CAPÍTULO 8
¿Ximodo nga ti buen amigu?
«Ora cadxiicheʼ la? riuuladxeʼ gacaʼ desahogarniá’ tuuxa. Ora nuaaʼ triste riquiiñeʼ tu gabi naa zaree guiráʼ ni galán. Ne ora nuaaʼ nayecheʼ la? riuuladxeʼ güeniaʼ ni tuuxa. Para naa la? nabé risaca nga gápanu xhamígunu». (Brittany)
NUU tu ná ca xcuidi la? riquiiñecaʼ ti compañeru de juegu, ne ca adolescente la? riquiiñeʼ gápacaʼ xhamígucaʼ. Peru ¿xi diferencia nápacaʼ ni yaʼ?
Ti compañeru de juegu la? riguitené si lii.
Ti amigu la? riuuláʼdxibe modo nácaluʼ.
Biblia ná ti binni «ni dxandíʼ xhamígunu la? guiráʼ ora nadxii laanu, ne zácabe bíchinu ora nápanu xiixa guendananá» (Proverbios 17:17). Rihuinni dxíchica gadxé nga gapa binni ti xhamigu ne gadxé nga gápacaʼ ti compañeru de juegu.
Ni dxandíʼ la? ora maʼ ziniisiluʼ naquiiñeʼ gápaluʼ xhamíguluʼ ni...
1) ... gapa cualidad galán.
2) ... chinanda ca principiu moral stiʼ Dios.
3) ... gacané lii gúniluʼ ni jneza.
Yanna, pregunta ca nga, ¿ñee zacá ca xhamíguluʼ la? Guidúʼyanu tobi pur tobi de ca ni bizéʼtenu riʼ.
Primé: Cualidad galán
Ni naquiiñeʼ gánnaluʼ. Cadi guiráʼ diʼ ni ná xhamigu lii nga dxandíʼ naca ti buen amigu. Stiidxaʼ Dios cayabi laanu: «Nuu compañeru capaz laa de guniná stobi, peru nuu xhamigu binni ni jma rannaxhii laa que ti biʼchiʼ» (Proverbios 18:24). Zándaca naluʼ exageradu nga, peru guníʼ ique ndiʼ: ¿Ñee huayápaluʼ ti xhamíguluʼ ni biʼniʼ abusar de confianza stiluʼ ne guníʼ mal o ni cadi dxandíʼ de lii la? Cadi dxandíʼ rixá amistad ca ora rizaaca nga la?a Nga runi, ni jma risaca nga gúʼyaluʼ tu laa zanda gaca xhamíguluʼ ne cadi panda gápaluʼ.
Ni zanda gúniluʼ. Biyubi gaca xhamíguluʼ ca ni napa cualidad galán ne riníʼcabe bien de laa.
«Guiráʼ binni riníʼ bien de xhamigaʼ Fiona. Ñuuladxeʼ ñacaʼ casi laabe ne ñunibiáʼcabe naa zacaca. Nabé ridxagayaaʼ modo laabe». (Yvette, de 17 iza.)
Biʼniʼ ndiʼ:
1. Biindaʼ Gálatas 5:22, 23.
2. Guníʼ ique: «¿Ñee napa ca xhamiguaʼ ca cualidad stiʼ espíritu la?»
3. Bicaa lá ca ni jma xhamíguluʼ ne bicaa ximodo laacabe.
Lácabe
․․․․․
Ximodo laacabe
․․․․․
Ti conseju ni zanda gacané lii: Pa huaxiéʼ galán ni ruuyaluʼ de modo laacabe la? zándaca maʼ caquiiñeʼ guchaaluʼ ca xhamíguluʼ.
Guiropa: Ca principiu moral stiʼ Dios
Ni naquiiñeʼ gánnaluʼ. Pa ni nuuluʼ nga guiuba gápaluʼ xhamíguluʼ la? zándaca zábiluʼ tutiica si. Ne laaca cadi naquiiñeʼ guiaandaʼ lii Biblia ná: «Tu ridxaaga binni huati la? qué zié ni laa jneza» (Proverbios 13:20). Ca diidxaʼ «binni huati» cadi caníʼ diʼ ni de ca ni qué ribee calificación galán ra scuela o de ca ni huaxiéʼ inteligente laa, sínuque caníʼ ni de ca ni qué riene ne ca ni qué runa. ¿Cadi dxandíʼ qué racaláʼdxiluʼ gaca xhamíguluʼ binni zacá la?
