NDAA 9
Biʼniʼ adorar Jiobá né familia stiuʼ
«Lausisaca ni bizáʼ ibáʼ ne guidxilayú.» (Apocalipsis 14:7)
Casi maʼ biiyuʼ lu folletu riʼ, lu Biblia zeeda stale principiu ni zacané lii ne ni zacané familia stiuʼ. Racalaʼdxiʼ Jiobá chuʼtu nayecheʼ. Laaca cudii stiidxabe «qué ziaadxaʼ laatu xcaadxi cosa ni caquiiñetu» pa jma guisaca para laatu guni adorartu laabe (Mateo 6:33). Dios racalaʼdxiʼ gaca xhamigu lii. Nga runi, biyubi modo chuʼluʼ gaxha de laabe, purtiʼ nga nga ni jma risaca qué intiica cosa (Mateo 22:37, 38).
1 BIʼNIʼ STIPA CHUʼLUʼ JMA GAXHA DE JIOBÁ
NI RUSIIDIʼ BIBLIA: «[Naa] gaca Bixhoze tu, ne laatu gaca tu xiiñeʼ. Zacá na [Jiobá]» (2 Corintios 6:18). Nuu Dios gácaluʼ ti binni ni jma xhamigu, ne ti modo zanda guidxíñaluʼ laabe nga guni orarluʼ. Ne cayuni invitar Jiobá laanu cadi guiaanadxinu de guni orarnu laa (1 Tesalonicenses 5:17). Laaca riuuláʼdxibe güineuʼ laabe ca cosa ni riguu xizaa lii ne gaʼbuʼ laabe xi guiráʼ caníʼ íqueluʼ (Filipenses 4:6). Pa guni orarneuʼ familia stiuʼ, zudiicaʼ cuenta ruuyuʼ Dios casi ti binni nabani.
Peru cadi caquiiñeʼ si guiniʼneuʼ Dios, laaca naquiiñeʼ gucaadiaʼguʼ laa. Ximodo zanda guʼnuʼ nga yaʼ. Ra guni estudiarluʼ Stiidxabe ne guiráʼ guiʼchiʼ zeeda de laani (Salmo 1:1, 2). Guníʼ ique chaahuiʼ lu ni caziiduʼ (Salmo 77:11, 12). Laaca nabé risaca cheuʼ guiráʼ guendaridagulisaa rapa ca xpinni Cristu ti gucaadiaʼguʼ Dios (Hebreos 10:24, 25).
Sti modo chuʼluʼ jma gaxha de Jiobá nga güíneluʼ sti binni de laabe. Ne ra jma guʼnuʼ ni, jma zaca xhamíguluʼ laabe (Mateo 28:19, 20).
NI ZANDA GUʼNUʼ:
Gulee tiempu guni orarluʼ ne gúʼndaluʼ Biblia guiráʼ dxi
Gucané familia stiuʼ gúʼyacaʼ jma risaca gúnicaʼ xhiiñaʼ Jiobá que guiziiláʼdxicaʼ o quítecaʼ xiixa
2 GUYUU NAYECHEʼ ORA GUNI ADORARLUʼ DIOS NÉ BINNILIʼDXUʼ
NI RUSIIDIʼ BIBLIA: «Laidxiña gaxha de Dios, ne laa zadxiña gaxha de laatu» (Santiago 4:8). Gudixhe ti dxi ne ti hora para guni adorarluʼ Dios né binniliʼdxuʼ ne cadi gusaana de guʼnuʼ ni guiráʼ semana (Génesis 18:19). Peru cadi nga si: guníʼ de Dios guiráʼ dxi ne gucané binniliʼdxuʼ chuʼ jma gaxha de laabe. Biblia na: «Naquiiñeʼ [...] [guiniuʼ de Jiobá] ora maʼ nuutu ralídxitu, ne ora maʼ zetu paxaraa ne ora gátatu ne ora guiásatu» (Deuteronomio 6:6, 7). Gudixhe ique guʼnuʼ casi biʼniʼ Josué, laa guníʼ: «Naa ne ca binnilidxeʼ la? zúnidu ni na Jiobá» (Josué 24:15).
NI ZANDA GUʼNUʼ:
Guníʼ ique xi caquiiñeʼ cada tobi de ca binniliʼdxuʼ ora guʼnuʼ ti programa ra gucaaluʼ xi gusiiduʼ laacaʼ guiráʼ semana