Biziideʼ tu chiguni chaahuiʼ guiráʼ injusticia

Ursula Menne guníʼ ni bizaaca

Dede dxi maʼ rudieeʼ cuenta racalaʼdxeʼ gaca justicia né guiráʼ binni. Ne cumu ngue nga ni racalaʼdxeʼ la? biyubeʼ chuʼ justicia, ne pur ngue dede biseguyoo gobiernu comunista de Alemania oriental naa. Ne ra deguayuaaʼ que nga biziideʼ tu chiguni chaahuiʼ guiráʼ injusticia. Chigüeniaʼ laatu ni bizaacaʼ.

GULEʼ lu iza 1922 ndaaniʼ guidxi alemana de Halle, ni riaana biaʼ chupa gayuaa kilómetru ladu gueteʼ stiʼ Berlín. Napa guidxi Halle ti historia de jma de ti mil chupa gayuaa iza ne gúcani tobi de ca lugar ra bizulú guyuu ca protestante. Gule bendaʼ Käthe lu iza 1923, guca bixhozeʼ militar, ne jñaaʼ biindaʼ ndaaniʼ teatru.

Nabé biyubeʼ gaca justicia purtiʼ ngaca nga ni biyubi bixhozeʼ. Dxi bireebe lu ejércitu guziʼbe ti tienda. Cumu stale de ca ni risíʼ ra nuube que pobre laacaʼ la? ngue runi riabe laacaʼ ne bidiibe laacaʼ fiadu. Peru ni triste nga pur gúcabe nachaʼhui la? biree gunítibe. Pur ni bizaacabe que biziideʼ guizáʼ nagana nga gaca justicia ne guni tratárcabe guiráʼ binni tobi si. Peru ora maʼ cá ique ti joven guni xiixa la? guizáʼ nagana cueecabe ni de ndaaniʼ ique.

Cumu nabé guyuulaʼdxiʼ jñaaʼ arte la? ngue runi zacaca gucaʼ. Pur nga bisiidibe naa ne Käthe guxhídxidu, guidúʼndadu ne guyaadu. Gucaʼ ti dxaapahuiiniʼ guizáʼ nayecheʼ, naa ne bendaʼ guizáʼ nayecheʼ bibánidu dede lu iza 1939.

Ra bizulú gúpadu guendanagana

Dxi maʼ qué ñaaʼ scuela la? guyuaaʼ ti scuela de ballet, ne raqué biziideʼ danza expresionista (ndaaniʼ guidxi Alemania binibiáʼcabe ni casi ausdruckstanz) estilu stiʼ Mary Wigman, tobi de ca ni bisiidiʼ ni ne biyaa ni primé. Lu ni ruluíʼ ca bailarín ca xii ngue cuyaacaʼ pur ca movimientu ni rúnicaʼ né cuerpu sticaʼ. Ne laacaʼ biziideʼ bitieeʼ. Rihuinni dxiichicaʼ, dxi nacubi guyuaaʼ lu adolescencia stinneʼ guizáʼ nayecheʼ bibaneʼ ne biziideʼ guneʼ stale cosa. Peru lu iza 1939, guca Segunda Guerra Mundial, ne chupa iza despué lu iza 1941 gudideʼ lu sti yuubaʼ guizáʼ naná, guti bixhozeʼ de tuberculosis.

Guizáʼ feu ca dxi guca guerra que, neca deruʼ 17 iza napaʼ dxi guca ni la? peru bidieeʼ cuenta ruluíʼ maʼ qué guidxela guiráʼ ca binni que xi gúnicaʼ. Biiyaʼ stale de ca binni nachaʼhui que gucanacaʼ pur ni biʼniʼ ca nazi que. Qué nindaa, maʼ qué nidxagayaa binni ora biʼyaʼ cayáticabe, canitilúcabe ne maʼ qué ridxaagacabe xcaadxi. Biaʼ qué nixá si lídxidu pur ca bomba que, ne stale de ca familia stinneʼ gúticaʼ lu guerra que.