Ni zanda gúniluʼ: Biiyaʼ tu laa zanda gaca xhamíguluʼ. Cadi cuiluʼ tutiica si (Salmo 26:4). Cadi caníʼ diʼ ni gúniluʼ ti grupu para chupa chonna si, sínuque guʼyaʼ chaahuiluʼ para gánnaluʼ maʼ gadxé nga ti binni runi ni jneza ne maʼ gadxé nga binni malu. Zuuyaluʼ «tuu nga ni runi ni ná Dios ne tuu nga ni qué runi ni nabe» (Malaquías 3:18).
«Riecheʼ purtiʼ gucané bixhozeʼ ne jñaa naa guidxelaʼ xhamiguaʼ biaʼca naa ni naca espiritual» (Christopher, de 13 iza.)
Bicabi ca pregunta riʼ:
¿Ridxíbiluʼ gucaa ca xhamíguluʼ lii gúniluʼ xiixa ni nannuʼ cadi jneza la?
□ Ya
□ Coʼ
¿Ñee qué naluʼ gunibiáʼ bixhózeluʼ ne jñaaluʼ laacabe purtiʼ rábiluʼ qué ziuuláʼdxicaʼ modo nácacabe la?
□ Ya
□ Coʼ
Ti conseju ni zanda gacané lii: Pa bicábiluʼ ya la? jma galán guyúbiluʼ ca xhamíguluʼ lade ca xpinni Cristu ni nácacaʼ ti ejemplu ne zinándacaʼ ca principiu moral stiʼ Dios.
Guionna: Ni gacané lii gúniluʼ ni jneza
Ni naquiiñeʼ gánnaluʼ: Stiidxaʼ Dios ná: «Pa guidxaagatu binni ni runi ni cadi jneza la? zunítitu ca costumbre galán ni nápatu» (1 Corintios 15:33). Rihuinni zacá ni pur ni bizaaca Lauren, laabe guniʼbe: «Para gaca xhamiga ca compañera de clase stinneʼ naa la? napa xidé guneʼ ni nácabe, ne cumu qué racalaʼdxeʼ chuaaʼ stubeʼ la? bineʼ guiráʼ ni rúnicabe». Ni dxandíʼ la? pa gúniluʼ ni ná xcaadxi cásica bi’ni’ Lauren la? zeeda gácaluʼ casi ti pión lu juegu de ajedrez ni zanda guniibicabe laa modo nácabe. ¿Zacá nga racaláʼdxiluʼ gúnicabe lii la?
Ni zanda gúniluʼ: Bixeleʼ de ca ni racalaʼdxiʼ gucaa lii guchaaluʼ modo lii ne gúniluʼ cásica runi. Zándaca jma huaxiéʼ xhamíguluʼ zápaluʼ, peru zuni sentirluʼ galán ne zápaluʼ oportunidad de guidxélaluʼ xcaadxi xhamíguluʼ ni gacané lii gúniluʼ ni jneza (Romanos 12:2).
«Tobi de ca ni jma xhamiguaʼ láʼ Clint. Nabé equilibradu laabe, riénebe ne siempre riguube gana naa.» (Jason, de 21 iza.)
Bicabi ca pregunta riʼ:
¿Ñee ruchaaluʼ modo ráculuʼ lari, modo riniʼluʼ ne ca ni rúniluʼ para si gusiécheluʼ ca xhamíguluʼ la?
□ Ya
□ Coʼ
¿Ñee rieluʼ xiixa lugar ra cadi jneza cheʼ ca xpinni Cristu purtiʼ si ca xhamíguluʼ riecaʼ ca lugar ca la?
□ Ya
□ Coʼ
Ti conseju ni zanda gacané lii: Pa bicábiluʼ ya ca pregunta ni zeeda lu yaza ni gudiʼdiʼ ca la? gunabaʼ bixhózeluʼ, jñaaluʼ o tuuxa binni huaniisi gacané lii guidxélaluʼ xhamíguluʼ ni gacané lii gúniluʼ ni jneza. Ne pa testigu stiʼ Jehová lii la? laaca zanda guiníʼneluʼ ti ancianu de congregación stiluʼ.
ZADXÉLALUʼ JMA INFORMACIÓN LU CAPÍTULU 9 LU VOLUMEN CHUPA STIʼ LIBRU RIʼ
NI ZAZIIDILUʼ LU STI CAPÍTULO CA ¿Ñee huadii gana lii o huacaacabe lii gúniluʼ xiixa ni nánnaluʼ cadi jneza la?
