Modo cusiidiʼ Reinu ca xpinni: Modo cusiidiʼ Rey stiʼ Dios ca xpinni

GUNÍʼ ique cayuuyaluʼ ti hermanu de neza binni ridagulisaa ra rieluʼ cudii primé libana stiʼ lu ti guendaridagulisaa roʼ ne dede cuxidxihuiiniluʼ ruuyadxiluʼ laabe. Laga cucaadiágaluʼ laabe qué guirá guidxagayaaluʼ modo rusiidiʼ Jiobá xquidxi. Rietenaláʼdxiluʼ guiráʼ stipa bíʼnibe dxi bizulú cudiibe primé libana stibe ne nabé riécheluʼ gúʼyaluʼ modo maʼ biziidibe. Despué de guyebe Scuela stiʼ ca precursor regular gúnnabe gusiidibe jma jneza. Ne cadi xadxí de yenebe xheelabe Scuela para cani rucheeche stiidxaʼ Reinu. Biluxe si libana que, ne laga cagapanaluʼ purtiʼ biaʼsi modo bitiidibe ni, ruuyadxiluʼ guiráʼ binni nuu raqué ne caníʼ íqueluʼ pabiáʼ galán modo rusiidiʼ Dios xquidxi.

Biblia maca bizeeteʼ zedandá ti tiempu zusiidiʼ Jiobá guiráʼ binni nuu ndaaniʼ xquidxi (Is. 54:13). Yanna nga nabáninu tiempu ca. Cadi ca libru ne ca revista si nga riquiiñeʼ Jiobá para gusiidiʼ laanu, sínuque laaca rusiidibe laanu lu guiráʼ guendaridagulisaa ni rápanu ne lu ca scuela ni racané laanu gúninu dxiiñaʼ ricaanu ndaaniʼ xquídxibe. Lu ndaa riʼ zadúʼyanu ximodo rusihuinni guiráʼ scuela riʼ maʼ cayuni mandar Reinu stiʼ Dios ca dxi stinu riʼ.