Cani ruundaʼ revista riʼ racaláʼdxicaʼ gánnacaʼ

Ñee Dios nga ruseendaʼ nisaguié roʼ o runi xu roʼ para gusabanáʼ binni la?

Dios qué riquiiñeʼ diʼ ca desgracia ca para gusabanáʼ binni. Qué huayuu dxi gúnibe ni, ne qué ziuu dxi gúnibe ni. Xiñee yaʼ. Purtiʼ lu Biblia, lu 1 Juan 4:8 na sicaríʼ: «De Dios nga reeda enda ranaxhii».

Dios runi guiráʼ cosa purtiʼ nadxii laanu. Lii qué zuninaluʼ binni ora nadxiiluʼ laa, o, casi na Biblia, «pa nadxii lu stobi la? qué zuchee neu laa» (Romanos 13:10). Ne nánnanu qué runi diʼ Dios ni cadi jneza (Job 34:12).

Peru, cadi dxandíʼ rieeteʼ lu Biblia «zaca stale xu roʼ» ne zazaaca xcaadxi cosa la? (Lucas 21:11.) Dxandíʼ. Peru, cásica qué gapa ti binni ni riníʼ zeeda ti huracán donda pur guiráʼ ra guniná ni la? Jiobá laaca qué gapa diʼ donda pur guiráʼ ra huayuniná ca desgracia ni cá lu Stiidxabe, Biblia. Yanna, pa cadi Dios ruseendaʼ ca desgracia ni nabé huayuniná binni, xi pur rizaaca cani yaʼ.

Biblia na «naaze dxiichi binidxaba idubi guidxilayú» (1 Juan 5:19). Dede dxi bicaalube Dios, dxi nacubi guyuu binni lu guidxilayú hasta ca dxi stinu riʼ huayuutibe binni (Juan 8:44). Nga runi, para Binidxabaʼ qué risaca diʼ guendanabani stiʼ binni, zeeda gácani casi xiixa ni zanda gusáʼbibe ora tiica. Ne cumu racaláʼdxibe gápabe jma binni lu nabe la? rucaabe guirá gobiernu ni cayuni ni nabe gácacaʼ casi laabe, nga runi ruxhiicaʼ binni purtiʼ riuuláʼdxicaʼ puru para laasicaʼ. Pur guiráʼ nga stale familia rucuicaʼ lídxicaʼ ra jma runiná ca desgracia ca, o, ra jma racaná pur ni runi binni (Efesios 2:2; 1 Juan 2:16). Nuu tiru cani napa donda pur xiixa desgracia ni runiná binni nga ca hombre ni rachelú gapa jma (Eclesiastés 8:9). Ñee dxandíʼ zacá ni la?

Nabé stale nga ca desgracia ni raca, ne nuu tiru binni guidxilayú nga napa donda pur rizaaca cani. Guiníʼ íquesinu ni bizaaca ca binni ni nabeza ndaaniʼ ti guidxi stiʼ Estados Unidos, ni láʼ Nueva Orleans, ra bininá huracán katrina que, o ni bizaaca ca binni de Venezuela dxi bixaataʼ beñe luguiáʼ ca yoo ni nuu xquídxicaʼ. Casi ca biaje ca ne xcaadxi ni huayaca la? binni guidxilayú nga gupa donda pur bininá bi ne nisaguié ca lugar que, purtiʼ qué ñánnacabe ximodo ñápacabe guidxilayú riʼ, cadi jneza diʼ modo bicuícabe ca yoo que, qué niníʼ íquecabe xi ñúnicabe ora nizaaca xiixa desgracia, qué ñanna ca políticu ca xi ñúnicaʼ ne últimu la? qué nulabi binni ora gúdxicabe laacaʼ nireecaʼ.

Guzéʼtenu ti desgracia ni guca dxi guyuu Jesús lu Guidxilayú riʼ. Ti biaje biaba ti torre ne biitini dieciocho binni (Lucas 13:4). Zándaca binni nga gupa donda pur ni guca riʼ, o «málasi [b]izaaca» ni o pur guiropaʼ cosa ca. Peru cadi Dios diʼ nga biʼniʼ ni para gusabanáʼ ca binni que (Eclesiastés 9:11).

Ñee huaseendaʼ Dios xiixa cosa para gusabanáʼ binni la? Huaseendaʼ, peru cani runi Dios ca maʼ gadxé cani que cani runi binni guidxilayú, purtiʼ maca nuu tu para nga biseendaʼ Dios cani, nuu xi pur, ne cadi guiráʼ diʼ biaje bíʼnibe ni. Nápanu chupa ejemplu, tobi ca guca dxi biaba nisaguié naroʼbaʼ que ca dxi bibani Noé, ne stobi ca dxi binitilú Sodoma ne Gomorra ca dxi bibani Lot (Génesis 6:7-9, 13; 18:20-32; 19:24). Dxi guca cani la? binitilú Dios binni ni qué iquiiñeʼ ne bilabe binni nachaʼhuiʼ, ni cayuni ni nabe.

Jiobá Dios zanda cuee guiráʼ ni cayuniná binni ne guni chaahuiʼ guiráʼ ra huayuniná ca desgracia ca. Peru cadi ngasi, sínuque laabe zanda gúnibe ni ne racaláʼdxibe gácani. Ne para ganda gúnibe ni gudixhe íquebe la? maʼ bíʼnibe Jesucristu Xiiñibe, Rey, ni «zulá binni pobre ni canabaʼ gacanécabe laa, ne cani nuu triste ne tutiica ni qué gapa tu gacané laa» (Salmo 72:12).