ni chuulaʼdxiʼ Dios» (Romanos 12:1).
«Ora bieneʼ qué riuulaʼdxiʼ Dios guni biidinu cuerpu stinu la? bisaanaʼ de cubaʼ gueza» (Sylvia, de España).
Peru nuu biaje la? cadi caquiiñeʼ si chuʼ xiixa ni gucaa laanu gusaananu de cúbanu ni, sínuque caquiiñeʼ chuʼ tu gacané laanu, casi familia stinu ne ca xhamígunu. ¿Ximodo zanda gacanécabe laanu yaʼ?