Tuu nga Dios stinu

XIÑEE riquiiñeʼ guinabadiidxanu tuu nga Dios stinu yaʼ.... Purtiʼ binni runi adorar stale dios (1 Corintios 8:5). Ora gucuaa apóstol Pablu poder ni zeeda de Jiobá para gusianda ti hombre ni qué huayuu dxi saʼ la? guiráʼ binni que bicaacaʼ ridxi, nacaʼ: ¡Ca dios ca maʼ gúcacaʼ casi binni ne maʼ biétecaʼ ra nuunu! Ne óraque gucaláʼdxicaʼ ñuni adorarcaʼ Pablu ne xhamígube Bernabé. Dede gudíxhecaʼ lácabe casi láʼ tuudxi dios ni cadi dxandíʼ: Pablu gúdxicabe laa Hermes, ne Bernabé, Zeus.

Peru Pablu ne Bernabé qué ninádicaʼ ñuni adorar nin ti binni laacaʼ. Guyuucabe lade ca binni que ne nácabe: Lagusaana «irá ni runi tu riʼ, purti qué iquiiñe cani, para sa nanda tu Dios ni nabani» (Hechos 14:8-15). Tuu nga «Dios ni nabani» ni bizáʼ guiráʼ cosa ca yaʼ.... Laabe nga Jiobá, Dios «Ni Nuu Jma Luguiáʼ lu guidubi naca guidxilayú». Jesús guníʼ, Jiobá nga «tobi lucha Dios ni dxandíʼ». Yanna, tu si ndiʼ naquiiñeʼ gaca adorar yaʼ.... Jiobá si ne guirútiruʼ (Salmo 83:18; Juan 17:3; Apocalipsis 4:11).

Stale binni runi adorar dios ni cadi naca «tobi lucha Dios ni dxandíʼ». Stale tiru runi adorárcabe xiixa de yaga, de guié o de guiibaʼ (Éxodo 32:4-7; Levítico 26:1; Isaías 44:14-17). Ne nuu tu nabé rusisaca stuudxi binni ne ruuyacabe laaca casi bidóʼ o dios. Peru ñee naquiiñeʼ gusisácanu laacabe la?...

Guca si Saulo apóstol Pablu la? bicaabe: «Qué runi cre ca purti rusicahui [dios] xquenda biaani ca» (2 Corintios 4:4). Tuu ndiʼ dios riʼ yaʼ.... Nga nga Binidxabaʼ. Laabe maʼ bidxélabe modo guni adorárcabe binni ne stuudxi cosa.

Ora gucalaʼdxiʼ Binidxabaʼ nuzuxibi Jesús xañee ne ñuni adorarbe laa, xi bicabi Jesús laabe yaʼ.... «Dios si nga naquiiñe usisaca cabe ne guni cabe ni na». (Mateo 4:10.) Ne ca diidxaʼ riʼ Jesús bisihuinni Jiobá si nga naquiiñeʼ gaca adorar. Guidúʼyanu xi guca tuudxi hombrehuiiniʼ ni maca nánnacaʼ ndiʼ. Biree lácabe Sadrac, Mesac ne Abednego.

Ca hombrehuiiniʼ riʼ hebreu laacabe ne gúlecabe guidxi Israel, xquidxi Dios, peru yenécabe laacaʼ casi esclavu Babilonia. Raqué, ti rey láʼ Nabucodonosor bizaʼbe ti bidóʼ de oro guizáʼ naroʼbaʼ ne ti dxi biʼniʼ mandarbe guzuxibi guiráʼ binni xañee ni ora gunadiágacaʼ xhidxi saa. Ne guniʼbe: Tu qué guzuxibi ne guni adorar ni la? zulaacabe laa ndaaniʼ ti horno cacaguí. Xi ñúniluʼ yaʼ....

Sadrac, Mesac, ne Abednego nabé bizuubacabe stiidxaʼ rey que. Peru dxi que maʼ qué ñunidícabe ni; qué ninádicabe nuzuxíbicabe. Ñee nannuʼ xiñee la?... Purtiʼ ley stiʼ Dios que na: Cadi naquiiñeʼ gápaluʼ sti dios sínuque naa si. Cadi naquiiñeʼ diʼ gúniluʼ nin ti bidóʼ nin guzuxíbiluʼ xañee ni (Éxodo 20:3-5). Pur nga Sadrac, Mesac ne Abednego bizuubacaʼ stiidxaʼ Jiobá ne qué ñúnicaʼ ni biʼniʼ mandar rey que laacaʼ.

