«Cadi guiaanadxí de guiniʼluʼ ne cadi gusaana de guni predicarluʼ»

1-3. ¿Xiñee guyé Pablo Corinto, ne xi zándaca guluu xizaa laabe?

MAʼ ZILUXE iza 50 ne nuu Pablo Corinto, ti guidxi ra nuu stale negocio ne bueltu ne racá nabeza stale griegu romanu ne judíu.a Peru cadi nudiibe racá para gúnibe negocio nin para gúnibe dxiiñaʼ sínuque para gúnibe ti cosa jma risaca. Para gusiidibe binni de Reinu stiʼ Dios. Caquiiñebe ti lugar ra guiaanabe peru qué nabe gácabe ti carga para xcaadxi. Ne laaca qué nabe guiníʼ ique binni naquiiñeʼ gudiicabe laabe ni guibaninebe purtiʼ si cayúnibe xhiiñaʼ Dios. ¿Xi zúnibe yaʼ?

² Biziidiʼ Pablo guni carpa. Nabé nadipaʼ dxiiñaʼ riʼ ne lu nácabe rúnicabe ni peru bíʼnibe ni para gápabe ni iquiiñebe. ¿Zanda guidxélabe dxiiñaʼ ne ti lugar ra guiaanabe ndaaniʼ ti guidxi ra nuu stale binni la? Neca guluu nga xizaa laabe peru nánnabe ni jma risaca nga guni predicarbe.

³ Ruluíʼ xadxí huiiniʼ biaanaʼ Pablo ndaaniʼ guidxi Corinto, ne nabé galán biʼniʼ predicarbe raqué. Guidúʼyanu xi guiráʼ bíʼnibe dxi guyuube raqué ne ximodo zanda gacané ejemplu stibe laanu para guinínenu guiráʼ binni de Reinu stiʼ Dios.

«Dxiiñaʼ stibe nga gúnibe carpa» (Hechos 18:1-4)

4, 5. a) ¿Paraa biaana apóstol Pablo dxi guyuu Corinto, ne xi bíʼnibe para gápabe ni guibaninebe? b) ¿Ximodo biziidiʼ Pablo guni carpa?

⁴ Cadi xadxí de yendá Pablo ndaaniʼ guidxi Corinto, binibiáʼ ti guendaxheelaʼ nabé nachaʼhuiʼ ne ni ridxaagalú binni ra lidxi: Laacabe nga Áquila (judíu laabe) ne Priscila (ni laaca runibiáʼcabe casi Prisca). Gulézacabe Roma peru despué guyécabe Corinto «purtiʼ biʼniʼ mandar [emperador] Claudio guiree guiráʼ ca judíu de Roma» (Hech. 18:1, 2). Ne pur nga gunda bidxela Pablo dxiiñaʼ ne ti lugar ra guiaana. Relatu ca ná: «Cumu laaca dxiiñaʼ runi ca binni que nga rúnibe la? biaanabe ra lídxicaʼ ne bíʼninebe laacaʼ dxiiñaʼ. Dxiiñaʼ stibe nga gúnibe carpa» (Hech. 18:3). Ra lidxi guendaxheelaʼ riʼ guyuu Pablo biaʼ tiempu biʼniʼ predicar Corinto ne zándaca racá nga nuube dxi bicaabe caadxi de ca carta ni zeeda lu Biblia.b

⁵ ¿Xiñee carpa cayuni Pablo pa «Gamaliel» peʼ bisiidiʼ laa yaʼ? (Hech. 22:3). Neca ruseendaʼ ca judíu que ca xiiñicaʼ checaʼ scuela la? peru laaca rusiidicabe laacaʼ gúnicaʼ xiixa dxiiñaʼ huiiniʼ. Cadi guiaandaʼ laanu de Tarso Pablo, ti guidxi ni nuu Cilicia. Nabé runibiáʼcabe lugar riʼ, pur ti tela ni rúnicabe raqué ni láʼ cilicium ne riquiiñecabe ni para gúnicabe carpa. Nga runi zándaca dede dxi nahuiiniʼ Pablo biziidiʼ gui dxiiñaʼ riʼ. Para gúnicabe ti carpa naquiiñeʼ gúnicabe tela ca, ugácabe ne quíbacabe ni. Peru guizáʼ nagana ni purtiʼ nachonga tela ca ne naraayaʼ luni.

