CAPÍTULO 37
¿Ñee maʼ caquiiñeʼ chuaanisaʼ la?
Bicaa dxandíʼ o cadi dxandíʼ:
¿Caquiiñeʼ chúʼnisa guiráʼ ca xpinni Cristu la?
□ Dxandíʼ
□ Cadi dxandíʼ
¿Pa chuʼnísaluʼ la? maʼ qué zucheeluʼ.
□ Dxandíʼ
□ Cadi dxandíʼ
Ora riuunisa binni rilá.
□ Dxandíʼ
□ Cadi dxandíʼ
Pa caʼruʼ chuaanisaʼ, qué zabidxi Dios cuenta naa.
□ Dxandíʼ
□ Cadi dxandíʼ
Cumu maʼ guyuunisa ca xhamiguaʼ la? naa laaca naquiiñeʼ chuaanisaʼ.
□ Dxandíʼ
□ Cadi dxandíʼ
¿ÑEE rúniluʼ ni ná ca ley stiʼ Jehová la? ¿Rúniluʼ stipa gaca xhamíguluʼ Dios la? ¿Ñee riníʼneluʼ xcaadxi binni de ni runi creluʼ la? Pa rúniluʼ ca ni bizéʼtenu riʼ, zándaca ca ni íqueluʼ maʼ zanda chuʼnísaluʼ. Peru guleza. Ante guicaaluʼ ti decisión, caquiiñeʼ gánnaluʼ pa maʼ nuuluʼ listu. Ti cosa ni zacané lii gánnaluʼ pa maʼ zanda chuʼnísaluʼ nga pa biaʼsi bicábiluʼ ca pregunta ni zeeda ra ruzulú capítulo riʼ.
● ¿Caquiiñeʼ chúʼnisa guiráʼ ca xpinni Cristu la?
Dxandíʼ. Nga nga ni biʼniʼ mandar Jesús guni ca discípulo stiʼ (Mateo 28:19, 20). Laaca guyuunisa Jesús. Nga runi, para gácaluʼ xpinni Cristu, laaca naquiiñeʼ chuʼnísaluʼ ora maʼ ganda ne chuʼluʼ seguru maʼ racaláʼdxiluʼ gúniluʼ ni.
● ¿Pa chuʼnísaluʼ la? maʼ qué zucheeluʼ.
Cadi dxandíʼ. Ora riuunisa tuuxa rusihuinni nezalú binni maʼ bidii xquendanabani Jehová. Riuunisa tuuxa purtiʼ racala’dxi’ guibani modo riuulaʼdxiʼ Jehová ne cadi purtiʼ maʼ qué racala’dxi’ guchee.
● Ora riuunisa binni rilá.
Dxandíʼ. Casi ná Biblia, caquiiñeʼ chúʼnisa tuuxa para ganda guilá (1 Pedro 3:21). Peru cadi zeeda gácani casi ora rizíʼ tuuxa ti seguru ni rapa laa de intiica cosa. Coʼ. Caquiiñeʼ chúʼnisa binni purtiʼ nadxii Jehová ne racala’dxi’ guni ni nabe de guidubi ladxidóʼ (Marcos 12:29, 30).
● Pa caʼruʼ chuaanisaʼ, qué zabidxi Dios cuenta naa.
Cadi dxandíʼ. Santiago 4:17 ná «pa nuu tuuxa nanna guni ni jneza, peru qué runi ni la? maʼ cuchee», gastiʼ naca pa maʼ guyuunisa o pa coʼ. Nga runi guni ique: ¿Ñee nánnaluʼ xi ribeza Dios gúniluʼ la? ¿Ma’ huaniisiluʼ ne nánnaluʼ xii nga ni jneza ne ni cadi jneza la? Pa maʼ guníʼ íqueluʼ ca ni bizéʼtenu riʼ, zanda guiníʼneluʼ bixhózeluʼ ne jñaaluʼ o ti xpinni Cristu ni maʼ huaniisi. Zanda gacanécabe lii ugaandaluʼ meta riʼ de chuʼnísaluʼ.
● Cumu maʼ guyuunisa ca xhamiguaʼ la? naa laaca naquiiñeʼ chuaanisaʼ.
Cadi dxandíʼ. Caquiiñeʼ guiale de ndaaniʼ ladxido’lo’ chuʼnísaluʼ (Salmo 110:3). Peru para ganda ugaandaluʼ meta riʼ la? caquiiñeʼ gánnaluʼ xi guiráʼ nga runi ti testigu stiʼ Jehová ne laaca caquiiñeʼ chuʼluʼ seguru zanda guicaaluʼ responsabilidad riʼ (Eclesiastés 5:4, 5).
