Dios napa lá

ORA chigunibiaʼluʼ tuuxa, xii nga primé ni rábicabe lii de binni que yaʼ.... Cadi dxandíʼ tu labe la? Guiranu nápanu lanu. Dios gulee lá primé hombre que Adán, ne xheelabe biree lá Eva.

Peru cadi binni si napa lá. Guníʼ ique xiixa ni laaca napa lá. Ora tuuxa gusigaʼdeʼ lii ti manihuiiniʼ o ti muñeca, cadi dxandíʼ zaguíxheluʼ lame o lani la?... Zaguixhuʼ pue, purtiʼ risácapeʼ nga gapa cani lá cani zaqueca laanu ne ca maniʼ ca.

Biiyadxí guiráʼ ca beleguí, o estrella, ni rihuinni guibáʼ huaxhinni ca. Ñee nánnaluʼ napa cani lá cani la?... Napa cani, Dios nga gulaʼquiʼ lá cani. Biblia cayabi laanu laabe nga «cugábabe panda beleguí nuu; riniʼbe lá guiráʼ cani» (Salmo 147:4).

Tuu nga rábiluʼ binni ni jma risaca nuu lu guidubi naca guibáʼ ne Guidxilayú yaʼ.... Ya, nga nga Dios. Ñee rábiluʼ nápabe labe la?... Jesús na nápabe. Ti dxi, Jesús guníʼnebe Dios ne gúdxibe laa: Maʼ bisiideʼ laacabe tu laluʼ (Juan 17:26). Nannuʼ tu labe la?... Laca laabe guniʼbe tu labe: «Naa nga Jiobá. Nga nga laʼyaʼ». Nga runi lá Dios nga JIOBÁ (Isaías 42:8).

Ximodo runi sentirluʼ ora rietenalaʼdxiʼ tuuxa laluʼ yaʼ.... Cadi dxandíʼ riécheluʼ la?... Jiobá laaca racalaʼdxiʼ ganna binni tu labe, nga runi ora guzeetenu de laabe naquiiñeʼ guininu labe. Maestru Ni Jma Nanna Gusiidiʼ que biquiiñebe lá Dios, Jiobá, ora bisiidibe binni. Ti dxi guniʼbe: «Gunaxhii Dios stiuʼ de idubi ladxidóʼ loʼ» (Marcos 12:30).

Jesús nanna pabiáʼ nga risaca lá Jiobá, ne laaca nánnabe racalaʼdxiʼ Jiobá ganna guiráʼ xixé binni tu láʼ. Ngue runi, bisiidibe ca xpínnibe iquiiñecaʼ lá Dios ne guiniʼcaʼ ni ora guni orarcaʼ.

Dxiqué la? Dios biluiʼbe ti israelita ni láʼ Moisés pabiáʼ nga risaca Labe. Ca israelita que gulézacaʼ ndaaniʼ ti guidxi láʼ Egipto, raqué gúcacabe esclavu ne guizáʼ bininácabe laacaʼ. Ra maʼ biniisi Moisés la? gucaláʼdxibe ñacanebe sti israelita. Peru Faraón, rey stiʼ Egipto, bidxiichi stale ne gucalaʼdxiʼ ñuuti laabe. Ngue runi Moisés bixooñeʼ de Egipto.

Moisés guyé sti guidxi láʼ Madián. Raqué bichaganabe, gúpabe xiiñibe ne yegápabe dendxuʼ. Ti dxi, laga cayápabe dendxuʼ gaxha de ti dani, biiyabe xiixa ni qué huahuinni: ti yagahuiiniʼ naze bele peru cadi cayaʼquiʼ diʼ. Bidxíñabe para guʼyaʼ chaahuibe ni.

Nannuʼ xi guca la?... Moisés binadiaga cucaacabe ridxi laa dede lade bele que: «¡Moisés!, ¡Moisés!». Tu stiʼ ridxi que yaʼ.... ¡Ridxi stiʼ Dios ngue! Laabe bidiibe ti dxiiñaʼ nabé risaca ni guni Moisés ra gúdxibe laa: Gudáʼ ti guseendaʼ lii ra nuu Faraón, rey stiʼ Egipto, para chindeeluʼ xquidxeʼ raqué. Dios gúdxibe Moisés zacanebe laa lu dxiiñaʼ que.

Peru Moisés bicabi laabe: Pa naa chaa Egipto ra nuu ca israelita ca ne gabeʼ laacabe Dios biseendaʼ naa, xi guneʼ pa guinabadiidxacabe naa tu labe yaʼ. Xi gabeʼ laacabe yaʼ. Dios gudxi laabe gábibe ca israelita que sicaríʼ: Jiobá biseendaʼ naa ra nuutu. Jiobá nga laʼyaʼ ne qué ziuu dxi guidxaa ni (Éxodo 3:1-15). Ca diidxaʼ ca bisihuinni cani qué ziuu dxi guchaa Dios lá ne racaláʼdxibe cadi chuʼ dxi gusaana binni de gunibiáʼ labe.