6, 7. a) ¿Ximodo biiyaʼ Pablo dxiiñaʼ stiʼ, ne xiñee nánnanu laaca zaqueca biʼyaʼ Áquila ne Priscila ni? b) ¿Xiñee zanda guininu laanu ca xpinni Dios nácanu casi Pablo, Áquila ne Priscila?

⁶ Peru cadi dxiiñaʼ diʼ que nga ni jma bisaca para Pablo Pablo. Gucané ni laabe para gápabe ni guibaninebe ne guni predicarbe «ca noticia galán stiʼ Dios sin» ñáxhabe (2 Cor. 11:7). Ne cumu laaca nabé biʼniʼ Áquila ne Priscila ni ná Dios la? biiyacabe dxiiñaʼ de gúnicabe carpa que casi ruuyaʼ Pablo ni. Ne dxi biree Pablo Corinto lu iza 52, bisaanacabe guiráʼ ni nápabe ne yenándacabe laa Éfeso ne raqué biquiiñeʼ lídxicabe para guidagulisaa ca hermanu (1 Cor. 16:19). Gudiʼdiʼ si ti tiempu biguétacabe Roma ne despué guyécabe Éfeso sti biaje. Ni jma bisaca para laacabe nga gúnicabe xhiiñaʼ Dios ne gacanécabe xcaadxi. Ngahuaʼ runi guizáʼ nadxii «guiráʼ congregación de xcaadxi nación» laacabe (Rom. 16:3-5; 2 Tim. 4:19).

⁷ Ca dxi riʼ, rinanda ca xpinni Jehová ejemplu stiʼ Pablo, Áquila ne Priscila. Neca nabé rúnicaʼ xhiiñaʼ Dios, laaca rúnicaʼ dxiiñaʼ nadipaʼ para cadi gácacaʼ «ti carga para» xcaadxi (1 Tes. 2:9). Casi ca precursor la? stale de laacaʼ rúnicaʼ dxiiñaʼ galaa si dxi o ti tiempu si para gápacaʼ ni iquiiñecaʼ ne gúnicaʼ ni jma risaca para laacaʼ, guni predicarcaʼ. Ne cásica biʼniʼ Áquila ne Priscila, stale hermanu rúnicaʼ stipa guidxagalucaʼ ca superintendente de circuito ra lídxicaʼ. Ne cumu siempre ridxaagalúcabe ca hermanu riʼ ra lídxicabe la? nga racané laacabe chúʼcabe gana ne guni sentírcabe nayecheʼ (Rom. 12:13).

«Stale binni de Corinto [...] biʼniʼ crecaʼ» (Hechos 18:5-8)

8, 9. ¿Xi biʼniʼ Pablo ora biʼniʼ predicar, ne paraa yeguni predicarbe?

⁸ Guidúʼyanu sti cosa ni rusihuinni biʼniʼ Pablo dxiiñaʼ para si gapa ni iquiiñeʼ ne cadi gusaana de guni predicar. Ora yendá Silas ne Timoteo Macedonia yenecaʼ stale cosa para iquiiñe Pablo (2 Cor. 11:9). Ne pur ngue «jmaruʼ si biʼniʼ predicar Pablo stiidxaʼ Dios» (Hech. 18:5). Peru yanna ra jma maʼ cayuni predicar Pablo jmaruʼ si cadi cusaanaʼ ca judíu de gucaalucaʼ laabe, ne qué lica ninacaʼ ñuni crecaʼ zanda gulá Cristu laacaʼ. Nga runi, nisi gudxibi Pablo xhaba para gusihuinni qué gapa donda pur ni guizaacacabe ne gudxi laacabe: «Laatu nápatu donda de ni guizaacatu. Cadi naa diaʼ napaʼ donda. Ne dede yannadxí maʼ chaaʼ ra nuu ca binni ni cadi judíu» (Hech. 18:6; Ezeq. 3:18, 19).

⁹ Relatu ca ná biree Pablo de ndaaniʼ Sinagoga que. Peru ¿paraa chiguni predicarbe yaʼ? Ticio Justo, ni zándaca naca ti prosélito judío, ne napa lidxi cueʼ sinagoga que nga ni bidxagalú laabe (Hech. 18:7). Neca gulézarube ra lidxi Áquila ne Priscila dxi guyuube Corinto, peru biquiiñecabe lidxi Ticio Justo para quixhe chaahuicabe modo guni predicárcabe.

10. ¿Xi rusihuinni qué nusaana Pablo de ñuni predicar ca judíu?