Lu iza 1945, dxi maʼ biluxe guerra que la? nabézarudu Halle, naa, jñaaʼ ne Käthe. Ca dxi que, maʼ bichaganayaʼ ne napaʼ ti baʼduhuiiniʼ. Peru naa ne xheelaʼ gúpadu guendanagana ngue runi guca divorciardu. Ra bixéledu que maʼ naasiaʼ bisiniiseʼ baʼduhuiiniʼ stinneʼ, pur nga biyubeʼ dxiiñaʼ de bailarina ne laacaʼ bitieeʼ cuadru.

Despué de guerra que guca Alemania tapa ndaa. Ne guidxi ra nabézadu que biaana ra runi mandar Unión Soviética, ngue runi biaʼdu guibánidu casi nabani ca comunista. Lu iza 1949, guca ladu nabézadu que República Democrática Alemana, ni binibiáʼcabe ante casi Alemania oriental.

Modo bibánidu lade ca comunista

Lu ca iza que guca huará jñaaʼ, ngue runi gupaʼ laa. Ne ca dxi que bidxelaʼ ti dxiiñaʼ ndaaniʼ oficina stiʼ gobiernu, qué nindaa bidxaagaʼ ti grupu de estudiante ni nuucaʼ guluiʼcaʼ ca injusticia ni runi ca ni runi mandar laadu que, casi ni bizaaca ti joven, qué ninácabe ñuube ndaaniʼ universidad purtiʼ guyuu bixhózebe lade partidu nazi. Binebiaʼyaʼ chaahueʼ laabe, purtiʼ bidúʼndanu ne bixhídxidu juntu. Ngue runi guníʼ iqueʼ: «¿Xiñee laabe caguíxebe pur ni biʼniʼ bixhózebe pue?». Chaahuiʼ chaahuiʼ maʼ guyuaaʼ lade ca joven ni cadi nuu de acuerdu né ni runi ca xaíque stidu que ne guyaaʼ lu ca mitin ni rúnicabe dede biquiideʼ caadxi cartel xaʼnaʼ ca escalera stiʼ tribunal local que.

Ne ni feu nga cumu nacaʼ secretaria stiʼ comité regional de paz la? napa xidé gucaaʼ carta ni caníʼ de ca injusticia ni ca íquecabe gúnicabe, naa ndaʼ ni cuyubeʼ nga gaca justicia. Ti biaje pur política ni nuu raqué gucuaa comité que decisión guseendaʼ propaganda comunista ra nuu ti binnigola ni nuu sti ladu guidxi Alemania que para si ugaanicaʼ donda íquebe. Guizáʼ bichiichi ni cá íquecabe gúnicabe que naa, ngue runi bicaacheʼ ca paquete que ndaaniʼ oficina ne pur ngue maʼ qué ñé ca ni.

Bidii «ti gunaa qué iquiiñeʼ» naa esperanza

Lu junio de iza 1951, málasi guyuu chupa hombre ra oficina stinneʼ ne gúdxicaʼ naa: «Zeeda náʼzedu lii». Yenécabe naa ndaaniʼ cárcel ni runibiáʼcabe casi Roter Ochse (Buey Rojo), ne ti iza despué bigaanicabe donda iqueʼ ne guníʼcabe rucaaluáʼ gobiernu. Gunaazecabe naa purtiʼ gudxi ti estudiante ca policía secreta ni runibiáʼcabe casi Stasi de dxi biquiideʼ ca cartel que xaʼnaʼ escalera stiʼ tribunal que. Cadi dxandíʼ juiciu ni bíʼnicabe naa purtiʼ guirutiʼ nicaa nota de guiráʼ ca ni gunieeʼ. Ngue runi bi’ni’ sentenciárcabe naa xhoopaʼ iza de cárcel. Dxi nuaaʼ ndaaniʼ cárcel que guca huaraʼyaʼ, ngue runi biseendacabe naa ra pabellón ra riuu ca binni huará que ne raqué nuu biaʼ 40 gunaa. Guizáʼ bidxibeʼ ora biiyaʼ pabiáʼ naduxhuʼ lú ca gunaa que, ngue runi bicaaʼ carrera neza ra puertaʼ que ne guluaaʼ ni golpe.