Ni jma galán zanda gúniluʼ
Ora riuunisa binni la? ruchaa xquendanabani ne randa ricaa stale ndaayaʼ. Peru naquiiñeʼ gánnaluʼ naca ni ti responsabilidad nabé naroʼbaʼ. ¿Xiñee yaʼ? Purtiʼ caquiiñeʼ guni cumplirluʼ guiráʼ ni gúdxiluʼ Jehová zúniluʼ dxi bidiiluʼ xquendanabániluʼ laabe.
¿Ñee mayaca chuʼnísaluʼ la? Nápaluʼ razón para chuʼluʼ nayecheʼ. Gástiruʼ sti ndaayaʼ jma galán que gúniluʼ ni ná Jehová de guidubi ladxidoʼloʼ ne gusihuínniluʼ laabe racaláʼdxiluʼ guibániluʼ modo riuuláʼdxibe (Mateo 22:36, 37).
NI ZAZIIDILUʼ LU STI CAPITULO CA
Zaziidiluʼ xi zanda gúniluʼ para guibániluʼ jma nayecheʼ.
TEXTU NI ZANDA GACANÉ LII
«Rinabaʼ laatu gudiitu cuerpu stitu casi ti sacrificiu nabani, santo ne ni chuulaʼdxiʼ Dios. Zacá zaquiiñetu xquendabiaanitu para gúnitu xhiiñaʼ Dios» (Romanos 12:1).
NI ZANDA GÚNILUʼ
Gunabadiidxaʼ bixhózeluʼ ne jñaaluʼ tu hermanu o hermana nuu ndaaniʼ congregación zanda gacanecaʼ lii gúniluʼ jma lu xhiiñaʼ Jehová (Hechos 16:1-3).
¿ÑEE NANNUʼ NI LA?
Zeeda gaca guendariuunisa ca casi ti marca ni caquiiñeʼ binni para guilá (Ezequiel 9:4-6).
¡BIZULÚ BIʼNIʼ NI!
Ca cosa ni zeeda lu Biblia ni caquiiñeʼ guieneʼ chaahueʼ para ganda chuaanisaʼ: ․․․․․
¿Xi racalaʼdxeʼ guinabadiidxaʼ bixhozeʼ ne jñaaʼ de tema riʼ? ․․․․․
XI RINÍʼ ÍQUELUʼ?
● ¿Xiñee risaca chuʼnísaluʼ?
● ¿Xiñee nuu joven riuunisa ante chuʼ listu?
● ¿Xiñee nuu joven rindaa para gudiicaʼ xquendanabánicaʼ Jehová ne chuʼnísacaʼ?
[Ni caníʼ/Epígrafe]
«Guietenaladxeʼ maʼ guyuaanisaʼ racané ni naa para cadi guneʼ ni cadi jneza» (Noemí)
[Imagen ne cuadru]
ni nabé rinabadiidxaʼ binni de guendariuunisa
¿Xii nga chúʼnisa binni? Ora riaaziluʼ ndaaniʼ nisa casi ñaca rátiluʼ, rusaanaluʼ xquendanabániluʼ ni gúpaluʼ dxiqué ra bíʼniluʼ ni racaláʼdxiluʼ. Ne ora rireeluʼ de ndaaniʼ nisa, zeeda gaca ni casi ñaca nibániluʼ sti biaje, peru yanna para gúniluʼ ni ná Jehová o gúniluʼ ni riuuláʼdxibe.
¿Xi riníʼ gudiiluʼ xquendanabániluʼ Jehová? Riníʼ ni maʼ cadi lii nga xpixuaanaʼ xquendanabániluʼ, sínuque maʼ cudiiluʼ ni Jehová (Mateo 16:24). Nga runi, ante chuʼnísaluʼ la? caquiiñeʼ gúniluʼ ti oración Jehová para gábiluʼ laa zúniluʼ ni nabe primé lu xquendanabániluʼ.
¿Xi caquiiñeʼ guneʼ ante chuaanisaʼ? Caquiiñeʼ guibániluʼ modo ná Biblia ne guiníʼneluʼ xcaadxi binni de ni runi creluʼ. Laaca risaca gaca xhamíguluʼ Dios, guni estudiarluʼ Biblia ne guni orarluʼ laabe. Nabé risaca gúniluʼ ni ná Jehová purtiʼ nga nga ni racaláʼdxiluʼ ne cadi pur ni gabi sti binni lii.
