LECCIÓN 10
¿Xiñee galán nga cheluʼ ca reunión ni runi ca testigu stiʼ Jehová?
¿Ñee huayuni invitárcabe lii cheluʼ ca reunión ni runi ca testigu stiʼ Jehová la? Pa qué huayeluʼ nin ti biaje la? zándaca ziuuluʼ nervioso pa guiníʼ íqueluʼ cheluʼ. Laaca zándaca guinabadiidxaluʼ: «¿Xi runi ca Testigu lu ca reunión sticaʼ? ¿Xiñee nabé risaca ni para laacabe? ¿Ñee laaca caquiiñeʼ chaaʼ ca reunión ca la?». Lu lección riʼ zaziidiluʼ ximodo zacané ca reunión ca lii gaca xhamíguluʼ Dios ne ximodo zacaneni lii lu xquendanabániluʼ.
1. ¿Xiñee risaca chuunu reunión?
Ti hombre bicaa Biblia bizeeteʼ xiñee risaca chuunu ca reunión ca, laabe guniʼbe: «Zusisacaʼ Jehová lade stale binni dagulisaa» (Salmo 26:12). Ca dxi nabáninu riʼ, laaca ridagulisaa ca testigu stiʼ Jehová ne nabé riéchecaʼ ora rúnicaʼ ni. Lu guidubi naca Guidxilayú ridagulisaacabe cada semana para gusisácacabe Dios, gúʼndacabe para laa ne guni orárcabe juntu. Ne cada iza ridagulisaacabe chupa chonna biaje pur grupu naroʼbaʼ.
2. ¿Xi zaziidiluʼ lu ca reunión ca?
Ni zeeda lu Stiidxaʼ Dios nga rizíʼdidu lúcani ne rusiene chaahuicabe xi ná lu Stiidxaʼ Dios lu ca reunión ca (biindaʼ Nehemías 8:8). Pa cheluʼ ca reunión riʼ la? zaziidiluʼ jma de Jehová ne ximodo nácabe. Ne ra guiziidiluʼ pabiáʼ nadxiibe lii la? jma ziuuláʼdxiluʼ gaca xhamíguluʼ laabe. Laaca zaziidiluʼ ximodo zanda gacanebe lii guibániluʼ nayecheʼ (Isaías 48:17, 18).
3. ¿Ximodo zanda gacané ca binni ni gunibiaʼluʼ lu reunión riʼ lii?
Ni racalaʼdxiʼ Jehová nga «gucáʼ íquenu gacanésaanu ti guiale de ndaaniʼ ladxidoʼno gannaxhiisaanu ne gúninu cosa galán, ne cadi gusaana de chuunu ca reunión stinu» (Hebreos 10:24, 25). Lu ca reunión stidu zunibiaʼluʼ binni ni nadxiisaa ne racalaʼdxiʼ guidxiña Dios cásica lii. Zuuyaluʼ riquiiñecabe Biblia para uguusaacabe gana laacabe (biindaʼ Romanos 1:11, 12). Laaca zunibiaʼluʼ stale binni ni maʼ bichaganáʼ ne ni caʼruʼ guichaganáʼ ni huadxaagalú stale guendanagana peru nabánicaʼ nayecheʼ. ¿Maʼ bidiiluʼ cuenta xiñee racalaʼdxiʼ Jehová cadi gusaana de chuunu reunión la?
GUIZÍʼDIRUNU JMA
Guidúʼyanu ximodo raca ca reunión stiʼ ca testigu stiʼ Jehová ne xiñee risaca gúninu stipa chuunu ca ni.
4. Ca reunión ni rapa ca testigu stiʼ Jehová
Bidagulisaa ca xpinni Cristu ni bibani lu primé siglu que para guni adorarcaʼ Jehová (Romanos 16:3-5). Laguundaʼ Colosenses 3:16 ne laiquiiñeʼ pregunta riʼ para güitu diidxaʼ:
¿Ximodo biʼniʼ adorar ca primé xpinni Cristu que Jehová?
Ca dxi nabáninu riʼ, laaca ridagulisaa ca testigu stiʼ Jehová para guni adorarcaʼ Dios. Para gánnaluʼ ximodo raca ca reunión stidu la? laguuyaʼ VIDEU riʼ. Despué, laguuyaʼ dibuju stiʼ ti reunión ni zeeda lu yaza riʼ ne laiquiiñeʼ ca pregunta riʼ para güitu diidxaʼ:
Casi ná Colosenses 3:16, ¿xii nga ca cosa ni raca lu ca reunión ca?