—¿Xi racaláʼdxiluʼ? —ná guardia que rabi naa.

—Bicaaʼ ti ridxi ne gudxeʼ laa —¡Guireeʼ de raríʼ!—. ¡Mejor laguseguyoo naa stubeʼ, peru lacueeʼ naa raríʼ!

Qué nulabi guardia que ni gudxeʼ laa, peru qué nindaa bidieeʼ cuenta nuu ti gunaa gadxé peʼ laa de xcaadxi gunaa ni nuu raqué. Rihuínnica nuudxí ladxidoʼbe, ngue runi gurieeʼ cueʼbe.

Guizáʼ bidxagayaaʼ ora gúdxibe naa: «Pa chitíneluʼ naa la? guyuu cuidadu, purtiʼ raríʼ runibiáʼcabe naa casi ti gunaa qué iquiiñeʼ ni nuu ra pabellón riʼ, purtiʼ testigu stiʼ Jehová naa».

Qué gánnadiaʼ pa ruuyacabe ca testigu stiʼ Jehová casi enemigu stiʼ gobiernu, peru ni nannaʼ nga dxi nahuiineʼ yeganna chupa de Ca Binni Ruundaʼ Biblia bixhozeʼ (zacá binibiáʼcabe ca testigu stiʼ Jehová dxiqué), rietenalaʼdxeʼ guníʼ bixhozeʼ: «Dxandíʼ ni rusiidiʼ Ca Binni Ruundaʼ Biblia riʼ».

Dede biinaʼ tantu cayecheʼ pur binebiaʼyaʼ Berta Brüggemeier, ti gunaa guizáʼ nachaʼhui. Ne gudxeʼ laabe: «¡Por favor bisiidiʼ naa de Jehová!». Nabé tobi si gúcadu ne gatigá maʼ canidu de Biblia. Biziideʼ stale cosa de Jehová, biziideʼ laabe nga Dios ni dxandíʼ, ni runi ni jneza, ni nadxii ne ti Dios de paz. Laaca biziideʼ naguixhe íquebe guni chaahuibe guiráʼ ra maʼ bininá ca binni malu. Casi ná Biblia lú Salmo 37:10, 11: «Maʼ xcaadxi si tiempu cayaadxaʼ, ne maʼ qué ziuu binni malu [...]. Peru ca ni nadóʼ zacaacaʼ guidxilayú, ne zabánicaʼ nayecheʼ purtiʼ ziuu stale paz».

Bireeʼ de ndaaniʼ cárcel ne guyaaʼ sti ladu de Alemania

Biseguyoocabe naa gaayuʼ iza, ne lu iza 1956 bireeʼ de ndaaniʼ cárcel que. Gaayuʼ dxi despué guyaaʼ Alemania occidental, ne ca dxi que maʼ napaʼ chupa xiiñeʼ, Hannelore ne Sabine, né laacabe yeniáʼ. Gucaʼ divorciar de xheelaʼ ne bizuluáʼ bidxaagaʼ ca Testigu ne bi’ni’ estudiárnecaʼ naa sti biaje. Gucané estudiu que naa guieneʼ caquiiñeʼ guchaaʼ modo nabaneʼ para guibaneʼ modo ná Jehová. Bineʼ stipa pur guneʼ ca ni ne guyuaanisaʼ lu iza 1958.