¹⁰ Yanna pa maʼ chiguni predicar Pablo ca binni de xcaadxi nación, ¿ñee riníʼ nga maʼ qué zuni predicarbe ca judíu ne ca prosélito ni racalaʼdxiʼ gucaadiaga laabe la? Coʼ. Purtiʼ «biʼniʼ cré Crispo, presidente stiʼ sinagoga que, Señor, laa ne familia stiʼ». Ne ruluíʼ si stale de ca ni rié ra sinagoga que biʼniʼ ni. Purtiʼ Biblia ná: «Ora binadiaga stale binni de Corinto ca noticia galán, biʼniʼ crecaʼ ne guyuunísacaʼ» (Hech. 18:8). Cadi xadxí de guca formar ti congregación ndaaniʼ guidxi Corinto ne ra lidxi Ticio Justo nga bidagulisaacabe. Pa gucua relatu stiʼ Hechos según fecha bizaaca cada cosa o pur orden cronológico (casi bicaa Lucas), zanda guininu guca ca judíu o ca prosélito que xpinni Cristu despué de gudxibi Pablo xhaba. Ndiʼ rusihuinni riene apóstol Pablo binni ne runi predicarbe tutiica gacalaʼdxiʼ guiziidiʼ ni dxandíʼ.

11. Cásica gucané Pablo ca judíu de Corinto laanu ca testigu de Jehová, ¿ximodo racanenu ca binni ni napa religión?

¹¹ Ca dxi riʼ nuu lugar nabé riuu ca religión ca lu xpida binni. Zándaca purtiʼ maʼ xadxí de nuucabe ndaaniʼ guidxi ca o pur rucaa ca misioneru ca binni chuʼ ládecaʼ. Yanna riʼ nuu stale binni runi ni ná religión stiʼ purtiʼ si maʼ biaa gúnini. Ne nga nga ni bizaaca ca judíu de Corinto que, cásica Pablo laanu laaca naquiiñeʼ gúninu stipa pur gacanenu binni ganda guiene chaahuicaʼ ni ná Biblia. Qué zareʼnu gana neca qué náʼ binni guni predicarnu o sanándacaʼ ca xaíque stiʼ ca religión ca laanu. Cadi guiaandaʼ laanu ládecabe nuu binni ni nayá ladxidóʼ ne «cayúnicabe xhiiñaʼ Dios né stale gana, peru cadi casi peʼ modo biziidicabe ni» (Rom. 10:2). ¡Nga runi, chiyúbinu laacabe!

«Napaʼ stale binni ndaaniʼ guidxi riʼ» (Hechos 18:9-17)

12. ¿Xi gudxi Jesús Pablo lu ti visión?

¹² Zándaca qué ganna Pablo pabiáʼ tiempu naquiiñeʼ guiaanaʼ Corinto. Peru ti gueelaʼ bihuinni Jesús nezalube ne gudxi laabe: «Cadi guidxíbiluʼ. Cadi guiaanadxí de guiniʼluʼ ne cadi gusaana de guni predicarluʼ, purtiʼ qué zaxeleʼ de lii ne guirutiʼ qué zucaalú lii para guniná lii. Napaʼ stale binni ndaaniʼ guidxi riʼ» (Hech. 18:9, 10). ¡Guizáʼ guluu visión riʼ ganna laabe! Jesús peʼ gudxi laabe zapa laabe ne nuuruʼ binni ndaaniʼ guidxi ca ni naquiiñeʼ gunadiaga mensaje riʼ. Ngue runi biaana Pablo «raqué ti iza xhoopaʼ beeu cusiidibe ca binni que de stiidxaʼ Dios» (Hech. 18:11).

13. ¿Xi zándaca bietenalaʼdxiʼ Pablo laga zidxiña ra tribunal que? ¿Xiñee nuube seguru qué zuuticabe laabe?

