LECCIÓN 11

Xi zanda gúniluʼ para gacané ni rusiidiʼ Biblia lii

Casi zeeda ni lu libru

¿Ñee huaguixhe íqueluʼ gúniluʼ xiixa dxiiñaʼ nabé naroʼbaʼ ne nagana la? Zándaca ante guzululuʼ mápeca bireeluʼ gana. Peru pa quixhe chaahuiluʼ ximodo gúniluʼ dxiiñaʼ ca ti ndaagá la? zudiiluʼ cuenta cadi nagana peʼ para gunduuxeluʼ ni. Zacaca nga zazaaca pa quixhe íqueluʼ gúʼndaluʼ Biblia. Zándaca guinabadiidxaluʼ: «¿Pa ladu guzuluáʼ pue?». Cadi guizaaláʼdxiluʼ, lu lección riʼ zadxélaluʼ stale conseju ni zacané lii chuuláʼdxiluʼ gúʼndaluʼ Biblia ne guni estudiarluʼ ni.

1. ¿Xiñee galán guidúʼndanu Biblia guiráʼ dxi?

Ti binni ruundaʼ Biblia o «ley stiʼ Jehová» guiráʼ dxi la? riuu nayecheʼ ne guiráʼ ni guni zareeni laa galán (biindaʼ Salmo 1:1-3). Zanda guzululuʼ gúʼndaluʼ Biblia chupa chonna minutu guiráʼ dxi. Ra jma gunibiaʼluʼ Stiidxaʼ Dios la? jma ziuuláʼdxiluʼ gúʼndaluʼ ni.

2. ¿Xi zanda gúniluʼ para gacané Biblia lii?

Para gacané Biblia lii galán nga guiníʼ íqueluʼ ni cayuundaluʼ. Cadi naquiiñeʼ si gúʼndaluʼ ni, laaca napa xidé «guiníʼ íqueluʼ ni nani» (Josué 1:8). Ora maʼ cayuundaluʼ Biblia galán pa guinabadiidxaluʼ: «¿Xi cusiidiʼ ca versículo riʼ naa de Jehová? ¿Ximodo zanda guneʼ ni nani lu xquendanabaneʼ? ¿Ximodo zanda iquiiñeʼ ni caziideʼ riʼ para gacaniaʼ xcaadxi binni?».

3. ¿Ximodo zanda cueeluʼ tiempu para gúʼndaluʼ Biblia?

¿Ñee raca nagana para lii cueeluʼ tiempu para gúʼndaluʼ Biblia la? Stale tu rizaaca ndiʼ, nga runi Biblia cayabi laanu: «Laiquiiñeʼ tiempu stitu jneza» (Efesios 5:16). Zanda iquiiñeluʼ tiempu stiluʼ jneza pa cueeluʼ tiempu guiráʼ dxi para gúʼndaluʼ Biblia. Nuu tu laa ruundaʼ ni siadóʼ. Xcaadxi la? ruuyacaʼ jma galán gúʼndacaʼ ni huadxí, zándaca ora caziiláʼdxicaʼ. Ne nuu tu ruundaʼ Biblia huaxhinni ante gasiʼ. ¿Pora rábiluʼ jma galán para lii gúʼndaluʼ Biblia?

GUIZÍʼDIRUNU JMA

Guidúʼyanu xi zanda gúninu para jma chuuláʼdxinu guidúʼndanu Biblia. Raríʼ zeeda caadxi idea ni zacané lii gaca prepararluʼ ante guicaaluʼ estudiu ne ni zacané lii guiziidiluʼ jma de lu Biblia.

Caadxi imagen ra rihuinni modo ziniisi ti hombrehuiiniʼ ne ziyuulaʼdxiʼ ti guendaró: 1. Caguítebe lu guendaró. 2. Maʼ ziniisibe ne cayobe ni nagueenda. 3. Maʼ huaniisibe ne maʼ riuuláʼdxibe guendaró ca. — Cásica chaahuidugá chaahuidugá ziuuláʼdxiluʼ goloʼ xiixa guendaró, zacaca chaahuidugá chaahuidugá ziuuláʼdxiluʼ gúʼndaluʼ Biblia

4. Biziidiʼ gúʼndaluʼ Biblia sin guireeluʼ gana

Zándaca gaca nagana para lii guzululuʼ gúʼndaluʼ Biblia. Peru, cásica chaahuidugá chaahuidugá ziuuláʼdxiluʼ ti guendaró ora nacubi chitoloʼ laa la? zacaca nga zazaaca ora guzulú gúʼndaluʼ Biblia, laaca chaahuidugá chaahuidugá ziuuláʼdxiluʼ gúʼndaluʼ ni. Laguundaʼ 1 Pedro 2:2 ne laiquiiñeʼ pregunta riʼ para güitu diidxaʼ:

Pa gúʼndaluʼ Biblia guiráʼ dxi, ¿rábiluʼ ra tidiʼ dxi jma ziuuláʼdxiluʼ gúʼndaluʼ ni la?

