Huaxhinni Guyé Nicodemo Ra Nuu Jesús

Dxi nuu Jesús Jerusalén para guni celebrar Pascua lu iza 30, biʼniʼ stale milagru ni bidxagayaa binni. Ne pur ngue, stale binni bizulú biʼniʼ cré laabe. Nicodemo, ti fariseu ne ni naca tobi de ca judíu ni nuu lu Sanedrín, cadxagayaa guiráʼ ni cayuni Jesús. Cumu racaláʼdxibe gánnabe jma de Jesús la? yegánnabe laa ti dxi, guyebe huaxhinni, zándaca purtiʼ cadxíbibe guʼyaʼ xcaadxi xaíque stiʼ ca judíu que laabe ne guiniʼcaʼ mal de laabe.

Gudxi Nicodemo Jesús: «Rabí, nánnadu lii nga maestru biseendaʼ Dios, purtiʼ guirútiruʼ zanda guni ca milagru ni rúniluʼ pa cadi nuuné Dios laa». Óraque bisiene Jesús laabe para ganda chuʼ tuuxa lu Reinu stiʼ Dios naquiiñeʼ gale sti biaje (Juan 3:2, 3).

Para ná Nicodemo rabi laabe: «¿Ximodo ndiʼ gale tuuxa sti biaje ora maʼ bioʼxhoʼ yaʼ? ¿Zándaxa chuʼbe ndaaniʼ jñaabe ne gálebe sti biaje?» (Juan 3:4).

Coʼ xa. Cadi nga diʼ nga gale binni sti biaje. Para bisiene Jesús laabe xi riníʼ ca diidxaʼ que: «Tu qué gale de nisa ne de espíritu, qué zanda chuʼ lu Reinu stiʼ Dios» (Juan 3:5). Dxi guyuunisa Jesús ne biete espíritu santu luguiáʼ, zaqué nga gule «de nisa ne de espíritu». Ne gucuá ti ridxi de guibáʼ: «Ndiʼ nga Xiiñeʼ ni nadxieeʼ; ni rusiecheʼ naa» (Mateo 3:16, 17). Bisihuinni ca diidxaʼ riʼ beeda gaca Jesús Xiiñiʼ Dios ni gulí né espíritu santu para ganda chuʼ lu Reinu stiʼ Dios ni nuu guibáʼ. Despué, lu Pentecostés de iza 33, zusaba Dios espíritu santu luguiáʼ ti grupu de xpinni Cristu ni maʼ guyuunisa. Zacá, zálecaʼ sti biaje o zeeda gácacaʼ xiiñiʼ Dios ni gulí né espíritu santu (Hechos 2:1-4).

Cayaca nagana para Nicodemo guiene ni cusiidiʼ Jesús laa de Reinu stiʼ Dios. Nga runi, gudxi Jesús laabe xcaadxi cosa para gusiene laabe xi dxiiñaʼ zeeda guni lu Guidxilayú casi Xiiñiʼ Dios. Ná rabi laabe: «Ne cásica gundisaʼ Moisés beendaʼ que lu desiertu, zacaca ziasa Xiiñiʼ Hombre, ti guiráʼ tu guni cré laabe guicaa guendanabani ni qué zaluxe» (Juan 3:14, 15).

Gayuaa iza ante, dxi biquiichiʼ caadxi beendaʼ malu caadxi israelita, gudxi Moisés laacaʼ naquiiñeʼ guuyadxicaʼ beendaʼ de cobre ni biʼniʼ que para cadi gáticaʼ (Números 21:9). Zacaca nga guiráʼ ni gacalaʼdxiʼ guilá de pecadu ne guendaguti ne gapa guendanabani ni qué zaluxe, naquiiñeʼ gusihuínnicaʼ nápacaʼ fe Xiiñiʼ Dios. Despué, bisiene Jesús Nicodemo xi dxiiñaʼ risaca napa Jehová lu ni chiguni riʼ: «Purtiʼ nabé gunnaxhii Dios guidxilayú, nga runi bidii tobi lucha Xiiñiʼ, ti guiráʼ tu gapa fe Xiiñibe cadi guinitilú, sínuque guicaa guendanabani ni qué zaluxe» (Juan 3:16). Xhoopaʼ beeu despué de bizulú Jesús dxiiñaʼ stiʼ ndaaniʼ guidxi Jerusalén, bisihuinni laa nga neza ni zacané binni ganda guilá.

Óraque, gúdxibe Nicodemo: «Purtiʼ biseendaʼ Dios Xiiñiʼ ndaaniʼ guidxilayú, cadi para guni juzgar guidxilayú». Nga riníʼ, cadi beeda Jesús lu Guidxilayú para guni condenar binni, sínuque para «guilá guidxilayú pur laabe» (Juan 3:17).

Guyé Nicodemo yeguuya Jesús huaxhinni purtiʼ cadxibi guiníʼcabe mal de laa, nga runi nabé risaca ca diidxaʼ ni gudxi Jesús laabe: «Ndiʼ nga base stiʼ juiciu: beeda biaaniʼ [biaaniʼ riʼ nga Jesús, né xquendanabani, ne ni bisiidiʼ] lu guidxilayú, peru lugar de ñannaxhii binni biaaniʼ que, laga gunnaxhiicaʼ guelacahui, purtiʼ rúnicaʼ cosa malu. Purtiʼ guiráʼ ni runi cosa malu la? nanalaʼdxiʼ biaaniʼ ne qué riuu lu biaaniʼ ti qué guihuinni xi cayuni. Peru ni runi ni jneza la? riuu lu biaaniʼ ti guihuinni runi ca cosa ni riuulaʼdxiʼ Dios» (Juan 3:19-21).

Despué de biziidiʼ fariseu ne maestru de Israel riʼ xi dxiiñaʼ chiguni Jesús para gaca cumplir ni maʼ gudixhe ique Dios guni, caquiiñeʼ guiníʼ ique chaahuiʼ ca diidxaʼ gudxi Jesús laa.