Gulí Jesús ca 12 apóstol stiʼ

Maʼ gudiʼdiʼ ti iza arondaʼ de dxi guníʼ Juan Bautista naca Jesús Dendxuhuiiniʼ stiʼ Dios. Ora bizulú Jesús biʼniʼ xhiiñaʼ Dios nezalú stale binni, guca caadxi hombre discípulo stibe. Ládecabe nuu Andrés, Simón Pedro, Juan, zándaca ne Santiago (biʼchiʼ Juan), Felipe ne Bartolomé (ni laaca láʼ Natanael). Ne ra gudiʼdiʼ dxi, guyuuruʼ stale binni yenanda Jesús (Juan 1:45-47).

Yanna, maʼ bedandá hora cuíʼ Jesús ca apóstol stiʼ, zuniné ca hombre riʼ laabe dxiiñaʼ tobi si ne guizáʼ zusiidiʼ Jesús laacaʼ. Peru ante cuíʼ Jesús ca hombre riʼ, gudxiʼbaʼ lu ti dani, zándaca tobi de ca ni nuu gaxha de nisadóʼ stiʼ Galilea, gaxha de Capernaúm. Guidubi gueelaʼ biʼniʼ orarbe Bixhózebe, zándaca para guinábabe sabiduría ne ndaayaʼ. Birá si gueelaʼ, biseendacaabe ca discípulo stibe ne gulibe 12 lade guiracaʼ para gácacaʼ apóstol stibe.

Gulí Jesús xhoopaʼ ni maca bizéʼtenu que ne Mateo, ni runi cobrar impuestu. Xcaayuʼ ni riaadxa guzéʼtenu nga Judas (ni laaca runibiáʼcabe casi Tadeo o «xiiñiʼ Santiago»), Simón Cananita que, Tomás, Santiago xiiñiʼ Alfeo ne Judas Iscariote (Lucas 6:16; Mateo 10:2-4).

Maʼ ziné 12 hombre riʼ tiempu de zinándacaʼ Jesús, nga runi maʼ runibiáʼ chaahuiʼ Jesús laacabe. Nuu de laacaʼ nácacaʼ pariente stiʼ Jesús. Zándaca xprimu Jesús Santiago ne Juan. Ne pa dxandíʼ, casi ná binni, biʼchiʼ Alfeo nga José, bixhoze Jesús, nga runi Santiago xiiñiʼ Alfeo, zeeda gaca xprimu Jesús.

Nánnanu biziidiʼ Jesús lá ca hombre riʼ. ¿Lii yaʼ? ¿Ñee nánnaluʼ lá ca 12 apóstol riʼ la? Xiixa ni zanda gacané lii nga, gánnaluʼ chupa de laacabe láʼ Simón, chupa láʼ Santiago ne chupa láʼ Judas. Caadxi de ca apóstol que nápacaʼ bíʼchicaʼ: Simón Pedro ne Andrés, Santiago xiiñiʼ Zebedeo ne Juan. Ra maʼ biziidiluʼ ndiʼ la? yanna huaxa maʼ zietenaláʼdxiluʼ lá xhono apóstol que. Xtapa apóstol ni riaadxaʼ guzéʼtenu nga Mateo, ni runi cobrar impuestu; Tomás, ni biʼniʼ dudar despué; Natanael, ni bicaa ridxi Jesús xaʼnaʼ ti yaga, ne Felipe, ti xhamigu Natanael.

De Galilea 11 de laacabe, región ra biniisi Jesús. Naca Natanael de guidxi Caná. Felipe, Pedro ne Andrés nácacaʼ de Betsaida, neca gudiʼdiʼ si tiempu yendeza xhupa últimu riʼ Capernaúm, zándaca laaca nabeza Mateo guidxi riʼ. Santiago ne Juan laaca nabézacaʼ Capernaúm o gaxha de raqué, ne nápacaʼ ti negocio de benda zona que. Ne Judas Iscariote, ni biʼniʼ traicionar Jesús despué, laasi naca apóstol de Judea.