Ca diidxaʼ riguixhená ni chigácaruʼ

ORA guníʼ apóstol Pedru de ni chiguizaaca binni ne Guidxilayú riʼ, bicaabe sicaríʼ: «Cabeza nu, casi bidii stiidxa [Dios], ti guidxilayú cubi ne ti ibáʼ cubi ra gasti enda nadxabaʼ» (2 Pedro 3:13). Isaías, ni riguixhená que, maca bizeeteʼ dede ante ziuu «ti guibáʼ cubi ne ti guidxilayú cubi» (Isaías 65:17; 66:22). Peru ora bizeeteʼ Pedru de laani la? bisihuínnibe caʼruʼ gaca diʼ guiráʼ ni na ca diidxaʼ riguixhená que.

Gudiʼdiʼ si stale iza, gaxha de iza 96 despué de beeda Jesús, apóstol Juan gucuaa ti visión ra biiyaʼ ti «guidxilayú cubi» ne ca ndaayaʼ ni chigueedané Reinu stiʼ Dios (Apocalipsis 21:1-4). Casi maʼ bidúʼyanu ca, guiráʼ ni guníʼ Jesús ne apóstol Pablu zaca ante gueeda Reinu stiʼ Dios que la? maʼ cayaca cani. Nga runi, maʼ cadi candaa diʼ para guni chaahuiʼ Reinu ca Guidxilayú riʼ. Peru ximodo zabani binni dxi ca yaʼ. Guidúʼyanu xi caníʼ libru stiʼ Isaías de laani.

Ximodo chigaca ndaaniʼ guidxilayú cubi ca

Guirá xixé binni zabani ne guendariuudxi ne zuni adorarcaʼ Dios. «Zúnicabe espada stícabe guiibaʼ ni chuʼ ruaa aradu, ne lanza stícabe zúnicabe ni guiibaʼ duxhuʼ para uganécabe guixi. Qué zadinde guidxi roʼ ne sti guidxi roʼ ne guiibaʼ duxhuʼ, ne qué zaziidirucaʼ tíndecaʼ.» (Isaías 2:2-4.)

Ziuu guendariuudxi lade ca maniʼ ca ne lade binni. «Gueuʼ ca dxandipeʼ zabaniné dendxuʼ ca caadxi dxi, ne maniʼ casi beedxeʼ zaziilaʼdxiné chibahuiiniʼ, ne yuzehuiiniʼ ne liónhuiiniʼ ne maniʼ ni maʼ ro guixi la? tobi si ziuucaʼ; ne ti xcuidihuiiniʼ si zapa laacame. Vaca ne osa ca zazacaʼ juntu; ca xhiiñihuiinicaʼ záʼtacaʼ juntu. Ne dede lión zo guixi casi ro yuze. [...] Guirutiʼ tu zuniná ne zunitilú lu dani nayá stinneʼ; purtiʼ guidxilayú riʼ zadxá típani de guiráʼ ni rusiidiʼ Jiobá cásica dxaʼ tipa nisadóʼ de nisa.» (Isaías 11:6-9.)

Ziuu stale guendaró. «Jiobá, Dios stiʼ stale binni nanda guiibaʼ zuni para guiráʼ guidxi ti guendaró ni napa stale za lu dani riʼ ne ziuu vinu de ni jma galán ne guendaró ni napa stale tuétano.» (Isaías 25:6.)

Ma qué zati binni. «Dxandipeʼ zabi [Dios] guendaguti ne maʼ qué ziuuruʼ ni, ne Jiobá, Señor Ni Jma Nandxóʼ, zuchaa nisa rieeteʼ lú guiráʼ binni. Ne zabeebe guiráʼ ni riníʼ binni para gusituí lú ca xpínnibe, purtiʼ Jiobá peʼ nga maʼ guníʼ ni.» (Isaías 25:8.)

Ziasa ca gueʼtuʼ ca. «Dxandíʼ zabani ca gueʼtuʼ stiluʼ, ziasa cani maʼ guti. Cani nisiaasiʼ ndaaniʼ yú zabánicaʼ ne zúnicaʼ ridxi tantu cayéchecaʼ. [...] Casi ora ñale ca gueʼtuʼ ca de ndaaniʼ yú sti biaje.» (Isaías 26:19; Versión Popular.)