¹³ Ti iza de nuu Pablo ndaaniʼ guidxi Corinto, bizaaca xiixa ni bicaa laabe chuʼbe seguru nuu né Jesús laabe. Gúcani ora «guyuu ca judíu de acuerdu para gucaalucaʼ Pablo ne yenecaʼ laabe ra nuu tribunal» (Hech. 18:12). Caadxi expertu ná nasoo tribunal (griegu, bḗma) que mármol azul ne blancu ni ne nápani stale dibuju luni. Ne zándaca nuu ni gaxha de plaza stiʼ luguiaa que. Ne frente de laani nuu ti lugar ra zanda chuʼ stale binni. Pur ni maʼ bidxela ca arqueológo rihuinni guyuuni gaxha de sinagoga que ne de ra lidxi Ticio Justo. Ne ra zadxíñabe plataforma que, zándaca bietenaláʼdxibe dxi biiticabe Esteban, primé xpinni Cristu guti pur fe stiʼ, ne ximodo laapebe guniʼbe zaa gati Esteban (Hech. 8:1). Yanna, ¿ñee ngaca nga zazaaca Pablo la? Coʼ, purtiʼ maca gudxi Jesús laabe: «Guirutiʼ qué zucaalú lii para guniná lii» (Hech. 18:10).

14, 15. a) ¿Xi donda bigaaniʼ ca judíu que ique Pablo, ne xiñee qué niná Galión que ñaca juzgarbe? b) ¿Xi bizaaca Sóstenes, ne tu zándaca gúcabe despué?

¹⁴ ¿Xi bizaaca ora yendá Pablo ra nuu tribunal que yaʼ? Juez que nga Galión, gobernador de Acaya ne bíʼchibe nga Séneca filósofo romano ni nabé runibiáʼ binni. Ca judíu que guniʼcaʼ racaláʼdxibe ucuudxibe binni para guni adorarcaʼ Dios binni ne racalaʼdxiʼ gucuudxi laacabe para guni adorárcabe Dios peru cadi modo ná ley (Hech. 18:13). Cugaanicabe donda íquebe purtiʼ nácabe cayuni obligarbe ca judíu que gácacaʼ xpinni Cristu. Peru bidii Galión cuenta qué gapa Pablo donda ne qué ñuni «xiixa cosa malu para gucaalú ley» (Hech. 18:14). Ne qué lica niníʼ íquebe ñuube lu ca guendanagana stiʼ ca judíu. Nga runi, qué lica niníʼ Pablo gastiʼ: Galión peʼ nga guníʼ qué zaca juzgarbe. Ne pur nga bidxiichi ca judíu ne gunaazecaʼ Sóstenes —zándaca laabe nga biaanabe lugar stiʼ Crispo casi presidente ndaaniʼ sinagoga— ne bizulú «gudíñecaʼ laabe nezalú tribunal» que (Hech. 18:17).

¹⁵ ¿Xiñee bidii Galión lugar quíñecabe Sóstenes? Zándaca purtiʼ guníʼ íquebe laa nga ni zániru lu grupu que, ne pur nga runi merecer ni. Modo tiica si gúcani, peru bizaaca xiixa galán. Chupa chonna iza despué ora bicaa Pablo primé carta para ca xpinni Cristu de Corinto, guniʼbe de Sóstenes ne gúdxibe laa hermanu (1 Cor. 1:1, 2). ¿Ñee laaca de Sóstenes que nga caniʼbe la? Pa zacá ni zándaca ni bizaacabe que bicaa ni laabe gácabe xpinni Cristu.

16. ¿Xiñee riguu promesa ni biʼniʼ Jesús Pablo gana laanu?

¹⁶ Casi maʼ bidúʼyanu, gudxi Jesús Pablo: «Cadi guidxíbiluʼ. Cadi guiaanadxí de guiniʼluʼ ne cadi gusaana de guni predicarluʼ, purtiʼ qué zaxeleʼ de lii» (Hech. 18:9, 10). Peru ¿padxí gudxi Jesús laabe ca diidxaʼ riʼ ya? Gúcani despué de qué niná ca judíu que nucaadiaga laabe. Laaca galán guietenaláʼdxinu ca diidxaʼ guníʼ Jesús ca jmaruʼ si ora qué náʼ binni gucaadiaga laanu. Qué chuʼ dxi guiaandaʼ laanu nanna Jehová xi nuu ndaaniʼ ladxidóʼ binni ne ribídxibe ca binni ni nayá ladxidóʼ ra nuube (1 Sam. 16:7; Juan 6:44). ¿Cadi dxandíʼ riguu nga gana laanu para cadi gusaana de guni predicarnu la? Ne guiráʼ iza riuunisa gayuaa mil de binni. Nga riníʼ riuunisa jma de ti gayuaa binni cada dxi. Pa gúninu stipa gacanenu «binni de guiráʼ guidxi gaca discípulo» la? ziuʼnu seguru zaca cumplir ca diidxaʼ ni guníʼ Jesús riʼ, laa guníʼ: «Qué ziuu dxi guixeleʼ de laatu dede ora guiluxe guidxilayú riʼ» (Mat. 28:19, 20).

