11 ndaa
Ni runi cré ne ni maʼ biaa binni guni ni Dios qué riulaʼdxiʼ
Xii ndiʼ runi cré binni ne xi maʼ biaa guni cadi jneza yaʼ (1)
Naquiiñeʼ guni cré ca xpinni Cristu de que Dios naca ti Trinidad la? (2)
Xiñee qué runi ca xpinni Cristu Navidad nin Nabaana nin guendarusaa iza (3, 4)
Ñee zanda guniná ca gueʼtuʼ ca binni nabani la? (5) Ñee guti Jesús lu ti cruz la? (6)
Pabiáʼ risaca gúninu ni riulaʼdxiʼ Dios (7)
1. Cadi guiráʼ diʼ ni runi cré binni ne ni maʼ biaa guni nga cadi jneza. Peru Dios qué riuláʼdxibe cani zeeda de religión ni cadi dxandíʼ ne ni rucaalú ni rusiidiʼ Biblia (Mateo 15:6).
2. Trinidad: Ñee chonna Dios nga Jiobá la? Coʼ. Bixhózenu Jiobá, «laasi nga tobi lucha Dios ni dxandíʼ dxandipeʼ» (Juan 17:3, NM; Marcos 12:29). Jesús nga Xiiñiʼ Dios baʼduʼ lugola Stibe ne nuube xananáʼ Dios (1 Corintios 11:3). Bixhózebe jma nandxóʼ que laabe (Juan 14:28). Espíritu santu ca la? cadi ti binni diʼ ni; sínuque laani nga stipa ni riquiiñeʼ Dios para guni xiixa (Génesis 1:2; Hechos 2:18).
3. Navidad ne Nabaana: Jesús qué ñale diʼ 25 stiʼ beeu diciembre, sínuque gaxha de primé dxi stiʼ beeu octubre, ti beeu stiʼ ti iza ora ca ni rapa dendxuʼ riaanacaʼ lu bi huaxhinni ne ca manihuiiniʼ sticaʼ (Lucas 2:8-12). Qué ñuu dxi ñabi Jesús ca xpinni ñúnicaʼ dxi gúlebe. Ni gúdxibe laacaʼ gúnicaʼ nga guietenaláʼdxicaʼ guendaguti stibe (Lucas 22:19, 20). Navidad ne guiráʼ ni runi binni yanna la? biáleni ndaaniʼ religión ni cadi dxandíʼ de dxiqué. Zacaca Nabaana ni runi stale binni. Ca primé xpinni Cristu la? qué ñúnidicaʼ Navidad nin Nabaana, zaqueca yanna ca ni dxandíʼ zinanda Cristu qué rúnidicaʼ ni.
4. Guendarusaa iza: Ndaaniʼ Biblia rieete chupa si guendarusaa iza ni biʼniʼ binni ni qué ñuni ni na Jiobá (Génesis 40:20-22; Marcos 6:21, 22, 24-27). Ca primé xpinni Cristu qué ñúnidicaʼ dxi bisaacaʼ iza, purtiʼ guiráʼ ni runi binni yanna la? biale cani dxiqué lu religión ni cadi dxandíʼ. Ca ni dxandíʼ xpinni Cristu la? laaca rusigáʼdecaʼ ne riuucaʼ nayecheʼ intiica si dxi.
5. Guendaridxibi gueʼtuʼ: Cani maʼ guti ca la? qué gánnacaʼ gastiʼ ne qué zanda diʼ gúnicaʼ xiixa. Laanu la? qué zanda diʼ gacanenu laacabe, ne laacabe qué zanda diʼ gúnicabe laanu gastiʼ (Salmo 146:4; Eclesiastés 9:5, 10). Alma ca rati. Qué ribániruʼ ni ora tobi maʼ guti (Ezequiel 18:4). Peru nuu tiru ca ángel ni láʼ bazeenduʼ (demonio) ca la? ridíʼdicaʼ pur binni ni maʼ guti. Guiráʼ ni runi binni para guidxibi o guni adorar gueʼtuʼ la? cadi jneza diʼ cani (Isaías 8:19).
6. Cruz: Jesús qué ñátidibe lu ti cruz, sínuque gútibe lu ti yaga. Diidxaʼ griegu ni rutiixhicabe «cruz» ndaaniʼ stale Biblia la? riníʼ ni ti yaga. Cruz ca biáleni ndaaniʼ religión ni cadi dxandíʼ. Ca primé ni guca xpinni Cristu la? qué niquiiñedicaʼ nin ñuni adorarcaʼ cruz. Yanna, xi raʼbuʼ: jneza nga iquiiñeʼ binni ti cruz para guni adorar Dios la? (Deuteronomio 7:26; 1 Corintios 10:14).
7. Zándaca gaca nagana para lii gusaanuʼ guiráʼ ni runi cré binni ne ni runi, ne zándaca chuʼ binnilídxiluʼ o xhamíguluʼ gucuudxi lii para cadi gusaanuʼ cani runi creluʼ. Peru bietenalaʼdxiʼ, jma risaca gúninu ni riulaʼdxiʼ Jiobá que tutiica binni (Proverbios 29:25; Mateo 10:36, 37).
[Dibuju/foto ni zeeda lu yaza 22]
Dios cadi ti Trinidad diʼ laa
[Dibuju/foto ni zeeda lu yaza 23]
Navidad la? biáleni ndaaniʼ religión ni cadi dxandíʼ de dxiqué
Cadi naquiiñeʼ diʼ guni adorarnu nin guidxíbinu ca gueʼtuʼ ca