[Nota]
a Guiranu rucheʼnu (Romanos 3:23). Nga runi, pa guniná ti xhamíguluʼ lii ne de guidubi ladxidoʼbe guinábabe guni perdonarluʼ laabe la? bietenalaʼdxiʼ, «ti binni ni nadxii la? siempre nuu dispuestu guni perdonar» (1 Pedro 4:8).
TEXTU NI ZANDA GACANÉ LII
«Nuu xhamigu binni ni jma rannaxhii laa que ti biʼchiʼ.» (Proverbios 18:24)
NI ZANDA GÚNILUʼ
Biʼniʼ stipa guibániluʼ modo riuulaʼdxiʼ Dios. Zacá zadxiñaʼ ca binni ni riuulaʼdxiʼ guni ni jneza lii. ¡Ne laacabe dxandíʼ peʼ zácacabe ti buen amigu para lii!.
¿ÑEE NANNUʼ NI LA?
Neca qué riuu Dios pur caadxi si binni, peru ruuyabe tuu nga ca ni zanda gaca xhamígube (Salmo 15:1-5)
¡BIZULÚ BIʼNIʼ NDIʼ!
¿Xi zanda guneʼ para gapaʼ buen amigu? ․․․․․
Ca binni huaniisi ni racalaʼdxeʼ gunebiaʼyaʼ jma: ․․․․․
¿Xi racalaʼdxeʼ guinabadiidxaʼ bixhozeʼ o jñaaʼ de tema riʼ yaʼ?․․․․․
¿XI RINÍʼ ÍQUELUʼ?
● ¿Xii nga ca cualidad ni jma riuuláʼdxiluʼ de ti xhamíguluʼ? Bisiene xiñee.
● ¿Paraa caquiiñeʼ guni mejorarluʼ para gácaluʼ ti buen amigu?
[Ni caníʼ/Epígrafe]
Gudxi bixhozeʼ ne jñaaʼ naa guixeleʼ de caadxi xhamiguaʼ. Nacubi ga que, qué ninaʼyaʼ ñuneʼ ni purtiʼ guníʼ iqueʼ laasicabe nga ca ni raca llevar bien. Peru guizáʼ galán conseju que purtiʼ bidieeʼ cuenta nuu stale binni ni jma galán gaca xhamiguaʼ.» (Carlos)
[Cuadru]
Xcaadxi cosa ni zanda gúniluʼ
Guniʼné bixhózeluʼ ne jñaaluʼ de tema ca. Gunabadiidxaʼ laacabe ximodo guca ca amigu ni gúpacabe dxi gúcacabe biaʼ lii. ¿Ñee guyuu biaje bicheecabe ra gulícabe ca xhamígucabe la? ¿Xiñee yaʼ? Laaca gunabadiidxaʼ laacabe xi zanda gúniluʼ para cadi gápaluʼ problema.
Bi’ni’ presentar ca xhamíguluʼ bixhózeluʼ ne jñaaluʼ. Pa qué naluʼ gúniluʼ ni la? guníʼ ique xiñee. ¿Ñuu xiixa ni qué ziuuláʼdxicabe de ca xhamíguluʼ la? Pa zacá ni, zándaca caquiiñeʼ guyubi chaahuiluʼ tu gaca xhamíguluʼ.
Bicaadiaga chaahuiʼ ca xhamíguluʼ. Bisihuinni rizaaláʼdxiluʼ gánnaluʼ ximodo nuucabe ne xi riníʼ íquecabe (Filipenses 2:4).
Bieneʼ ne bi’ni’ perdonar laacabe. Cadi cuézaluʼ gaca ca xhamíguluʼ perfectu. Casi ná Santiago 3:2, «guiranu rucheʼnu stale biaje».
Cadi gácaluʼ egoísta. Bidii lugar guidxaagacabe xcaadxi. Pa nácacabe ti buen amigu la? ora jma peʼ caquiiñeluʼ de laacabe ziuucabe para gacanécabe lii (Eclesiastés 4:9, 10).
[Imagen]
Pa gúniluʼ ni ná xcaadxi para si guiaanuʼ bien né laaca la? zeeda gácaluʼ casi ti pión lu juegu de ajedrez ni zanda guniibicabe laa modo nácabe