Biá Jesús ti leproso ne bisiándabe laa

Zeʼ Jesús «guidubi Galilea, cayuni predicar ndaaniʼ ca sinagoga» né guidapaʼ discípulo stiʼ, ne cayunadiaga binni de guiráʼ ladu ca milagru cayúnibe (Marcos 1:39). Dede yendácabe ndaaniʼ ti guidxi ra nabeza ti hombre ni napa lepra. Despué bicaa doctor Lucas «naze lepra» ladi hombre que (Lucas 5:12). Ora jma maʼ guca xiroo guendahuará riʼ, runi feu ni caadxi parte de ladi binni.

Nabé huará hombre que ne caquiiñeʼ cuézabe zitu de binni. Ne para cadi guidxiña xhaataʼ tuuxa laabe ne guicá guendahuará que laa, Ley que ná naquiiñeʼ gucaa binni huará que ridxi ne guiníʼ huará (Levítico 13:45, 46). Peru ¿xi biʼniʼ hombre napa lepra que ora biʼyaʼ Jesús yaʼ? Bidxíñabe ne bizuxíbibe nezalú ne gunábabe laa: «Señor, nannaʼ zanda gusiándaluʼ naa pa gacaláʼdxiluʼ» (Mateo 8:2).

¡Guizáʼ naroʼbaʼ fe napa hombre riʼ Jesús! ¡Nanna pabiáʼ biá Jesús laabe yaʼ! Pur modo nuu hombre riʼ, ¿xi biʼniʼ Jesús? ¿Xi ñúniluʼ lii? Guizáʼ biá Jesús laabe ne bisigaanáʼ, gudaʼnaʼ hombre que ne gudxi laabe: «Racalaʼdxeʼ pue. Bianda» (Mateo 8:3). Neca nagana guni cré binni ni, peru oraqueca bianda hombre riʼ.

¿Cadi dxandíʼ ñuuláʼdxiluʼ ñápaluʼ ti rey ni riá binni ne napa stale poder la? Pur modo biá Jesús hombre ni huará que, zanda chuʼnu seguru ora guni mandarbe lu Guidxilayú zaca cumplir promesa riʼ: «Ziabe ca binni humilde ne ca pobre. Ne zulabe xpida ca binni pobre» (Salmo 72:13). Zacá ni, ora guni mandar Jesús, zacané guiráʼ binni cayacaná, purtiʼ dxandíʼ peʼ racaláʼdxibe gúnibe ni.

Casi maʼ bidúʼyanu, maca nuu binni ganna de dxiiñaʼ cayuni Jesús, ante gúnibe milagru riʼ. Yanna maʼ zánnacabe bisianda Jesús ti hombre napa lepra. Peru qué racalaʼdxiʼ Jesús guni cré binni laa pur ni cayunadiágasicaʼ. Nanna Jesús ná ti profecía qué zucaa ridxi lu calle para gusisaca binni laa (Isaías 42:1, 2). Ngue runi, gúdxibe hombre ni bisiándabe que: «Biiyaʼ qué chitídxiluʼ ni guirutiʼ. Peru guyé guʼyaʼ sacerdote lii ne bidii ofrenda ni cá lu ley stiʼ Moisés» (Mateo 8:4).

Cumu guizáʼ cayecheʼ hombre que purtiʼ bisianda Jesús laa la? guníʼ ni bizaaca que. Gúdxibe binni bisianda Jesús laabe, cumu gunna binni xi biʼniʼ Jesús, ngue runi, jmaruʼ si nuucaʼ gánnacaʼ de Jesús. Pur nga, maʼ qué randa riuu Jesús ndaaniʼ guidxi sin chuʼ tu guyubi laa, ngue runi biaana Jesús ti tiempu ca lugar ra cadi nabeza binni. Neca zaqué, beeda binni de guiráʼ ladu para gucaadiágacaʼ laabe ne gusiándabe laacaʼ.