Ti líder nacubi ne chupa gunaa ni gupa valor

Stale iza biʼniʼ guiar Josué xquidxi Jiobá ne gútibe dxi nápabe ti gayuaa chii iza. Biʼniʼ adorar ca israelita que Jiobá dxi nabániruʼ Josué. Peru dxi maʼ gútibe bizulú biʼniʼ adorarcaʼ bidóʼ casi runi ca binni de Canaán. Cumu qué nuzuubaʼ ca israelita que stiidxaʼ Jiobá, bidiibe lugar guniná Jabín rey stiʼ Canaán laacaʼ. Guidxi que gunabaʼ Jiobá gacané laa. Ngue runi bidii Jiobá laacabe sti líder ni biree lá Barac. Hombre riʼ zacané guidxi riʼ guni adorar Jiobá sti biaje.

Biseendacaa ti gunaa profetisa láʼ Débora, Barac, para gábibe laa xiná Jiobá: «Guyé ra nuu arroyo stiʼ Cisón yené chii mil hombre para tindenetu ejércitu stiʼ Jabín. Raqué zuni ganarluʼ Sísara, jefe stiʼ ejércitu ca». Para ná Barac rabi Débora: «Ziaaʼ, peru pa zineluʼ naa». Óraque ná Débora rabi laabe: «Ziniaaʼ lii, peru gabeʼ caʼ lii cadi lii diʼ guutiluʼ Sísara. Maʼ guníʼ Jiobá ti gunaa guuti laabe».

Gudxiʼbaʼ Débora, Barac ne ejércitu stiʼ lu dani Tabor para chuʼcaʼ listu para tíndecaʼ. Ora gunna Sísara ni, bichiña guiráʼ carru de guerra ne ejércitu stiʼ ndaaniʼ valle que. Gudxi Débora Barac: «Yannadxí zacané Jiobá lii guni ganarluʼ». Ngue runi biete Barac ne chii mil hombre de lu dani que para gucaalucaʼ ejércitu nadipaʼ stiʼ Sísara.

Despué, biʼniʼ Jiobá guiree nisa stiʼ arroyo stiʼ Cisón ne biaana ca carru de guerra stiʼ Sísara ndaaniʼ beñe. Biete Sísara de lu carru stiʼ ne ziguxooñeʼ. Barac ne ca soldadu stiʼ biʼniʼ ganarcaʼ ejércitu stiʼ Sísara, peru Sísara bixooñeʼ ne bicaachilú ra nabeza ti gunaa láʼ Jael. Bidii Jael laabe caadxi leche ne bichenda laabe ti lari. Cumu maʼ bidxaga Sísara la? gusi. Óraque bidxiña Jael ra nuube chaahuidugá sin guni ruidu, bitaabi ti staca íquebe ne gútibe.

Despué, yendá Barac ra nabeza Jael canayubi Sísara. Para biree Jael ná rabi laabe: «Guyuu, gulueeʼ lii hombre cuyúbiluʼ». Ora guyuu Barac biiyaʼ nexheʼ Sísara raqué maʼ guti. Óraque biindaʼ Barac ne Débora ti canción para gusisácacaʼ Jiobá purtiʼ gucanebe laacaʼ para biʼniʼ ganarcaʼ ca enemigu sticaʼ. Zaqué nga gupa guidxi Israel guendariuudxi 40 iza.