Ximodo rusihuínninu qué rucheʼnu
«Ora guni juzgarluʼ naa Jiobá, cadi gusiaandaluʼ [...] qué huacheeniáʼ lii.» (SAL. 7:8.)
1, 2. Xi guiráʼ ridxaagalú ca xpinni Cristu ni zándaca gucaa laacaʼ gucheenecaʼ Dios.
CAADXI baʼduscuela cuyúbicaʼ tíndenecaʼ ti hombrehuiiniʼ Testigu. Xi zuni hombrehuiiniʼ riʼ yaʼ. Ñee zudxiilube laacaʼ la? o zúnibe stipa pur gucueezabe laabe ne guixélebe de laacaʼ. Ti hombre ni maʼ bichaganáʼ nuu stubi ndaaniʼ lidxi ne cuyubi xiixa lu Internet. Málasi bihuinni lu computadora stibe ti cuadru ra zanda gúʼyabe cosa dxabaʼ. Ñee zuxhélebe ni la? o zuseegube ni. Ti gunaa Testigu caniʼné ca xhamiga diidxaʼ, peru málasi tobi de laacaʼ bizulú caníʼ mal de sti gunaa ni laaca naca Testigu. Xi gúnibe yaʼ. Ñee laaca zaniʼbe cásica caníʼ ca xhamígabe la? o zuyúbibe modo guchaabe de diidxaʼ.
2 Guionnaʼ ejemplu riʼ rusihuinni cani ti cosa: lu cada tobi de laacani ti xpinni Cristu naquiiñeʼ guni stipa pur cadi gucheené Dios. Ñee rúninu stipa pur cadi guchéʼnenu Dios ora chuʼ xiixa cosa ni uguu xizaa laanu ne ora gápanu guendanagana lu xquendanabáninu la? Dxandíʼ, guiranu nga ruyúbinu chuʼnu nazaaca, guihuínninu galán, gápanu ti dxiiñaʼ, guyúbinu tu guidxaaganu ne guyúbinu modo chúʼnenu xheelanu galán. Peru ni jma naquiiñeʼ gúninu nga guyúbinu modo cadi guchéʼnenu Dios, purtiʼ nga nga ni ruuyaʼ Jiobá ora guʼyaʼ ximodo nuu ladxidoʼno (Sal. 139:23, 24).
3. 1) Xi rudii Jiobá lugar guni binni. 2) Xi chiguizíʼdinu lu tema riʼ.
3 De Jiobá zeeda «irá ni nachaʼhui ne irá ni dxandí sicarú», nga runi huadiibe laanu stale ndaayaʼ (Sant. 1:17). Laabe nga bidiibe laanu xcuérpunu, xquendabiaaninu, guendanazaaca, ne guiráʼ ni nánnanu (1 Cor. 4:7). Peru cadi pur nga nucaabe laanu ñúninu ni jneza, sínuque rusaanabe lu nanu gúʼyanu xi gúninu (Deu. 30:19). Yanna, chiguidúʼyanu ximodo rusihuínninu qué rucheʼnu ne laaca zadúʼyanu chonna razón nabé risaca ni zacané laanu gánnanu xiñee cadi naquiiñeʼ guchéʼnenu Dios.
Xi guiráʼ naquiiñeʼ guni binni para cadi guchee
4. Xi guiráʼ naquiiñeʼ guni binni para cadi guchee, ne xi rizíʼdinu de ley ni bidii Jiobá ca israelita que ora gudiicaʼ laabe xiixa maniʼ.
4 Nuu stale políticu riniʼcaʼ qué rúnicaʼ cosa malu purtiʼ si qué rusiguiicaʼ. Peru cadi naquiiñeʼ si gusaana binni de gusiguii para cadi guchee, sínuque caquiiñeruʼ gúnicaʼ xcaadxi cosa. Biblia na para cadi guchee binni naquiiñeʼ guni puru si ni jneza lu xquendanabani. Ca diidxaʼ hebreu ni riquiiñeʼ para guzeeteʼ de tuuxa ni qué huachee zeedacani de ti diidxaʼ ni riníʼ «sin donda», o «ni qué riaadxaʼ laa gastiʼ» o «[xiixa] ni nazaaca». Ne tobi de ca diidxaʼ ni bizéʼtenu ca riquiiñecabe ni para guiníʼcabe de ca maniʼ ni bidii ca israelita que Jiobá dxiqué. Ne para chuuláʼdxibe cani gudiicabe laabe naquiiñeʼ gácacame nazaaca (biindaʼ Levítico 22:19, 20). Ngue runi qué ñuulaʼdxiʼ diʼ Jiobá ni biʼniʼ ca israelita que, purtiʼ bidiicaʼ laabe maniʼ ni nachiitaʼ ñee, ni huará ne ni nacheepaʼ lú (Mal. 1:6-8).
