Naquiiñeʼ guibani cani ridxibi Dios nayá

BIBLIA rusiidiʼ naca Jiobá ti Dios ni nayá, ne guirútiruʼ stobi casi laabe (Isa. 6:3; Apo. 4:8). Lu hebreu ne griegu nápacabe ti diidxaʼ para guiníʼcabe de xiixa ni maʼ bireechú para iquiiñeʼ ora gaca adorar Dios. Cumu nayá Dios la? nga rusihuinni laasibe nga rúnibe guiráʼ cosa jneza.

Yanna, ñee qué ribeza Jiobá, Dios ni nayá ca, gaca cani runi adorar laabe binni nayá ne gúnicaʼ ni jneza ne chuʼcaʼ galán ne laabe la? Stiidxaʼ Dios rusiene chaahuiʼ laanu racalaʼdxiʼ Jiobá gaca xquidxi nayá. Sicaríʼ cá lu 1 Pedro 1:16: «Lagaca nachaʼhuiʼ [o, nayá] purti zacá naa». Ñee zanda gácanu nayá casi Jiobá neca gulenenu donda la? Zanda, neca cadi cásipeʼ laabe. Zuuyaʼ Dios laanu nayá pa guni adorarnu laa casi racalaʼdxiʼ ne chuʼnu galán ne laa.

Yanna, ximodo zanda chuʼnu nayá pa nuunu ndaaniʼ ti guidxilayú ra cadi nabani binni jneza yaʼ. Xii nga cani naquiiñeʼ gucáʼnanu yaʼ. Ne paraa zándaca caquiiñeʼ guchaʼnu modo laanu ne modo rininu. Guidúʼyanu xi zanda guizíʼdinu de ni gunabaʼ Jiobá guni ca judiu ni bibiguetaʼ de guidxi Babilonia lu iza 537 ante de ca dxi stiʼ Jesús.

Ziuu ti neza nayá

Maca guníʼ Jiobá zabiguetaʼ ca xpinni ni nuu Babilonia que xquídxicaʼ. Lade ca diidxaʼ ra guníʼ Jiobá zabiguétacabe que laaca guníʼ ca diidxaʼ riʼ: «Dxandipeʼ ziuu ti neza raqué; ne zaree lani Neza ni Nayá» (Isa. 35:8a). Ca diidxaʼ riʼ culuíʼcani laanu cadi bixheleʼ si Jiobá ti neza para guibiguetaʼ ca judíu xquídxicaʼ, sínuque guniʼbe zápabe laacaʼ ora guibiguétacaʼ.

Ca dxi riʼ laaca bixheleʼ Jiobá ti neza nayá para ca xpinni ora guleebe laacaʼ de Babilonia guidxi roʼ, ni zeeda gaca guiráʼ ca religión ni cadi dxandíʼ ca. Lu iza 1919 nga gulee Jiobá ca xpinni Cristu ni bibí que de religión ni cadi dxandíʼ ca, ne chaahuiʼ chaahuiʼ biʼniʼ adorárcabe Dios jneza. Laanu, cani rúninu ni na Jiobá yanna la? maʼ nuunu lade ca binni nayá ni runi adorar Dios, ne zanda chuʼnu galán ne laabe ne zaqueca ne xcaadxi binni.

Ca xpinni Cristu ni bibí ni zeeda gaca «grupu huiiniʼ de dendxuʼ» ca ne guiráʼ binni ni chiguibani lu Guidxilayú riʼ la? maʼ gulicaʼ sacaʼ lu neza nayá riʼ ne cayábicabe xcaadxi binni guidaaguʼ laacabe (Luc. 12:32, NM; Apo. 7:9; Juan 10:16). «Neza ni Nayá» ca nuuni para cani racalaʼdxiʼ gudiicaʼ xquendanabánicaʼ Dios «casi ti ofrenda ni nabani ne nayá, ne ni chuʼlaʼdxi icaa» (Rom. 12:1).

«Ni nabiidiʼ qué zadiʼdiʼ luni»

Ca judíu ni bibiguetaʼ xquidxi lu iza 537 ante de ca dxi stiʼ Jesús que la? gúpacaʼ xidé bíʼnicaʼ xiixa nabé risaca. Guidúʼyanu xi cuzeeteʼ Isaías 35:8b de cani zanda saʼ lu «Neza ni Nayá» ca: «Ni nabiidiʼ qué zadiʼdiʼ luni. Neza ca nuuni para si cani naquiiñeʼ saʼ luni, ne nin ti binni huati qué zazárenda luni». Cumu bibiguetaʼ ca judíu que para guni adorarcaʼ Jiobá jneza sti biaje la? ngue runi qué ñuu diʼ cani ruyubi puru si para laa raqué, laaca qué ñuu cani qué runi respetar ca cosa stiʼ Dios o cani runi cosa dxabaʼ. Ca judíu ni guibiguetaʼ xquidxi que naquiiñepeʼ guibánicaʼ modo na ca ley stiʼ Jiobá. Ngaca nga ni naquiiñeʼ gúninu yanna pa racaláʼdxinu gápanu ndaayaʼ stiʼ Dios. Laanu naquiiñeʼ guibáninu nayá ti sanu «modo pe naquiiñe sa ca xpinni be, cani ridxibi laabe» (2 Cor. 7:1). Yanna, gunáʼ nga ca cosa dxabaʼ ni naquiiñeʼ gucáʼnanu yaʼ.

