5 ndaa

Xi gudixhe ique Dios guniné Guidxilayú riʼ

Xiñee bizáʼ Jiobá Guidxilayú (1, 2)

Xiñee cadi ti paraísu Guidxilayú riʼ yanna (3)

Xi zazaacalú guiráʼ ca binni qué iquiiñeʼ ca (4)

Xi zuni Jesús xcaadxi si dxi pur ca binni huará, pur ca binnigola, ne pur ca gueʼtuʼ (5, 6)

Xi naquiiñeʼ guʼnuʼ para ganda guicaaluʼ ca ndaayaʼ ni chigueeda ca (7)

1. Jiobá bizáʼ Guidxilayú riʼ para guibani binni ndaaniʼ ni sin qué ñuu dxi ñáticaʼ. Laabe gucaláʼdxibe nibeza binni luni ne guendanayecheʼ ne ñácacaʼ nachaʼhuiʼ (Salmo 115:16; Hechos 17:26). Guidxilayú riʼ, qué ziuu dxi guinitilú ni. Zandaa ni, qué zaluxe diʼ ni (Salmo 104:5; Eclesiastés 1:4).

2. Ante guzáʼ Dios hombre la? gulibe ti ndaa de Guidxilayú ne bíʼnibeni ti paraísu ne gulee labe ni «jardín de Edén». Raqué guluube primé hombre ne primé gunaa: Adán ne Eva. Dios gucalaʼdxiʼ ñápacabe xiiñicabe ne nibánicabe lu guidubi Guidxilayú, chaahuidugá ñúnicabe ni ti paraísu (Génesis 1:28; 2:8, 15).

3. Adán ne Eva bicheecaʼ purtiʼ laapecaʼ qué ninacaʼ ñúnicaʼ ni na ley stiʼ Dios. Pur nga runi, Jiobá gulee laacabe de ndaaniʼ jardín de Edén que ne zaqué biniti paraísu ra biuucabe que (Génesis 3:1-6, 23). Peru Jiobá caʼruʼ diʼ gusiaandaʼ ni gucalaʼdxiʼ ñuniné Guidxilayú riʼ. Laabe cuzabiruaabe gúnibeni ti paraísu ne guibani binni ndaaniʼ ni sin qué chuʼ dxi gati. Ximodo zúnibeni yaʼ (Salmo 37:29).

4. Ante gaca Guidxilayú riʼ ti paraísu la? napa xidé guinitilú guiráʼ ca binni qué iquiiñeʼ ca (Colosenses 3:6). Ndiʼ la? zácani lu guendaridinde stiʼ Dios ni láʼ Armagedón ra guiluxe guiráʼ guendaquéiquiiñeʼ ni nuu. Óraque la? Binidxabaʼ zadaguyoo pur ti mil iza ne zacá maʼ qué ziuuruʼ jma binni qué iquiiñeʼ para gunitilú Guidxilayú riʼ. Ne zacá zalá xquidxi si Dios (Apocalipsis 16:14, 16; 20:1-3).

5. Óraque la? Jesucristu zuni mandar lu Guidxilayú riʼ pur ti mil iza (Apocalipsis 20:6) ne chaahuigá chaahuigá zabeebe donda lu xquendabiaaninu ne lu beela ládinu. Zacá la? zácanu binni ni qué gapa donda casi guca Adán ne Eva ante gucheenecaʼ Dios. Óraque la? maʼ qué ziuuruʼ jma guendahuará, guendayooxhoʼ nin guendaguti. Cani huará la? ziándacaʼ, ne cani nagola ca la? zabiguetaʼ zácacaʼ nahuiiniʼ (Job 33:25; Isaías 33:24; Apocalipsis 21:3, 4).

6. Lu Guendaruni Mandar stiʼ Jesús pur ti Mil Iza la? ca binni ni qué guchee zúnicaʼ dxiiñaʼ para gúnicaʼ guidubi naca Guidxilayú riʼ ti paraísu (Mateo 5:5). Ne ziasa millón de gueʼtuʼ para guibani ndaaniʼ Guidxilayú riʼ (Hechos 24:15). Pa gúnicabe ni canabaʼ Dios laacabe la? zabanirucabe ndaaniʼ Guidxilayú riʼ sin qué chuʼ dxi gáticabe. Peru pa coʼ la? zanitilúcabe ne maʼ qué ziuuruʼ dxi guibánicabe (Juan 5:28, 29; Apocalipsis 20:11-15).

7. Zacá zuni Dios ni gudixhe ique guniné Guidxilayú riʼ. Ñee qué ñuuláʼdxiluʼ nicaaluʼ ca ndaayaʼ ni chigueeda ca la? Pa zacá ni la? napuʼ xidé guiziidiruluʼ jma de Jiobá ne cadi gusaanuʼ de guzuubuʼ stiidxabe. Ni zacané lii nga cheluʼ guiráʼ ca guendaridagulisaa ni raca ra Yoo stiʼ Reinu stiʼ ca Testigu stiʼ Jiobá de neza raliʼdxuʼ (Isaías 11:9; Hebreos 10:24, 25).

[Dibuju/foto ni zeeda lu yaza 10]

Paraísu ni biniti

[Dibuju/foto ni zeeda lu yaza 11]

Tiidi si Armagedón la? Guidxilayú riʼ zácani ti paraísu