Jnézapeʼ modo zabidxi Mesías cuenta binni. «Laabe qué zuni juzgarbe pur cani gúʼyasibe, qué zugaanidibe donda pur cani gunadiágasibe. Ne jneza zuni juzgarbe ca pobre ne guendaruni jneza zulídxibe binni [nadóʼ ni nuu ndaaniʼ] guidxilayú.» (Isaías 11:3, 4.)

Zianda cani qué ruuyaʼ ne cani qué runadiaga. «Cani nacheepaʼ lú zaxaleʼ lucaʼ, ne zunadiaga cani qué runadiaga.» (Isaías 35:5.)

Zaca dxiiñaʼ lu ca desiertu ca. «Desiertu ne ra gastiʼ nisa ziéchecaʼ, ne ra napampa casi desiertu ziuu nayecheʼ, ne zudii guieʼ casi azafrán. Dxandíʼ zabeeni guieʼ, ne ziécheni dede zúnini ridxi.» (Isaías 35:1, 2.)

Ziuu ti «guidxilayú cubi». «Chiguzayaʼ ti guibáʼ cubi [gobiernu cubi stiʼ Dios ni nuu guibáʼ] ne ti guidxilayú cubi [guiráʼ ca binni ni guni ni jneza]; ne guiráʼ ni guyuu dxiqué maʼ guirutiʼ tu zietenalaʼdxiʼ cani, ne maʼ qué zanabaʼ ladxidóʼ binni cani. Peru laguiecheʼ, ne cadi gusaanatu de guiéchetu pur cani chiguzayaʼ. [...] [Ca binni ni guibani lu guidxilayú cubi ni chiguni Dios ca] dxandipeʼ zucuícabe yoo, ne zaquiiñecabe ni, ne dxandipeʼ zudxiibacabe uva lu layú ne zócabe ni gudiini. Qué zucuícabe ne stobi iquiiñeʼ ni; qué zudxiibacabe ne stobi gó ni. Purtiʼ cásica ca dxi stiʼ ti yaga zaca ca [zaca ca] dxi stiʼ ca binni xquidxeʼ; ne dxiiñaʼ gúnicabe ne nácabe cani bibí stinneʼ zaquiiñecabe de guiráʼ xixé ni. Cadi pur gana si zuni xhaatacabe dxiiñaʼ, ne qué zápacabe xiiñicabe ni málasi gueeda gati ora nahuiiniruʼ, purtiʼ laacabe ne ca xiiñicabe nga ca binni ni maʼ guluu ndaayaʼ Jiobá. Ne zuneʼ ndiʼ, ante gucaacabe ridxi, zacabeʼ laacabe; laga caniʼrúcabe, zucaadiagaʼ laacabe.» «Purtiʼ cásica qué ziuu dxi guinitilú guibáʼ cubi ne guidxilayú cubi ni chiguneʼ la? —na Jiobá—, zacaca qué zanitilú ca xiiñitu ne laatu.» (Isaías 65:17-25; 66:22.)

Maca gucuá de ca cosa galán ni chigácaruʼ

Cadi libru si stiʼ Isaías nga caníʼ de ca cosa galán ni chigácaruʼ, sínuque guidubi Biblia nga cuzeeteʼ xi chiguni Dios ora guni mandar Jesús lu Reinu.a Ñuuláʼdxiluʼ nibániluʼ ndaaniʼ guidxilayú sicarú ca la? Biblia cusiene laanu xi naguixhe ique Dios guni ne xi caquiiñeʼ gúninu para ganda guidúʼyanu ora gaca cani. Pa racaláʼdxiluʼ gánnaluʼ ni la? ca testigu stiʼ Jiobá ziuuláʼdxicaʼ gacanecaʼ lii.

[Cani cá ñee yaza]

[Dibuju/foto ni zeeda lu yaza 8]

Ziuu guendariuudxi lade binni ne lade ca maniʼ ca

[Dibuju/foto ni zeeda lu yaza 9]

Ziasa ca gueʼtuʼ ca

[Dibuju/foto ni zeeda lu yaza 10]

Zaca guidubi Guidxilayú riʼ ti paraísu