Bichaganaʼyaʼ sti biaje peru yanna maʼ né ti testigu stiʼ Jehová ni láʼ Klaus Menne. Guizáʼ nayecheʼ guyuu xquendaxheeladu ne gúpadu chupa xiiñidu: Benjamin ne Tabia. Triste guinieeʼ ni, peru raca 20 iza guti Klaus lu ti accidente ne dede yanna viuda naa. Peru ratadxí ladxiduáʼ purtiʼ nannaʼ ziasa ca ni maʼ guti ne zabánicaʼ ndaaniʼ Guidxilayú riʼ ora maʼ nácani ti paraísu (Lucas 23:43; Hechos 24:15). Sti cosa ni riguixhedxí ladxiduáʼ nga guidapaʼ xiiñeʼ cayúnicaʼ xhiiñaʼ Jehová.

Pur ca ni maʼ biziideʼ lu Biblia, yanna maʼ nannaʼ Jehová si nga zuni justicia lu Guidxilayú riʼ. Nanna Jehová ximodo nabáninu yanna ne ximodo bibáninu dxiqué, ti cosa ni binni qué gannaʼ. Pur ca ni maʼ biziideʼ riʼ ratadxí ladxiduáʼ, jmaruʼ si ora ridideʼ o ruuyaʼ cayaca xiixa injusticia. Eclesiastés 5:8 ná: «Pa gúʼyaluʼ cuquiichiʼ náʼ ti gobernador ca binni pobre xquídxiluʼ ne cadi cayaca justicia ne cadi cayuni respetárcabe derechu stiʼ binni, cadi guidxagayaaluʼ. Purtiʼ nuu ti binni jma risaca cayuuyaʼ ni cayuni funcionariu ca ne despué de laacabe nuu xcaadxi jma risaca». Ne nánnanu binni ni jma risaca ca nga Jehová, Dios ni bizáʼ guiráʼ ni nuu. Sicaríʼ ruzeeteʼ Biblia de laabe: «Nin tobi de ca cosa ni bizáʼ Dios cadi nuu ra nagaʼchiʼ, sínuque ruuyaʼ dxíchibe guiráʼ ni, ne laabe cuídxibe cuenta laanu» (Hebreos 4:13).

Ma’ bibaneʼ casi noventa iza

Gatigá rinabadiidxacabe naa ximodo bibani binni ca dxi bi’ni’ mandar ca nazi ne ca comunista. «Guizáʼ nagana xa», ricabeʼ laacabe. Purtiʼ guiropaʼ gobiernu riʼ nácacaʼ cásica xcaadxi binni ni huayuni mandar. Nga rusihuinni dxandíʼ ca diidxaʼ riʼ: cadi lu náʼ diʼ binni nuu guni mandar laaca laa. Nga runi Biblia ná: «Binni huayuni mandar binni para si gacanacaʼ» (Eclesiastés 8:9). ¡Biaʼsi peʼ ni ná ca diidxaʼ riʼ!

Dxi gucaʼ joven bineʼ cré guiráʼ ni riníʼ binni, ngue runi guníʼ iqueʼ zanda cueecabe guiráʼ ca injusticia ni raca, peru yanna maʼ nannaʼ Dios si ni bizáʼ laanu zanda guni ni jneza lu Guidxilayú riʼ ne zúnibe ni ora maʼ guleebe guiráʼ ca binni malu ca ne ora maʼ guni mandar xiiñibe Jesucristu lu Guidxilayú riʼ, purtiʼ laa nabé rizaalaʼdxiʼ guiráʼ binni. Sicaríʼ ruzeeteʼ Biblia de Xiiñiʼ Dios: «Gunnaxhiiluʼ ni jneza ne guca nanaláʼdxiluʼ cosa malu» (Hebreos 1:9). Guizáʼ rudieeʼ xquixe peʼ Dios pur bidii naa oportunidad gunebiaʼyaʼ Rey ni runi ni jneza stiʼ ne dxi maʼ guni mandar gobiernu riʼ nga racala’dxe’ guibaneʼ para siempre.

[Imagen]

Naa ne ca xiiñeʼ, Hannelore ne Sabine, despué de yendadu Alemania occidental

[Imagen]

Naa ne Benjamin, xiiñeʼ, ne xheelabe Sandra