Laguuyaʼ VIDEU riʼ para gánnatu xi biʼniʼ caadxi joven para chuuláʼdxicaʼ gúʼndacaʼ Biblia. Despué laiquiiñeʼ ca pregunta riʼ para güitu diidxaʼ:

VIDEU: Ca joven ni maʼ biziidiʼ gannaxhii Stiidxaʼ Dios (5:33)

¿Xi guca nagana para ca joven riʼ ora bizulú bíʼndacaʼ Biblia?
¿Xi gucané laacabe para cadi guireecabe gana?
¿Xi huayacané ca joven riʼ para chuuláʼdxicaʼ gúʼndacaʼ Biblia?

Ni zacané lii para guzululuʼ:

Biyubi ti Biblia ni guca traducir jneza ne ra zeeda diidxaʼ ni cadi nagana para guiéneluʼ. Zanda gúʼndaluʼ Traducción del Nuevo Mundo pa nuuni lu diidxaʼ riniʼluʼ.
Biindaʼ ca relatu ni jma riuuláʼdxiluʼ. Zadxélaluʼ xcaadxi idea lu tabla ni láʼ «Bizulú biindaʼ Biblia».
Bicaa biaʼ ra ziyuundaluʼ. Biquiiñeʼ tabla ni láʼ «Bicaa biaʼ ra ziyuundaluʼ Biblia», zadxélaluʼ ni lu libru riʼ.
Biquiiñeʼ aplicación JW Library^®. Pa gápaluʼ ni lu teléfono stiluʼ o lu sti dispositivu la? zanda gúʼndaluʼ ne gucaadiágaluʼ Biblia ratiica nuuluʼ.
Biquiiñeʼ folletu ni láʼ Ni zacané lii guiéneluʼ Stiidxaʼ Dios. Luni zeeda caadxi mapa ne caadxi tabla ni zacané lii chuuláʼdxiluʼ gúʼndaluʼ Biblia.

5. Guca preparar ante guʼndanécabe lii

Laguundaʼ Salmo 119:34 ne laiquiiñeʼ ca pregunta riʼ para güitu diidxaʼ:

¿Xiñee galán nga gúniluʼ ti oración ante gúʼndaluʼ Biblia o ante gaca prepararluʼ para guicaaluʼ estudiu?

¿Xi zanda gúniluʼ para guiziidiluʼ jma cada biaje guicaaluʼ estudiu? Ora maʼ cayuni estudiarluʼ ca lección stiʼ libru riʼ, zanda chinándaluʼ ca idea zeeda raríʼ:

Biindaʼ guiráʼ ca párrafo ni zeeda lu primé ndaa stiʼ cada lección.
Biyubi guiráʼ textu zeeda luni ne biindaʼ ni, ne biiyaʼ xiñee biaʼsi ni nani ne ni cayuni estudiarluʼ.
Bitiee ca diidxaʼ ni zacané lii guicábiluʼ ca pregunta zeeda luni, zacaneni lii chuʼluʼ listu ora maʼ guicaaluʼ estudiu.

Caadxi imagen ra rihuinni modo cayaca preparar ti gunaa para guicaa estudiu: A. Cayuundabe primé ndaa stiʼ ti lección. B. Cayuundabe ca textu zeeda luni. C. Cutieebe ca idea risaca zeeda lu lección ca.

¿Ñee nannuʼ ndiʼ la?

Laadu, ca testigu stiʼ Jehová huaquiiñedu gadxé gadxé traducción para guidúʼndadu Biblia, peru nuu ti traducción ni jma riuuláʼdxidu iquiiñedu, laani nga Traducción del Nuevo Mundo purtiʼ biaʼsi modo guca traducir ni, cadi nagana para guiénecabe ni ne zeeda lá Dios luni (biindaʼ tema riʼ lu jw.org: «Ñee bíʼnipeʼ ca testigu stiʼ Jehová Biblia sticaʼ la?»).

NUU TU NÁ: «Qué lica gapaʼ tiempu guundaʼ Biblia».