Ora bibiguetaʼ Moisés Egipto la? ca egipciu que guníʼ íquecaʼ naca Jiobá tutiica si dios ni qué risaca. Qué niníʼ íquecaʼ pa laabe nga Dios lu guidubi naca Guidxilayú. Ngue runi, Jiobá gúdxibe rey stiʼ Egipto: Zudiéʼ gunibiáʼ binni laʼyaʼ lu guidubi naca Guidxilayú (Éxodo 9:16). Ne bíʼnibe ni. Nannuʼ ximodo la?...

Jiobá biquiiñebe Moisés para cuee ca israelita que de Egipto. Ora bidxiña ca israelita que ruaa nisadóʼ Xiñáʼ que la? Jiobá bixhaleʼ nisadóʼ que ne gudíʼdicabe ra nabidxi. Zaqué gunda gudíʼdicabe sti ladu que ne qué ñácacabe gastiʼ. Peru ora zidiʼdiʼ Faraón ne ca soldadu stiʼ ndaaniʼ ni la? nisa zuhuaa dxi que bilaate luguiácabe ne guirácabe gúticabe.

Qué nindaa diʼ, guiráʼ binni de Guidxilayú gúnnacaʼ ni biʼniʼ Jiobá ndaaniʼ nisadóʼ Xiñáʼ que. Ximodo nánnanu ni yaʼ.... Nánnanu ni purtiʼ cuarenta iza despué, ca israelita que yendacaʼ Canaán. Ngue nga layú ni bizabiruaa Jiobá gudii laacabe. Raqué, ti baʼdudxaapaʼ láʼ Rahab gúdxibe chupa hombre israelita: «Maʼ binadiágadu ximodo bicuiidxiʼ Jiobá nisadóʼ Xiñáʼ que nezalutu ora bireetu de Egipto» (Josué 2:10).

Yanna riʼ, stale binni nácacaʼ casi ca egipciu que. Qué runi crécabe pa Jiobá nga Dios lu guidubi naca Guidxilayú. Pur nga, Jiobá racaláʼdxibe guzeeteʼ xquídxibe de laabe nezalú xcaadxi binni. Jesús biʼniʼ ni. Dxi maʼ bizaa dxi stibe lu Guidxilayú riʼ, gúdxibe Jiobá lu ti oración: Maʼ bisiideʼ laacabe tu laluʼ (Juan 17:26).

Racaláʼdxiluʼ gácaluʼ casi Jesús la? Para gácaluʼ casi laabe naquiiñeʼ gábiluʼ xcaadxi binni Jiobá nga lá Dios. Stale binni qué gánnacaʼ tu labe. Zanda guluiʼluʼ laabe Salmo 83:18, ra na: «Ti ganna binni laluʼ nga Jiobá, lii si nga Ni Jma Nuu Luguiáʼ lu guidubi naca guidxilayú».

Xi rusiidiʼ ca diidxaʼ riʼ laanu yaʼ.... Rusiidiʼ cani laanu Jiobá nga lá ni jma risaca ni nuu, purtiʼ nga nga lá Dios ni jma nandxóʼ, ne ni bizáʼ guiráʼ xixé ni nuu ne laabe nga Bixhoze Jesús. Ne bietenalaʼdxiʼ, Jesús guníʼ naquiiñeʼ gannaxhiinu Jiobá Dios de guidubi ladxidoʼno. Nadxiiluʼ laabe lii la?...

Ximodo zanda gusihuínninu nadxiinu laabe yaʼ.... Zanda gúninu ni ra gunibiaʼnu laabe ne gácanu xhamígube. Ne gusíʼdinu xcaadxi binni tu labe. Laaca zanda guinínenu laacabe de guiráʼ ni galán maʼ bizáʼ Dios. Jiobá ziuube nayecheʼ stálepeʼ pur ni gúninu, purtiʼ racaláʼdxibe ganna binni de laabe. Dxandíʼ zanda gúninu ni, njaʼ....

Cadi guiráʼ diʼ binni nga zucaadiaga ora guinínenu laacaʼ de Jiobá. Ora guníʼ Jesús, Maestru Ni Jma Nanna Gusiidiʼ que de Laabe la? guyuu stale binni ni qué nucaadiaga. Peru Jesús qué nusaana diʼ de niníʼ lá Jiobá.

Nga runi, gácanu casi Jesús. Cadi gusaananu de guininu lá Jiobá. Pa gúninu ni la? Jiobá Dios ziechené laanu purtiʼ cusihuínninu nadxiinu labe.