LECCIÓN 25
¿Xi naguixhe ique Dios para binni guidxilayú?
Biblia ná huaxiéʼ dxi ribani binni guidxilayú ne «dxaʼ xpida de guendanagana» (Job 14:1). Peru ¿ñee sicaríʼ nga gucalaʼdxiʼ Dios nibáninu la? Pa cadi zacá ni, ¿xi naguixhe íquebe para laanu yaʼ? ¿Ñee zedandá dxi gaca cumplir ni naguixhe ique Dios para binni guidxilayú la? Biiyaʼ ximodo ricabi Biblia ca pregunta riʼ.
1. ¿Ximodo racalaʼdxiʼ Dios guibáninu?
Racalaʼdxiʼ Dios guibáninu galán. Dxi bizaʼbe Adán ne Eva, ca primé binni guyuu ndaaniʼ Guidxilayú, guluube laacaʼ ndaaniʼ ti paraísu nabé galán, laani nga: jardín de Edén. Ne raqué «guluu Dios ndaayaʼ laacabe ne gudxi laacabe: “Lagapa xiiñitu ne lagaca stale, laguchá guidxilayú riʼ ne laguni dxiiñaʼ luni”» (Génesis 1:28). Gucalaʼdxiʼ Jehová ñapa Adán ne Eva xiiñiʼ, ne ñúnicaʼ Guidxilayú riʼ ti lugar sicarú, ti paraísu, ne ñápacaʼ guiráʼ maniʼ nuu luni. Ni gucalaʼdxiʼ Dios para binni guidxilayú nga nibani sin ñaca huará ne sin ñuu dxi ñati.
Neca cadi zacá nabáninu yanna,a qué huachaa Dios ni naguixhe ique guni (Isaías 46:10, 11). Dede yanna racalaʼdxiʼ Dios guibani guiráʼ binni ruzuubaʼ stiidxaʼ galán ne sin qué chuʼ dxi gatiʼ (biindaʼ Apocalipsis 21:3, 4).
2. ¿Ximodo zanda guibáninu nayecheʼ dede ca yanna?
Guiráʼ binni «nanna caquiiñeʼ Dios», purtiʼ zacá bizaʼbe laanu, nga runi ruyubi binni gunibiáʼ ne guni adorar laabe (biindaʼ Mateo 5:3-6). Racalaʼdxiʼ Dios gaca xhamígunu laa, sanu lu «ca neza stibe», gannaxhiinu laabe ne gúninu ni nabe de guidubi ladxidoʼno (Deuteronomio 10:12; Salmo 25:14). Pa gúninu guiráʼ ndiʼ, dxandíʼ peʼ ziuʼnu nayecheʼ neca nápanu guendanagana. Pa guni adorarnu Jehová jma galán zabáninu purtiʼ nánnanu cayúninu ni nabe.
GUIZÍʼDIRUNU JMA
Guidúʼyanu ximodo bisihuinni Jehová nadxii binni ra bizáʼ Guidxilayú ne guiráʼ ni nuu luni ne xi para bizaʼbe laanu.
3. Racalaʼdxiʼ Jehová guibáninu galán
Laguuyaʼ VIDEU riʼ ne laiquiiñeʼ pregunta riʼ para güitu diidxaʼ:
¿Xiñee bizáʼ Dios Guidxilayú sicarú ra nabézanu riʼ?
Laguundaʼ Eclesiastés 3:11 ne laiquiiñeʼ pregunta riʼ para güitu diidxaʼ:
¿Xi rusiidiʼ textu riʼ laanu de Jehová?
4. Qué huachaa Jehová ni naguixhe ique guni
Laguundaʼ Salmo 37:11, 29 ne Isaías 55:11, ne laiquiiñeʼ pregunta riʼ para güitu diidxaʼ:
¿Ximodo nánnanu qué huachaa Jehová ni naguixhe ique guni para binni guidxilayú?
Zanda gaca chaahuiʼ ti yoo yooxhoʼ. Zaqueca neca maʼ binitilú binni Guidxilayú riʼ, zanda guni chaahuiʼ Dios ni para cueza ca binni ni nadxii laabe luni.
5. Zabáninu galán pa guni adorarnu Jehová
Ziuʼnu nayecheʼ ora gánnanu xi naguixhe ique Dios guni. Laguuyaʼ VIDEU riʼ ne laiquiiñeʼ pregunta riʼ para güitu diidxaʼ:
Ora biene Terumi xiñee bizáʼ Dios laanu, ¿ximodo gucané ni laabe?
Laguundaʼ Eclesiastés 12:13 ne laiquiiñeʼ pregunta riʼ para güitu diidxaʼ:
Pur guiráʼ ni huayuni Dios pur laanu, ¿xi zanda gúninu para gusihuínninu rudiʼnu xquixe peʼ laabe?
NUU TU RINABADIIDXAʼ: «¿Xi para nabáninu ndaaniʼ Guidxilayú?».
¿Lii xi rábiluʼ?
XI BIZÍʼDINU
Racalaʼdxiʼ Jehová guibáninu galán sin qué chuʼ dxi gátinu ndaaniʼ Guidxilayú riʼ. Peru dede ca yanna zanda guibáninu galán pa guni adorarnu Jehová de guidubi ladxidoʼno.
Xi biziidiluʼ
¿Xi gudixhe ique Jehová para Adán ne Eva dxi bizaʼbe laacaʼ?
¿Ximodo nánnanu qué huachaa Jehová ni naguixhe ique guni para binni guidxilayú?
¿Xi caquiiñeʼ gúniluʼ para guibániluʼ nayecheʼ?
BIIYAʼ XIRUʼ ZANDA GUIZIIDILUʼ
Biiyaʼ xiñee zanda chuʼnu seguru dxandíʼ guyuu jardín de Edén.
«¿Ñee dxandíʼ guyuu jardín de Edén la? o ti cuentu si ni?» (Tema ni zeeda lu Torre stiʼ ni rapa)
Biiyaʼ xiñee zanda chuʼnu seguru qué ziuu dxi guinitilú Guidxilayú riʼ.
«¿Ñee zanitilú Guidxilayú riʼ la?» (Tema ni zeeda lu jw.org)
Biiyaʼ ximodo rusiidiʼ Biblia xi para nabáninu lu Guidxilayú.
«¿Xi para nabáninu lu Guidxilayú?» (Tema ni zeeda lu jw.org)
Biiyaʼ ximodo bichaa ti hombre ni guníʼ ique napa guiráʼ ni racalaʼdxiʼ, peru despué bidii cuenta cayaadxaʼ xiixa lu xquendanabani.
a Lu sti lección ca zaziidiluʼ xiñee maʼ qué ñaca ni gudixhe ique Dios.