Bizáʼ Dios primé hombre ne primé gunaa

Guyuu ti lugar ni láʼ Edén ne biʼniʼ Jiobá ti jardín raqué. Nuu guiráʼ clase guieʼ, yaga ne maniʼ ndaaniʼ jardín riʼ. De raqué bizáʼ Dios primé hombre, Adán. Bizáʼ Dios laabe de yú ne bindubi ra xiibe. ¿Nánnaluʼ xi guca óraque la? ¡Bizulú bibani hombre riʼ! Gudxi Jiobá Adán gapa jardín riʼ ne quixhe lá guiráʼ ca maniʼ que.

Bidii Jiobá ti mandatu nabé risaca Adán. Gúdxibe laa: «Zanda goloʼ cuananaxhi stiʼ guiráʼ yaga, tobi si coʼ, purtiʼ nabé especial ni. Pa goloʼ cuananaxhi stini la? zátiluʼ».

Despué guníʼ Jiobá sicaríʼ: «Chiguneʼ ti gunaa ni gacané Adán». Bisisiaasiʼ Jiobá Adán, óraque gulee ti xcustiá Adán para bizáʼ xheelabe. Biree lá gunaa riʼ, Eva. Adán ne Eva nga primé familia ni guyuu. ¿Xi biʼniʼ sentir Adán ora biʼyaʼ xheelaʼ yaʼ? De tantu cayecheʼ guníʼ: «¡Biaaʼ ni maʼ bizáʼ Jiobá né tobi de ca custiá stinneʼ! ¡Yanna huaxa maʼ nuu tuuxa casi naa!».

Gudxi Jiobá Adán ne Eva gápacaʼ stale xiiñicaʼ ne guchacaʼ Guidxilayú. Ni gucaláʼdxibe nga nibánicaʼ nayecheʼ, ñuucaʼ tobi si ne ñúnicaʼ Guidxilayú riʼ ti paraísu. Ñaca ni ti lugar sicarú cásica jardín de Edén que. Peru maʼ qué ñaca ni zaqué. ¿Xiñee yaʼ? Zadúʼyanu ni lu sti capítulo ca.