Despué de biiyaluʼ videu riʼ ne dibuju ca, ¿ñee nuu xiixa ni guyuuláʼdxiluʼ de modo raca ca reunión stidu la?
Laguundaʼ 2 Corintios 9:7 ne laiquiiñeʼ ca pregunta riʼ para güitu diidxaʼ:
¿Xiñee qué rinábacabe bueltu lu ca reunión stiʼ ca testigu stiʼ Jehová?
Laguuyaʼ xi chitidiʼ lu reunión semana riʼ.
De guiráʼ ni chitidiʼ lu reunión riʼ, ¿xi jma guyuuláʼdxiluʼ o xi rábiluʼ zanda gacané lii?
¿Ñee nannuʼ ndiʼ la?
Lu jw.org zanda guidxélaluʼ paraa ne padxí raca ca reunión stidu lu guidubi Guidxilayú.
Lu ca reunión rápadu rusiénecabe laadu xiixa tema ni zeeda lu Biblia, ruluíʼcabe laadu ximodo gusíʼdidu ne ridúʼyadu videu. Ora ruzulú ni ne ora riluxe ni riuundaʼ ti canción ne raca ti oración.
Ora maʼ cayaca ca reunión ca nuu ora zanda guicabi ca ni cucaadiaga.
Guiráʼ tu zanda cheʼ: hombre, gunaa, binni huaniisi, xcuidi...
Qué rinabaʼ ca testigu stiʼ Jehová bueltu lu ca reunión ca ne qué riguixe binni para chuʼ.
5. Naquiiñeʼ gúninu stipa para chuunu reunión
Guiníʼ íquenu ni bizaaca familia stiʼ Jesús. Cumu nabézacabe Nazaret la? naquiiñeʼ sácabe biaʼ chonna gubidxa lade dani para chécabe ndaaniʼ templu ni nuu Jerusalén cada iza. Laguundaʼ Lucas 2:39-42 ne laiquiiñeʼ ca pregunta riʼ para güitu diidxaʼ:
¿Ñee rábiluʼ biʼniʼ familia stiʼ Jesús stipa para yendá Jerusalén la?
¿Lii yaʼ? ¿Xi sacrificiu caquiiñeʼ gúniluʼ para cheluʼ reunión?
¿Xiñee galán cheluʼ ca reunión ca neca gácani nagana para lii? ¿Xiñee riníʼ íqueluʼ zacá yaʼ?
Rusiidiʼ Biblia nabé risaca nga guidagulisaanu para guni adorarnu Jehová. Laguundaʼ Hebreos 10:24, 25 ne laiquiiñeʼ pregunta riʼ para güitu diidxaʼ:
¿Xiñee cadi naquiiñeʼ guiáʼdxanu reunión?
NUU TU NÁ: «Cadi caquiiñeʼ cheluʼ lade ti religión, lii si zanda guni adorarluʼ Dios».
¿Xi textu o ejemplu zeeda lu Biblia cusihuinni xi racalaʼdxiʼ Jehová gúninu?
XI BIZÍʼDINU
Zacané ca reunión ca lii gunibiaʼluʼ Jehová, gaca xhamíguluʼ laabe jma ne gunibiaʼluʼ xcaadxi binni ni runi adorar laabe casi lii.
Xi biziidiluʼ
¿Xiñee canabaʼ Jehová laanu chuunu reunión?
¿Xi zaziidiluʼ lu ca reunión stiʼ ca testigu stiʼ Jehová?
¿Xiruʼ sti modo rábiluʼ zanda gacané ca reunión ca lii?
BIIYAʼ XIRUʼ ZANDA GUIZIIDILUʼ
¿Ñee riuuluʼ nervioso ora guiníʼ íqueluʼ cheluʼ reunión la? Biiyaʼ xi bizaaca ti hombre ni biʼniʼ sentir zacá peru despué guyuulaʼdxiʼ cheʼ reunión.
Biiyaʼ xi biʼniʼ ti joven ni nabé riuulaʼdxiʼ cheʼ reunión para cadi guiaadxaʼ nin tobi de laacani.
Biiyaʼ xi riníʼ ique caadxi binni de reunión.
Biiyaʼ ximodo bichaa xquendanabani ti hombre guzá lade ti banda ra bizulú guyé reunión stiʼ ca testigu stiʼ Jehová.
«Qué riaadiaʼ paxaraa sin guiibaʼ stinneʼ» (Torre stiʼ ni rapa, 1 de julio de 2014)