Nabé nadxibalú guca sobrinu Pablu

Chigüeniáʼ lii historia stiʼ ti hombrehuiiniʼ ni bilá xquendanabani apóstol Pablu. Qué gánnanu tu labe, peru nánnanu sobrinu Pablu laabe. Gúcabe ti hombrehuiiniʼ nabé nadxibalú. Ñuulaʼdxuʼ ñueniáʼ lii xi bíʼnibe la?...

Guidúʼyanu xi bizaaca dxi biseguyoocabe Pablu Jerusalén purtiʼ cayuiʼné binni de Jesús. Guyuu caadxi hombre nabé malu ni guca nanaláʼdxicaʼ Pablu, ngue runi guníʼ stiidxacaʼ gúnicaʼ ti cosa nabé malu. Nuucaʼ checaʼ ra nuu xaíque stiʼ ca soldadu ne gábicaʼ laabe: «Biseendaʼ ca soldadu stiuʼ chinecaʼ Pablu nezalú tribunal». Xi cá íquecabe gúnicabe yaʼ. Gucaachilúcabe neza chitiidiʼ Pablu ne raqué guuticabe laa.

Gunna sobrinu Pablu xi cá íquecabe gúnicabe. Xi bíʼnibe ora gúnnabe ni yaʼ. Yetídxibe xtiube xi chiguni ca hombre que. Óraque gudxi Pablu laabe: «Gucapurá, guyé ra nuu xaíque stiʼ ca soldadu ne gudxi laa xi binadiágaluʼ». Nagana nga ni chigúnibe riʼ, purtiʼ nabé risaca hombre ni naca xaíque stiʼ ca soldadu que. Ñee guniʼné sobrinu Pablu hombre riʼ la?... Guniʼné, laabe gúcabe nadxibalú ne yetídxibe laa guiráʼ ni binadiágabe.

Bicaadiaga chaahuiʼ xaíque stiʼ ca soldadu que sobrinu Pablu. Ngue runi, biseendaʼ Pablu ti guidxi láʼ Cesarea para ganda gulá laabe. Laaca biʼniʼ mandar biaʼ 500 soldadu gapaʼ Pablu guidubi neza. Ne gúdxibe laacaʼ: «Lachiné laabe gueelaʼ riʼ ca». Ñee bilá Pablu la? o biiti ca hombre malu que laa. Lii xi raʼbuʼ... ¡Bilabe! Qué ñanda ñuni ca hombre que ni gudixhe íquecaʼ.

Ñee guyuuláʼdxiluʼ historia riʼ la?... Biiyuʼ pabiáʼ nadxibalú guca sobrinu Pablu la? ¡Lii laaca zanda gácaluʼ nadxibalú cásica laabe! Naquiiñeʼ gácanu nadxibalú para guinínenu binni de Jiobá. Ñee zácaluʼ nadxibalú ne qué zusaana de guiníʼneluʼ binni de Jiobá la?... Nabé risaca nga cadi gusaana de guinínenu binni de Dios. Xiñee yaʼ. Purtiʼ zalá stale binni pa gúninu ni.