Rey que guizáʼ bidxiichi ne oraqueca bisendacaabe guionnaʼ hebreu que ra nuube. Para rábibe laacaʼ: Ñee dxandíʼ nga qué natu guzuxíbitu xañee ca dios stinneʼ la? Ribezaʼ gúnitu ni yanna. Ora gunadiágatu xhidxi saa ca la? laguzuxibi ne laguni adorar bidóʼ ni maʼ bizayaʼ ca. Pa qué gúnitu ni la? zulaa laatu ndaaniʼ horno ni cayaʼquiʼ ca. Ne tu dios ndiʼ gulá laatu de lu nayaʼ yaʼ.

Xi guni ca hombrehuiiniʼ riʼ yanna. Xi ñúniluʼ yaʼ.... Laacabe gúdxicabe rey que: Dios stidu ni rúnidu ni na zulá laadu. Peru neca qué gúnibe ni, qué zuni adorárdidu ca dios stiluʼ. Qué zuzuxíbidu xañee bidóʼ de oro stiluʼ.

Rey que bidxiichi ne biʼniʼ mandarbe: ¡Lagusindáʼ horno ca gadxe tiru jma de ni raca nandáʼ ni! Ne óraque gúdxibe ca soldadu jma nadipaʼ nápabe que gundiibicaʼ Sadrac, Mesac, ne Abednego ne gulaacabe laacaʼ ndaaniʼ horno que. ¡Horno que guizáʼ nandáʼ ni dede biiti bele stini que ca soldadu que! Peru xi guca guionnaʼ hebreu que yaʼ.

Sadrac, Mesac ne Abednego biábacaʼ lade bele que, peru málasi biásacabe. Qué ñacadicabe gastiʼ ne maʼ cadi liibicabe. Ximodo guca ndiʼ yaʼ.... Rey que biiyadxí ndaaniʼ horno que ne bidxibi pur ni biʼyaʼ. Ñee cadi chonna hombre nga bilaʼnu lu guí ca la? na rey que. Ca hombre que bicábicaʼ: Chonna pue.

Óraque rábibe laacaʼ: ¡Laguuyaʼ! Cayuuyaʼ tapa binni canazá lade bele ca ne cadi cayácacaʼ gastiʼ. Nannuʼ tuu ngue sti binni que la?... Ngue nga ángel stiʼ Jiobá ni bilá guionnaʼ hebreu que para cadi ñácacaʼ gastiʼ.

Biiyaʼ si rey que ndiʼ la? bidxíñabe gaxha de horno que ne bicaabe ridxi: ¡Sadrac, Mesac, Abednego, xpinni Dios ni nandxóʼ, laguiree ne latáʼ raríʼ! Ora bireecabe la? guiráʼ ca binni que biiyaʼ qué ñaʼquidicabe. Nin xhoʼ guʼxhuʼ cadi candáʼdicabe. Óraque na rey que: Guisaca Dios stiʼ Sadrac, Mesac, ne Abednego, maʼ biseendabe ángel stibe para gulá laacaʼ purtiʼ qué ninacaʼ ñuni adorarcaʼ sti dios sínuque Dios si sticaʼ (Capítulo 3 stiʼ Daniel).

Lu ni guca riʼ zanda guizíʼdinu xiixa. Ca dxi stinu riʼ ca hombre ca ruzáʼcabe bidóʼ para guni adorar binni. Rúnicabe cani de yaga, de guié, de guiibaʼ o de lari. Ti libru na sicaríʼ: «Cásica risaca cruz, zaqueca risaca bandera» (The Encyclopedia Americana). Ca primé discípulo stiʼ Jesús qué ñúnidicaʼ xiixa ni nuluíʼ cayuni adorarcaʼ xaíque stiʼ Roma. Ti hombre bicaa historia, ni láʼ Daniel P. Mannix, guniʼbe laaca zeeda gaca ni bíʼnicabe ca casi ora «qué nácabe guni saludárcabe bandera o guiníʼcabe juramentu».

Nga runi, ñee raʼbuʼ gadxé modo ruuyaʼ Dios ca bidóʼ ni guca de lari, de yaga, de guié, o de guiibaʼ la?... Nouʼ jneza nga guni adorar ti xpinni Jiobá bidóʼ la?... Sadrac, Mesac, ne Abednego qué ñúnidicaʼ ni, ngue bisiecheʼ Jiobá. Ximodo zanda guʼnuʼ casi bíʼnicabe ca yaʼ....