5, 6. 1) Xi ejemplu rusihuinni riuuláʼdxinu ca cosa ni nazaaca ne ni izáʼ. 2) Xiñee cadi jneza guiníʼ íquenu para cadi guchéʼnenu Dios naquiiñeʼ ñálenu sin donda.
5 Guiráʼ binni riuulaʼdxiʼ siʼ o gapa xiixa ni izáʼ ne ni nazaaca. Guzéʼtenu chupa ejemplu. Guiníʼ íquenu chisinu xiixa cuananaxhi. Ante sinu cani naquiiñeʼ guidúʼyanu pa nazaaca cani. Peru xi zúninu pa málasi gúʼyanu nayuudxuʼ cueʼ guiráʼ cani yaʼ. Cadi dxandíʼ maʼ qué zazinu cani la? Yanna guiníʼ íquenu de ti gunaa ni canatopa bichuʼ o concha ruaa nisadóʼ. Cumu cayuuláʼdxibe guiráʼ clase bichuʼ nuu raqué la? ngue runi ruuyaʼ chaahuibe cani chuuláʼdxibe. Gunáʼ de laacani raʼbuʼ zinebe yaʼ. Cani izáʼ ne cani cadi nalaa. Zacagá nga runi Dios: ruyubi binni ni cayuni stipa pur cadi gucheené laa (2 Cró. 16:9).
6 Zándaca guininu para cadi guchéʼnenu Dios naquiiñeʼ ñálenu sin donda. Peru cumu binni ruchee laanu la? zándaca guiníʼ íquenu zeeda gácanu casi ti cuananaxhi ni nayuudxuʼ cueʼ o ti bichuʼ ni nalaa. Ñee huaníʼ íqueluʼ zacá la? Pa zacá ni, bietenalaʼdxiʼ Jiobá qué ribeza diʼ gácanu ti binni ni qué liica ruchee; laabe qué rinábabe laanu xiixa ni qué zanda gúninu (Sal. 103:14; Sant. 3:2). Ni racaláʼdxibe nga gúninu stipa pur cadi guchéʼnenu laabe. Peru, ñee gadxé nga gácanu binni sin donda ne gadxé nga gúninu stipa pur gácanu binni ni qué ruchee la? Quíxhenu ti ejemplu. Guiníʼ íquenu de ti hombre ni mayaca guichaganáʼ. Zusihuínnibe cadi nuu xpiaanibe pa cuézabe cadi liica guchee gunaa ni chiguichaganabe ca. Peru zanda cuézabe gannaxhii gunaa ca laasibe de guidubi ladxidóʼ. Zacagá nga ribeza Jiobá gúninu: laabe rinábabe guni adorarnu laasibe (Éxo. 20:5). Neca qué rinábabe gácanu ti binni ni qué gapa donda, peru ribézabe gannaxhiinu laabe de guidubi ladxidoʼno ne guni adorarnu laasibe.
7, 8. 1) Xiñee zanda guininu gudixhe Jesús ti ejemplu de modo cadi guchéʼnenu Dios. 2) Casi modo na Biblia, ximodo rusihuínninu qué ruchéʼnenu Dios.
7 Zándaca rietenaláʼdxinu ni bicabi Jesús ora gunabadiidxacabe laa gunáʼ nga mandamientu ni jma risaca (biindaʼ Marcos 12:28-30). Jesús qué niníʼ si xi mandamientu ca, sínuque biʼniʼ módopeʼ nani. Guirútiruʼ qué huayannaxhii Jiobá de guidubi ladxidóʼ, guidubi xhialma, xquendabiaaniʼ ne guiráʼ stipa stiʼ cásica biʼniʼ Jesús ni. Ne ejemplu stiʼ Jesús bisihuinni cadi naquiiñeʼ si guiníʼ binni qué ruchee, sínuque naquiiñeʼ gusihuinni ni lu guiráʼ cani guni ne naquiiñeʼ guni ni de guidubi ladxidóʼ. Nga runi, pa qué racaláʼdxinu guchéʼnenu Dios caquiiñeʼ chinándanu ejemplu stiʼ Cristu (1 Ped. 2:21).