Sicaríʼ bicaa apóstol Pablu: «Rihuinni dxichi irá ni runi cani zinanda ni na ique: riuu né ni cadi xheelaʼ, ricá ique ni nadxabaʼ, ne nisi nga si ruyubi guni» (Gál. 5:19). Xi guiráʼ nga riníʼ ca diidxaʼ «riuu né ni cadi xheelaʼ» o rapa jnadxii yaʼ. Cadi gatané si binni ni cadi xheelaʼ, sínuque laaca laani nga quite tuuxa ra naca sti binni hombre o ra naca gunaa. Binni runi zacá «nabani modo na ique [...], ne qué rulabi pa jneza ni cayuni». Binni ni riuuné ni cadi xheelaʼ ne ni runi cosa dxabaʼ sin guituilú la? cadi jneza cani nezalú Jiobá, Dios ni nayá ca. Nga runi, ca binni ni qué gusaana de guni ca cosa ca qué zanda diʼ guiaanacaʼ ndaaniʼ xquidxi Dios ne rireecabe de lade ca binni ridagulisaa. Ngaca nga raca ne cani ricá ique guni «irá ni nadxaba, dede biaʼ gapa ca gana» (Efe. 4:19).

Diidxaʼ nadxabaʼ ca rugaandani stale modo rucheené binni Dios. Diidxaʼ ni biquiiñecabe lu griegu ca riniʼni nabiidiʼ, ne riquiiñeni para guiníʼcabe de xpiaʼ tuuxa, modo riníʼ ne ora chuʼ lade ti religión ra qué raca adorar Dios jneza. Laca riníʼ ca diidxaʼ ca xcaadxi cosa dxabaʼ runi binni peru zándaca cadi caquiiñepeʼ guni juzgar ca binnigola ca laacabe pur laacani.a Peru, ñee nayá nuu cani cayuni ca cosa dxabaʼ ca la?

Guxuíʼlunu ti xpinni Cristu ni guzulú guʼyaʼ película ra ridiʼdiʼ cosa dxabaʼ ora maʼ nuu stubi. Chaahuidugá maʼ zanabaʼ ladxidoʼbe laabe gúnibe ca cosa dxabaʼ ca, ne maʼ qué zucaa íquepebe chuʼbe nayá nezalú Jiobá. Zándaca cadi naxoopeʼ cosa dxabaʼ ni cayúnibe ca, peru maʼ cadi cayúnibe «ni jneza, ne ni nachaʼhuiʼ, ne ni rusieche binni, ne ni guiaba laacaʼ» (Fili. 4:8). Guʼyaʼ binni ca clase película ca la? runi biidicani laa ne laaca ruxhélecani laa de Dios. Nga runi cadi liica guieeteʼ gastiʼ ni nadxabaʼ ládenu (Efe. 5:3).

Quíxhenu sti ejemplu stiʼ ti xpinni Cristu ni guzulú gapa maña quite ra naca hombre o ra naca gunaa, para guni sentir casi ora nexhené tuuxa, ne zándaca gúʼyabe película ra ridiʼdiʼ cosa dxabaʼ para gúnibe ni o coʼ. Qué ruzeeteʼ diʼ Biblia de laani, peru pa guiaa binni ca guni ni la? zuchiiñaʼ xquendabiaaniʼ laa ne dede zuninani laa. Pa qué gusaana de gúnibe ni, ñee qué zuxheleʼ ni laabe de Jiobá ne zúnini laabe ti binni ni nabiidiʼ nezalú Dios la? Riquiiñeʼ gúninu ni na conseju bidii apóstol Pablu riʼ: «Usiá nu laanu de irá ni runi dxaba xcuerpu nu ne espíritu stinu». Laaca bidiibe sti conseju: «Lagaxha irá ni zeeda de guidxilayú ri ndaani ladxidóʼ to. Nin tobi de laatu cadi chuʼ né ni cadi xheelaʼ, nin guni gasti ni nadxabaʼ. Cadi chi nanda tu ni na ique tu, nin uluiʼlaʼdxi tu guni tu ni cadi jneza. Ne cadi nisi bidxichi ma cá ique tu gapa tu» (2 Cor. 7:1; Col. 3:5).

