Tuu nga ca binni bicaa modo bibani Jesús

Biiyaʼ ca hombre cá lu dibuju riʼ. Laacabe nga Mateu, Marcos, Lucas, Juan, Pedru, Santiago, Judas ne Pablu. Guirácabe bibánicabe ca dxi bibani Jesús ne bicaacabe modo bibánibe. Ca historia ne ca carta bicaacabe zeeda cani lu Biblia. Ñuulaʼdxuʼ ñannuʼ jma de ca hombre riʼ la?...

Chonna de ca hombre riʼ nabé guca xhamígucaʼ Jesús ne bicheechenecaʼ laabe diidxaʼ. Laacabe nga apóstol Mateu, Juan ne Pedru. Ñee zanda guluíʼnaluʼ laacabe lu dibuju ca la?... Mateu bicaa ti libru ra guníʼ modo bibani Jesús ne ngaca biʼniʼ Juan. Laaca bicaa Juan libru stiʼ Apocalipsis ne xhonna carta ni láʼ, Primé, Guiropa ne Guionna guiʼchiʼ bicaa Juan. Apóstol Pedru bicaa chupa carta: Primé ne Guiropa guiʼchiʼ bicaa Pedru. Lu guiropa carta que bicaa Pedru ca diidxaʼ binadiaga gudxi Jiobá Jesús dede guibáʼ: «Ndiʼ nga xiiñeʼ. Nabé nadxieeʼ laabe ne guizáʼ rusiéchebe naa».

Xcaadxi hombre cá lu dibuju ca laaca bicaacaʼ modo bibani Jesús. Tobi de laacabe nga Marcos. Zándaca laabe nga bíʼyabe xi guca dxi gunaazecabe Jesús. Stobi de laacabe nga Lucas. Guca hombre riʼ doctor ne zándaca guti si Jesús, gúcabe xpinni Cristu o discípulo stiʼ Jesús.

Chupa de ca biʼchiʼ Jesús, ni jma nahuiiniʼ laaca bicaacaʼ modo bibánibe. Ñee nannuʼ tu laacabe la?... Cácabe lu dibuju ca ne laacabe nga Santiago ne Judas. Ca hombre riʼ qué ñuni crecaʼ Jesús dxi bizulú cusiidiʼ. ¡Dede guníʼ íquecaʼ cayaca íquebe! Peru despué biʼniʼ crecaʼ Jesús ne gúcacaʼ discípulo stibe.

Yanna chiguzéʼtenu de Pablu. Ñee cayuuyuʼ laabe lu dibuju ca la? Saulo nga labe ante gácabe xpinni Cristu. Guizáʼ gucananaláʼdxibe ca xpinni Cristu ne nabé bininabe laacaʼ. Ñuulaʼdxuʼ ñannuʼ ximodo gúcabe discípulo stiʼ Jesús la?... Ti dxi zebe Damasco, málasi binadiágabe caniʼnécabe laabe de guibáʼ. Tuu ngue caniʼné laabe yaʼ. ¡Jesús ngue caniʼné laabe! Ne gunabadiidxaʼ laabe: «Xiñee nabé cayuninaluʼ cani runi cré naa pue». Biiyaʼ Pablu naquiiñeʼ guchaa, ngue runi guca xpinni Cristu. Despué bicaabe 14 libru ni zeeda lu Biblia, ruzulú ni né carta bicaabe ra nuu ca xpinni Cristu ni nuu Roma ne biluxe ni né carta bicaabe ra nuu ca hebreu.

Cadi dxandíʼ riuuláʼdxinu gúʼndanu Biblia guiráʼ dxi la?... Luni zeeda stale historia ni ruzeeteʼ modo bibani Jesús. Cadi dxandíʼ racaláʼdxiluʼ guiziidiluʼ jma de laabe la?...