«Pa naʼ Jehová» (Hechos 18:18-22)

17, 18. ¿Xi zándaca ziníʼ ique Pablo ora zeʼ Éfeso?

¹⁷ Qué gannadinu pa pur decisión gucuaa Galión que guyuu ti tiempu maʼ guirutiʼ nuchiiñaʼ congregación de Corinto. Ni nánnanu nga «biaanaruʼ Pablo raqué xhupa xhonna gubidxa» ne despué guca despedirbe de ca hermanu que. Lu primavera stiʼ iza 52 dxi nuu Pablo Cencreas, ti guidxi ni riaana 11 kilómetru ladu rindani gubidxa de guidxi Corinto para cheʼ Siria, «ne ndaaniʼ guidxi Cencreas nga bigá guicha ique Pablo purtiʼ biʼniʼ ti voto» (Hech. 18:18).c Despué yenebe Áquila ne Priscila, ne juntu gudíʼdicabe nisadóʼ Egeo para chindácabe Éfeso, ni nuu Asia Menor.

¹⁸ Zándaca laga zeʼ Pablo viaje que zietenalaʼdxiʼ xi guiráʼ biʼniʼ 18 beeu biʼniʼ predicar ndaaniʼ guidxi Corinto. Puru si cosa galán ziníʼ íquebe ne nápabe stale razón para chuʼbe nayecheʼ. Guizáʼ galán guyeni Pablo ra biʼniʼ predicar. Maʼ nuu primé congregación ndaaniʼ guidxi que ne laaca maʼ nuu ti lugar ra ridagulisaacabe, ra lidxi Ticio Justo. Stale binni guca xpinni Cristu casi Ticio Justo, Crispo ne familia stiʼ. Nabé gunnaxhiibe laacaʼ purtiʼ gucanebe laaca guiziidicaʼ ni dxandíʼ. Ne despué bicaabe ra nuucaʼ ne bichaagabe laacaʼ casi ti carta ni cá ndaaniʼ ladxidóʼ tuuxa. Laanu laaca nadxiinu ca binni ni maʼ gucanenu guiziidiʼ ni dxandíʼ. ¡Nabé riéchenu guidúʼyanu ca hermanu riʼ purtiʼ nácacaʼ casi «ti carta ni caníʼ bien» de laanu! (2 Cor. 3:1-3).

19, 20. ¿Xi biʼniʼ Pablo ora yendá Éfeso, ne ximodo zanda chinándanu ejemplu stibe?

¹⁹ Cásipeʼ yendá Pablo Éfeso bizulú biʼniʼ predicar, «biuube ndaaniʼ sinagoga ne gucanebe ca judíu guiénecaʼ Stiidxaʼ Dios» (Hech. 18:19). Peru biaje riʼ cadi xadxí diʼ biaanabe ndaaniʼ guidxi ca «neca gúdxicaʼ laabe ñaanarube raqué, peru qué ninabe, sínuque guca despedirbe de laacaʼ ne gúdxibe laacaʼ: “Pa naʼ Jehová, zabiguetaʼ ra nuutu sti biaje”» (Hech. 18:20, 21). Nanna dxiichibe nuu stale dxiiñaʼ gúnibe Éfeso ne nápabe gana ibiguétabe peru bisaanabe guiráʼ ni lu náʼ Jehová. Zanda chinándanu ejemplu stibe. ¿Ximodo yaʼ? Galán quixe íquenu gúninu jma lu xhiiñaʼ Dios ne gúninu stipa pur ugaandanu ni. Peru galán guyúbinu gacané Jehová laanu ne gúninu ca cosa ca modo riuuláʼdxibe (Sant. 4:15).

²⁰ Bisaana Pablo Áquila ne Priscila ndaaniʼ guidxi Éfeso ne gudxiʼbaʼ lu ti barcu para cheʼ Cesarea. Despué zándaca «guyebe» yeugapadiúxibe ca hermanu de congregación ni nuu Jerusalén (biiyaʼ nota de estudiu stiʼ Hechos 18:22 ni zeeda lu Biblia de estudiu diidxastiá). Ne últimu biguétabe guidxi ra bireebe que Antioquía de Siria. ¡Guizáʼ galán guyeni laabe lu guiropa biaje ni bíʼnibe casi misioneru! Yanna guidúʼyanu xi bizaaca lu guiropa biaje bíʼnibe.