¿Panda iza caquiiñeʼ gapaʼ para chuaanisaʼ yaʼ? Cadi nga nga ni jma risaca. Peru para ganda chuʼnísaluʼ caquiiñeʼ guiéneluʼ pabiáʼ risaca nga gudiiluʼ xquendanabániluʼ Jehová.
¿Xi zanda guneʼ pa maʼ racalaʼdxeʼ chuaanisaʼ ne gabi bixhozeʼ ne jñaaʼ naa cuezaʼ ti tiempu yaʼ? Pa riníʼ íquecabe caquiiñeʼ cuézaluʼ ti tiempu para gúniluʼ guiráʼ ni ná Biblia, bicaadiaga laacabe ne biʼniʼ stipa chuʼluʼ jma gaxha de Jehová para gueeda gácabe xhamíguluʼ (1 Samuel 2:26).
[Cuadru]
Hoja de ejerciciu
¿ñee caníʼ íqueluʼ chuʼnísaluʼ la?
Ca pregunta riʼ zacané ca ni lii gánnaluʼ pa maʼ nuuluʼ listu. Peru ¡cadi guianda lii ante guicábiluʼ ca pregunta riʼ biindaʼ ca textu ca!
¿Ñee nápaluʼ confianza Jehová la? ¿Ximodo cusihuínniluʼ ni? (Salmo 71:5.) ․․․․․
¿Ñee nánnaluʼ xii nga ni jneza ne ni cadi jneza la? ¿Pora huasihuínniluʼ ni? (Hebreos 5:14.) ․․․․․
¿Panda biaje runi orarluʼ? ․․․․․
¿Ñee rinábaluʼ Jehová ni peʼ caquiiñeluʼ ora runi orarluʼ la? ¿Ñee rusihuinni ca oración stiluʼ nadxiiluʼ Jehová la? (Salmo 17:6.) ․․․․․
¿Xi ñuuláʼdxiluʼ ñúniluʼ para gaca ca oración stiluʼ jma galán? ․․․․․
¿Panda biaje ruundaluʼ Biblia? (Josué 1:8.) ․․․․․
¿Xi información ruundaluʼ ora rápaluʼ estudiu personal stiluʼ? ․․․․․
¿Xi meta racaláʼdxiluʼ ugaandaluʼ lu estudiu personal stiluʼ? ․․․․․
¿Ñee rábiluʼ galán runi predicarluʼ la? (Guzéʼtenu ti ejemplu: ¿Ñee randa rusiéneluʼ ca ni jma risaca zeeda lu Biblia la? ¿Rigánnaluʼ ca binni ni racala’dxi’ guiziidiʼ jma de Biblia la? ¿Ñee cayúniluʼ stipa gápaluʼ ti estudiu la?).
□ Ya □ Coʼ
¿Ñee riguni predicarluʼ ora qué rié bixhózelu’ ne jñaaluʼ la? (Hechos 5:42.)
□ Ya □ Coʼ
¿Xi meta nápaluʼ gana ugaandaluʼ lu predicación? (2 Timoteo 2:15.) ․․․․․
¿Ñee rieluʼ guiráʼ ca reunión la? o riaadxaluʼ ca ni? (Hebreos 10:25.) ․․․․․
¿Ximodo runi participarluʼ ora rieluʼ reunión yaʼ? ․․․․․
Ora qué rié bixhózeluʼ ne jñaaluʼ reunión, peru rábicabe lii zanda cheluʼ, ¿ñee rieluʼ la?
□ Ya □ Coʼ
¿Ñee nuuluʼ nayecheʼ purtiʼ cayúniluʼ ni ná Dios la?
(Salmo 40:8.)
□ Ya □ Coʼ
¿Ñee rietenaláʼdxiluʼ dxi qué ninaluʼ ñúniluʼ ni ná ca xcompañeru stiluʼ la? (Romanos 12:2.)
¿Xi zanda gúniluʼ para cadi gusaanaluʼ de gannaxhiiluʼ Jehová? (Judas 20, 21.)
Pa gusaana bixhózeluʼ ne jñaaluʼ o ca xhamíguluʼ Jehová, ¿ñee zúnirouʼ ni nabe la? (Mateo 10:36, 37.)
□ Ya □ Coʼ
[Imagen]
Ora maʼ gudixhe ique tuuxa chúʼnisa la? zeeda gaca ni casi ora nichaganáʼ: cadi guendariguite ni