15 ndaa

Gacanenu binni guni ni na Dios

Xiñee naquiiñeʼ güiluʼ ni caziidiluʼ (1)

Tu guiráʼ ndiʼ naquiiñeʼ güineluʼ ca diidxaʼ nacubi ne galán riʼ yaʼ (2)

Ora guʼyaʼ binni xpiaʼluʼ, xi zucaani laa guni (2)

Pora maʼ zanda gucheechuʼ stiidxaʼ Dios ne ca binni ridagulisaaneluʼ (3)

1. Lii maʼ biziiduʼ stale cosa sicarú ni na Biblia. Cani maʼ biziiduʼ riʼ la? naquiiñeʼ gacané ni lii guiniisiluʼ casi ti xpinni Cristu (Efesios 4:22-24). Ne laaca naquiiñeʼ ca ni maʼ biziiduʼ riʼ para ganda guicaaluʼ guendanabani ni qué zaluxe (Juan 17:3). Peru laaca naquiiñeʼ ganna guiráʼ binni ca diidxaʼ nacubi ne galán riʼ para ganda guilacaʼ. Guiráʼ ca ni dxandipeʼ zinanda Cristu la? naquiiñeʼ gucheechecaʼ Stiidxaʼ Dios. Dios cuseenda gúninu ni (Romanos 10:10; 1 Corintios 9:16; 1 Timoteo 4:16).

2. Zanda guzululuʼ güineluʼ guiráʼ binni nuu gaxha de lii ca ni sicarú ni maʼ biziidiluʼ. Guniʼné ni binnilidxuʼ, xhamíguluʼ, ca ni rineluʼ scuela, ne ca ni runineluʼ dxiiñaʼ. Guca nadóʼ ne nachaʼhuiʼ ora gusiidiluʼ (2 Timoteo 2:24, 25). Bietenalaʼdxiʼ, binni jma ruuyaʼ ni rúninu que ni rininu. Pur nga runi pa galán xpiaʼluʼ la? zacaneni xcaadxi binni gucaadiágacaʼ diidxaʼ riuu neza ni zineluʼ (Mateo 5:16; 1 Pedro 3:1, 2, 16).

3. Chaahuidugá la? zándaca guʼnuʼ guiráʼ ni canabaʼ Dios lii para ganda guzululuʼ gucheecheluʼ Stiidxabe ne ca binni ridagulisaaneluʼ. Ndiʼ nga tobi de ca ni riquiiñeʼ guʼnuʼ lu guendariniisi stiluʼ (Mateo 24:14). ¡Pabiáʼ galán nga gacaneluʼ tuuxa gaca xpinni Jiobá ne ganda ugaanda ti guendanabani ni qué ziuu dxi guiluxe! (1 Tesalonicenses 2:19, 20.)