NDAA 5
Laguibiguetaʼ ra nuu «Pastor stitu ni cayapa xhialma tu»
Ñee cadíʼdiluʼ lu tobi de ca guendanagana ni bizéʼtenu lu folletu riʼ la? Pa zacá ni, gunna cadi lii si nga cadíʼdiluʼ lu cani, purtiʼ stale xpinni Dios ni bibani dxiqué ne ni nabani yanna huadxagalucaʼ guendanagana ni cadíʼdiluʼ. Ne cásica gucané Jiobá laacabe, laaca zanda gacanebe lii para gudxiiluluʼ cani.
Zuluíʼ Jiobá lii neza guibiguétaluʼ
ZULUÍʼ Jiobá lii neza guibiguétaluʼ ra nuu. Laabe zacanebe lii gudxiiluluʼ cani riguu xizaa lii, guni sentirluʼ galán neca bininácabe ladxidoʼloʼ ne cadi guchiiñaʼ xquendabiaaniluʼ lii. Ora maʼ gucané Jiobá lii la? ziuuláʼdxiluʼ gúniluʼ ni nabe stiʼ biaje né ca binni ridagulisaa. Zeeda gácaluʼ casi ca xpinni Cristu ni bibani lu primé siglu, ni gudxi apóstol Pedru: «Chiqué bireeche ndase tu casi dendxu ni cananiti, peru yanna ma bigueta tu ra nuu Cristu. Laa nga Pastor stitu ni cayapa xhialma tu» (1 Pedro 2:25).
Gástiruʼ sti cosa jma galán que gaca xhamíguluʼ Jiobá sti biaje. Xiñee yaʼ. Purtiʼ guizáʼ zusiécheluʼ laabe (Proverbios 27:11). Lii nannuʼ pur cani gúninu zanda gusiéchenu Jiobá o guninanu ladxidóʼ. Peru qué rucaabe laanu gannaxhiinu laabe ne gúninu ni nabe (Deuteronomio 30:19, 20). Sicaríʼ guníʼ ti hombre ni rusiene de Biblia: «Guirutiʼ zanda guxheleʼ ladxidoʼloʼ, liisiouʼ zanda guʼnuʼ ni». Ora rúninu ni na Jiobá de guidubi ladxidoʼno la? casi ñaca nuxhélenu ladxidoʼno nezalube. Ne nabé rusiecheʼ nga laabe, purtiʼ ora ruzúʼbanu stiidxabe zeeda gácani casi ora nusigáʼdenu laabe xiixa. Gástiruʼ sti cosa ni zusiecheʼ laanu que guni adorarnu Jiobá casi riuulaʼdxiʼ (Hechos 20:35; Apocalipsis 4:11).
Ne ora guibiguétaluʼ zudii Dios lii guiráʼ ni caquiiñeluʼ para chuʼluʼ gaxha de laa (Mateo 5:3). Ca dxi riʼ stale binni qué guidxela tu guicabi laa caadxi guendarinabadiidxaʼ nabé risaca, casi xiñee nuunu lu Guidxilayú. Maca bizáʼ Jiobá laanu para chuuláʼdxinu chuʼnu gaxha de laa ne nánnabe ngasi nga ni rusiecheʼ laanu. Nga runi, gástiruʼ sti cosa ni zusiecheʼ lii que gusihuínniluʼ nadxiiluʼ Jiobá ora guni adorarluʼ laa (Salmo 63:1-5).
Racalaʼdxiʼ Jiobá guibiguétaluʼ ndaaniʼ xquidxi sti biaje. Ne ngapeʼ nga ni rusihuinni folletu ni naazeluʼ riʼ. Gucané Jiobá para guca dxiiñaʼ riʼ para lii. Zándaca ti binnigola o sti xpinni Cristu bidiini lii ne gudixhe íqueluʼ gúʼndaluʼ ni. Ni biindaluʼ riʼ yendani ndaaniʼ ladxidoʼloʼ. Guiráʼ ndiʼ rusihuinni caʼruʼ gusiaandaʼ Jiobá lii ne zuxeleʼ ndaga nabe cabézabe lii (Juan 6:44).
Nabé ratadxí ladxidoʼno gánnanu qué rusiaandaʼ Jiobá ca dendxuʼ stiʼ ni biniti. Ngapeʼ nga ni biziidiʼ ti gunaa xpinni Cristu láʼ Donna. Laabe guniʼbe: «Chaahuidugá bixeleʼ de xquidxi Dios, peru gatigá guníʼ iqueʼ ca diidxaʼ ni zeeda lu Salmo 139:23, 24, ra na: “Dios, biiyaʼ chaahuiʼ guidubi nacaʼ, ne biiyaʼ xi nuu ndaaniʼ ladxiduáʼ. Biiyaʼ chaahuiʼ naa, biiyaʼ chaahuiʼ xi ruchiiñaʼ xquendabiaaneʼ, biiyaʼ pa canazayaʼ lu ti neza ra zacanaʼyaʼ, ne biluíʼ naa ximodo sayaʼ lu neza ni qué zaluxe”. Guidxilayú stiʼ Binidxabaʼ cadi para naa diʼ ni; qué ñuu dxi ñuneʼ sentir galán dxi guyuaaʼ lu ni. Nannaʼ ra naquiiñeʼ chuaaʼ nga ndaaniʼ xquidxi Dios. Bidieeʼ cuenta qué ñuu dxi nusaana Jiobá naa, ni caquiiñesiáʼ nga guibiguetaʼ lu neza ra biree que. ¡Riecheʼ stale pur maʼ bibiguetaʼ!».
«Bidieeʼ cuenta qué ñuu dxi nusaana Jiobá naa, ni caquiiñesiáʼ nga guibiguetaʼ lu neza ra biree que»
Runi orardu pur lii ti ganda gápaluʼ «guendanayecheʼ ni rudii Jiobá» lu xquendanabániluʼ (Nehemías 8:10). Qué ziuu dxi gaca arrepentirluʼ pa guibiguétaluʼ ra nuu Jiobá sti biaje.