Gucaxiiñiʼ María neca caʼruʼ guichaganáʼ

Maʼ ziné María tapa beeu de nacaxiiñiʼ. Casi maʼ bizíʼdinu, ca primé beeu nacaxiiñibe guyuube ra lidxi Elisabet, laa nabeza ladu gueteʼ de ca dani stiʼ Judea. Peru yanna maʼ nuu María Nazaret sti biaje ne maʼ cadi candaa zudii binni cuenta nacaxiiñibe. ¡Nanna pabiáʼ nuu María xizaa yaʼ!

Sti cosa ni guizáʼ naguu xizaa María nga nuu comprometida para guichaganáʼ ti carpinteru láʼ José. Nanna María Ley stiʼ Dios ná, pa gapa ti gunaa ni nuu comprometida relación sexual né sti hombre, naquiiñeʼ guchácabe laa guié dede gatiʼ (Deuteronomio 22:23, 24). Nga runi, neca qué huayapa María relación sexual né sti hombre, zándaca caníʼ íquebe ximodo gábibe José nacaxiiñibe ne xi zazaaca ora gábibe ni laa.

Guizáʼ rapa José gana guʼyaʼ María, purtiʼ raca chonna beeu qué huayuuyabe laa. Ora bedandá dxi bíʼyacabe, bisiene María José gucaxiiñiʼ pur espíritu santu. Neca zacá, zanda guiníʼ íquenu pabiáʼ nagana guca para José guni cré ni gudxi María laa.

Nanna José naca María ti gunaa ni runi respetar binni laa ne riníʼcabe bien de laa. Ne laaca guizáʼ nadxiibe María. Peru neca cusiene María laabe ximodo beeda gacaxiiñiʼ qué ganda guni crebe laa, caníʼ iquerube gupa María relación sexual né sti hombre nga runi gucaxiiñiʼ. Peru qué racalaʼdxiʼ José guchácabe guié María dede gatiʼ ninca qué racalaʼdxiʼ gusituí lube nezalú binni. Ngue runi gudixhe ique José gaca divorciar de laabe nagaʼchiʼ. Tiempu que, ca binni ni nuu comprometidu, biiyaʼ binni laacaʼ casi ora maʼ bichaganacaʼ. Para ganda guixiá compromisu que, naquiiñeʼ gaca divorciarcaʼ.

Despué, laga caníʼ ique José de ni gudxi María laa, gucuá bacaandaʼ laa. Ne lu bacaandaʼ que guniʼné ti ángel laa, ne ná: «Cadi guidxíbiluʼ chineluʼ María, xheelaluʼ, ra lídxiluʼ, purtiʼ nacaxiiñibe pur espíritu santu. Zápabe ti hombrehuiiniʼ, ne napa xidé cueelaluʼ laa Jesús, purtiʼ laa nga chigulá xquidxi de ca pecadu stiʼ» (Mateo 1:20, 21).

Ora bibani José, gutadxí ladxidóʼ purtiʼ maʼ biene xii ngue cazaaca. Oraqueca bíʼnibe ni gudxi ángel que laabe ne yenebe María ra lídxibe. Ni bíʼnibe riʼ bisihuinni ni maʼ xheelabe María, nga runi, nezalú binni maʼ bichaganácabe. Neca maʼ xheelabe María qué ñapanebe laa relación sexual laga nacaxiiñiʼ.

Gudiʼdiʼ si chupa chonna beeu, gupa xidé biree José ne María de Nazaret, bisaanacaʼ lídxicaʼ ne zecaʼ ti lugar zitu. Peru ¿paraa ndiʼ zécabe pa mayaca gapa María xiiñiʼ yaʼ?