4 Ndaa
Ximodo zanda gunibiaʼluʼ Dios
Zanda gunibiaʼluʼ Jiobá ra gúʼndaluʼ Biblia. Dxiqué la? Dios gulí tuudxi hombre para gucaacaʼ ni na xquendabiaanibe. Cani gucuá ca, runibiáʼcabe ni casi Biblia. Yanna zanda gunibiaʼnu Dios ra gúʼndanu Biblia. Ndaaniʼ ni zeeda diidxaʼ riuu neza stiʼ Jiobá, nga runi runibiáʼcabe ni casi Stiidxaʼ Dios. Zanda guni crenu ni na Biblia purtiʼ Jiobá qué riuu diʼ dxi gusiguii. «Nanna nu qué zusiguii be.» (Hebreos 6:18.) Nga runi, Stiidxaʼ Dios nga ne ni dxandíʼ (Juan 17:17).
Biblia nga tobi de cani jma risaca ni bisigaʼdeʼ Dios laanu. Zeeda gácani casi ti carta ni rucaa bixhoze binni ni nadxii xiiñiʼ. Cayabi ni laanu ni bizabiruaa Dios guni lu Guidxilayú riʼ, ti paraisu sicarú ra guibáninu. Cayabi ni laanu xi biʼniʼ Dios dxiqué, xi cayúnibe yanna, ne xi chigúnirube para ca xiiñibe ni qué rucheené laabe. Laaca racané ni laanu tiidinu ca ra nagana stinu ne guidxélanu guendanayecheʼ (2 Timoteo 3:16, 17).
Ca testigu stiʼ Jiobá nácacaʼ xhamigu Dios, ne zacanécabe lii guiéneluʼ ni rusiidiʼ Biblia. Gudxi si laacabe de que racaláʼdxiluʼ gúʼndaluʼ Biblia. Qué zábidicabe lii quixu laacabe pur gusiidicabe lii. (Mateo 10:8). Laaca zanda cheluʼ ca guendaridagulisaa stiʼ cani zinanda Cristu. Raca cani ra runi adorárcabe, ni láʼ Yoo stiʼ Reinu. Pa lii cheluʼ ca guendaridagulisaa ca la? jma nagueenda zunibiaʼluʼ Dios.
Zanda gunibiaʼluʼ Dios ra guiníʼ íqueluʼ cani bíʼnibe. Biblia na: «Dios bizáʼ guibáʼ ne guidxilayú» (Génesis 1:1, NM). Ora Jiobá bizáʼ «guibáʼ ne guidxilayú» la? laaca bizaʼbe Gubidxa. Yanna, xi rusiidiʼ cani laanu de Dios yaʼ. De que Jiobá napa stale poder. Laasibe nga gunda bíʼnibe tobi ni nandxóʼ casi Gubidxa ca. Laaca ruluíʼ ni laanu de que Jiobá nanna stale, purtiʼ naquiiñepeʼ stale guendabiaaniʼ nga para gaca Gubidxa ni ruchaa ne ruzaaniʼ laanu, ne qué ziuu dxi guizuiʼ.
Cani bizáʼ Jiobá rusihuinni cani de que nadxiibe laanu. Guníʼ ique guiráʼ xixé cuananaxhi nuu lu Guidxilayú. Ñándaca nudii Jiobá laanu ti cuananaxhisi o nin tobi. Peru, bidiibe laanu gadxé gadxé cuananaxhi nanixe. Ndiʼ ruluíʼ de que Jiobá nadxii laanu, riulaʼdxiʼ gudii, riníʼ ique xi caquiiñenu, ne runi ni nachaʼhuiʼ (Salmo 104:24).