Ndaaniʼ guidxilayú ra cayuni mandar Binidxabaʼ riʼ, nabé ricaa binni lugar para guni cosa dxabaʼ, dede rucaacabe binni gúnicaʼ ni. Nga runi zándaca gaca nagana para laanu cadi gúninu cani ruquiinde laanu. Peru cani dxandíʼ xpinni Cristu cadi naquiiñeʼ guibánicaʼ «casi nabani cani qué runibiáʼ Dios, purti nabani ca casi na ique caʼ» (Efe. 4:17). Zudii Jiobá lugar sanu lu «Neza ni Nayá» ca pa qué gúninu nin ti cosa dxabaʼ, ora cayuuyaʼ binni laanu ne ora nuunu stúbinu.

«Qué ziuu nin ti lión racá»

Para ganda gápanu ndaayaʼ stiʼ Jiobá, Dios ni nayá ca la? zándaca naquiiñeʼ guchaʼnu modo laanu ne modo rininu. Isaías 35:9 caníʼ: «Qué ziuu nin ti lión racá, ne qué zaguiʼbaʼ nin ti maniʼ duxhuʼ racá», o lu «Neza ni Nayá» ca. Ca binni ni naduxhuʼ para guiníʼ ne cani runiná ne rucaalú stobi, zeeda gácacaʼ casi maniʼ duxhuʼ. Rihuínnica qué zanda diʼ chuʼ clase binni ca lu guidxilayú cubi ni chiguni Dios (Isa. 11:6; 65:25). Nga runi, cani racalaʼdxiʼ chuʼ galán nezalú Jiobá, qué riquiiñeʼ diʼ gácacaʼ casi maniʼ duxhuʼ ne naquiiñeʼ guibánicaʼ nayá.

Stiidxaʼ Dios cudii conseju riʼ laanu: «Lausaana de aca nanalaʼdxi tu binni, ne de idxiichi né tu laacaʼ, ne de chuʼ tu xiana, ne de guni char tu tuuxa o cuʼ dí tu laa. Lausaana de uyubi tu izaaca stobi xiixa» (Efe. 4:31). Lu Colosenses 3:8 na sicaríʼ: «Lausaana ni yanna. Cadi guni tu xiana, cadi idxiichi tu, cadi uyubi tu guniná tu stobi, cadi cuʼ dí tu binni, ne cadi iníʼ tu diidxa guidxa». Ora ruzeeteni de cuʼ diʼ binni stobi la? caniʼni de guiráʼ ni riníʼ binni para guchiichi o para guiníʼ mal de sti binni.

Yanna riʼ nabé nga maʼ biaa binni guniná stobi ora maʼ caníʼ ne riniʼcaʼ diidxaʼ guidxa, dede ndaaniʼ lídxicaʼ rúnicaʼ zacá. Laaca zacaca riníʼ cani maʼ bichaganáʼ ne xheelacaʼ ne zacaca riníʼnecaʼ xiiñicaʼ, nabé runinácabe ca xiiñicabe ne guiráʼ diidxaʼ feu ca. Ca clase diidxaʼ ca qué riquiiñeʼ diʼ guiníʼ ca xpinni Cristu ni ralídxicaʼ (1 Cor. 5:11).

Ti ndaayaʼ nga «sa nu modo pe naquiiñe sa ca xpinni be, cani ridxibi laabe»

¡Ti ndaayaʼ nabé sicarú nga guni adorarnu Jiobá, Dios ni nayá ca! (Jos. 24:19.) Nabé nga risaca lugar ra maʼ guluu Jiobá laanu, ni zeeda gaca casi ti paraísu ca. Nga runi, riquiiñeʼ chuʼnu nayá nezalú Dios lu guiráʼ ni gúninu, purtiʼ zacá jma galán zabáninu.

Maʼ cadi candaa diʼ para guni Dios Guidxilayú riʼ ti paraísu (Isa. 35:1, 2, 5-7). Cani racalaʼdxiʼ guibani racá ne cayúnicaʼ ni na Dios yanna la? ziuucaʼ luni (Isa. 65:17, 21). Nga runi, gúninu stipa para guni adorarnu Dios modo riuulaʼdxiʼ ne para chuʼnu gaxha de laa.

[Cani cá ñee yaza]

[Dibuju/foto ni zeeda lu yaza 26]

Xi guiráʼ biʼniʼ ca judíu que para gunda guzacaʼ lu Neza ni Nayá stiʼ Dios

[Dibuju/foto ni zeeda lu yaza 27]

Tuuxa ni ruuyaʼ cosa dxabaʼ casi ni ridiʼdiʼ lu película la? zuxhéleni laa de Jiobá

[Dibuju/foto ni zeeda lu yaza 28]

«Lausaana de [...] guni char tu tuuxa o cuʼ dí tu laa»