Bisiidibe laga zebe Jerusalén

Maʼ ziné Jesús ti tiempu de cayuni xhiiñaʼ Dios lu región stiʼ Galilea, ne nabé rucaadiaga binni laabe raqué, jma que Judea. Casi dxi bisiándabe ti hombre dxi sábadu ndaaniʼ guidxi Jerusalén, biraruʼ ni biʼniʼ ca judíu para ñuuticaʼ laabe (Juan 5:18; 7:1).

Zándaca beeu septiembre o beeu octubre de iza 32 ndiʼ, ne mayaca gaca Saa stiʼ ca Tabernáculo (o stiʼ ca Cabaña). Raca saa que purtiʼ lu ca beeu ca nga riluxe temporada riasa cosecha ndaaniʼ guidxi Israel ne nabé riuucabe nayecheʼ ca dxi que ne rudiicabe xquixe peʼ Dios. Rindaa Saa que gadxe gubidxa, ne ra guizaa xhono gubidxa que la? raca reunir stale binni purtiʼ nácani ti dxi risaca.

Ca biʼchiʼ Jesús ni láʼ Santiago, Simón, José ne Judas, gúdxicaʼ laabe: «Biree de raríʼ ne guyé Judea». Jerusalén nga ra runi adorar ca binni de Israel Dios ne pur nga guizáʼ stale binni rié raqué ora raca guionnaʼ saa ni raca guiráʼ iza. Gudxi ca biʼchiʼ Jesús laa: «Guirutiʼ runi xiixa nagaʼchiʼ pa racalaʼdxiʼ gunibiáʼ binni laa. Pa rúniluʼ ca cosa riʼ, biʼniʼ ni nezalú binni» (Juan 7:3, 4).

Qué runi cré ca biʼchiʼ Jesús pa laa nga Mesías. Neca zacá, racaláʼdxicabe guʼyaʼ ca binni ni cheʼ saa que guni Jesús milagru. Peru cumu nanna Jesús xi guendanagana zadxaagalú, gudxi laacabe: «Qué gapa diʼ binni razón para gaca nanalaʼdxiʼ laatu, peru nanaláʼdxicabe naa purtiʼ rinieeʼ qué iquiiñeʼ ca cosa ni rúnicabe. Laché saa ca. Despué ndaʼ chaaʼ saa ca, purtiʼ caʼruʼ guedandá hora stinneʼ» (Juan 7:5-8).

Chupa chonna gubidxa despué de zeʼ ca biʼchiʼ Jesús né xcaadxi binni Jerusalén. Nagaʼchiʼ biree Jesús ne ca discípulo stiʼ zecaʼ. Gucuaacaʼ ti neza jma nachucu, neza riécabe Samaria, lugar de ñécabe neza ni cá cueʼ guiiguʼ Jordán neza maca biaa binni cheʼ. Naquiiñeʼ guiaanacabe Samaria, ngue runi biseendaʼ Jesús chupa mensajeru para guyúbicaʼ ra guiaanacabe. Peru cadi galán modo bidxaagalú ca binni de ti guidxihuiiniʼ ni nuu Samaria laacabe, purtiʼ nánnacaʼ zeʼ Jesús Jerusalén para guni celebrar saa stiʼ ca judíu. Guizáʼ bidxiichi Santiago ne Juan, pur ngue gunabadiidxacaʼ Jesús: «Señor, ¿racaláʼdxiluʼ guinidu guiaba guí de guibáʼ ne gunitilú laacabe la?» (Lucas 9:54). Peru gudindené Jesús laacabe pur ni guníʼcabe, ne bireecabe zécabe.

Laga zécabe neza, gudxi ti escriba Jesús: «Maestru, zinandaʼ lii ra tiica cheluʼ». Peru bicabi Jesús laabe: «Napa ca zorro cueva ne napa ca pájaru lídxicaʼ, peru Xiiñiʼ Hombre qué gapa nin ra quixhe ique» (Mateo 8:19, 20). Né ca diidxaʼ riʼ gúdxibe escriba que zadxaagalú guendanagana pa gaca discípulo stibe. Peru ruluíʼ qué zaná hombre riʼ guibani casi nabani ca discípulo stiʼ Jesús purtiʼ nabé orgulloso laa. ¿Laanu yaʼ? ¿Xi nuunu dispuestu gúninu para chinándanu Jesús?

Despué, gudxi Jesús sti hombre: «Dananda naa». Para ná hombre que: «Señor, primeru bidii lugar naa chaaʼ chigucaacheʼ bixhozeʼ». Cumu nanna Jesús modo nabani hombre que, bidiibe conseju riʼ laa: «Bidii lugar gucaachiʼ ca gueʼtuʼ ca gueʼtuʼ sticaʼ. Peru lii la? guyé, ne guníʼ de Reinu stiʼ Dios guiráʼ ladu» (Lucas 9:59, 60). Rihuinni dxichi nabániruʼ bixhoze hombre que. Pa ñaca casi guti bixhoze hombre que, qué ñuudibe raqué para niníʼnebe Jesús. Rihuinni ca cadi nuu diʼ hombre riʼ listu para quixheʼ Reinu stiʼ Dios primé lu xquendanabani.

Laga zécabe neza Jerusalén, gudxi sti hombre Jesús: «Zinandaʼ lii, Señor, peru primeru bidii lugar naa chigacaʼ despedir de familia stinneʼ». Para bicabi Jesús laabe: «Ni quixhenáʼ lu aradu ne guyadxí ca cosa ni bisaana atrá la? qué zaquiiñeʼ para Reinu stiʼ Dios» (Lucas 9:61, 62).

Ca ni dxandíʼ racalaʼdxiʼ gaca discípulo stiʼ Jesús, caquiiñeʼ gúnicaʼ xhiiñaʼ Reinu primé lu xquendanabánicaʼ. Ti binni ni rucaa surcu, siempre naquiiñeʼ guyadxí delante pacaa qué zaree surcu stiʼ derechu. Ne pa gusaanagabe aradu ca para gúʼyadxibe atrá, qué zalúxebe xhiiñabe. Zacaca nga rizaaca ca binni ni ricá ique ca cosa stiʼ guidxilayú ni bisaana atrá, zándaca gucheecabe ne guireecabe lu neza ni ziné lu ti guendanabani ni qué zaluxe.