8 Pur guiráʼ cani maʼ bidúʼyanu ca, Biblia na rusihuínninu qué ruchéʼnenu Dios ora runi adorarnu laabe de guidubi ladxidoʼno sin cuézanu gudiibe laanu xiixa. Ne laaca rusihuínninu ni ora qué liica gusaana de gúninu cani nabe ne guni crenu zúnibe guiráʼ cani naguixhe íquebe. Ca binni ni rucaa ique guni ni jneza nga cani runi stipa pur gusiecheʼ Jiobá lu guiráʼ ni gúnicaʼ, ne gusisácacaʼ guiráʼ ni rusisácabe. Yanna guidúʼyanu chonna razón nabé risaca ni zacané laanu para cadi guchéʼnenu Dios.
9. Ximodo rusihuínninu nuunu pur derechu ni napa Jiobá de guni mandar.
9 Cadi caquiiñeʼ diʼ Jiobá gúninu ni jneza para gapa derechu de guni mandar. Intiica guni o guiníʼ guiráʼ cani nabani, laasibe nga nápabe derechu de guni mandarbe lu guidubi naca guibáʼ ne Guidxilayú ne qué ziuu dxi gusaana de guni mandarbe. Neca napa Jiobá derechu ca, cásica guibáʼ zaqueca lu Guidxilayú, huayuu tu huaníʼ mal de laabe ne modo runi mandarbe. Nga runi, naquiiñeʼ ganna guiráʼ ca ángel ne ca binni guidxilayú Jiobá si nga napa derechu de guni mandar, ne laaca naquiiñeʼ gánnacabe runi mandarbe jneza ne pur modo rúnibe ni rusihuínnibe nadxiibe laanu. Ca testigu stiʼ Jiobá riuuláʼdxinu guinínenu binni de derechu ni napa Jiobá de guni mandar. Yanna, ximodo zanda gusihuínninu nápanu Jiobá casi Dios Ni Jma Nandxóʼ stinu yaʼ. Ra cadi guchéʼnenu laabe.
10. Xi guníʼ Binidxabaʼ qué zanda guni binni guidxilayú, ne ximodo ñanda nicábiluʼ ni guniʼbe ca.
10 Ximodo rusihuínninu napa Jiobá derechu de guni mandar ora qué ruchéʼnenu laa. Binidxabaʼ na nin ti binni guidxilayú qué ziuu diʼ pur derechu napa Jiobá de guni mandar, ne guirutiʼ zuni ni nabe purtiʼ nadxii laabe. Nezalú stale ángel ni nuu guibáʼ gúdxibe Dios: «Guidiladi pur guidiladi, ne guiráʼ ni napa binni zudii ni pur xhialma» (Job 2:4). Casi maʼ bidúʼyanu ca, cadi Job si nga guníʼ Binidxabaʼ zusaana de guni ni na Jiobá, sínuque ne guiráʼ ca binni nuu lu Guidxilayú. Nga runi Biblia na laabe nga riguube «xqueja ca hermanu stinu» (Apo. 12:10). Laabe runi búrlabe Jiobá ora guiniʼbe nin ti xpinni Cristu qué zuzuubaʼ stiidxaʼ Dios. Binidxabaʼ na cada tobi de laanu zudxiidéchenu Jiobá para gulanu xquendanabáninu. Ximodo runi sentirluʼ ne cani guníʼ Binidxabaʼ riʼ yaʼ. Ñee qué ñuuláʼdxiluʼ nusihuínniluʼ rusiguii Binidxabaʼ la? Zanda gúniluʼ ni ra cadi gucheeneluʼ Dios.
11, 12. 1) Xi ejemplu zacané laanu gánnanu xi caquiiñeʼ gúninu para cadi guchéʼnenu Jiobá. 2) Xi ndaayaʼ zápanu pa gúninu stipa pur cadi guchéʼnenu Jiobá.
11 Pur cani bizéʼtenu ca, caquiiñeʼ guiníʼ ique chaahuinu xi gúninu lu xquendanabáninu. Ñee rietenaláʼdxiluʼ guionnaʼ ejemplu ni bizéʼtenu ra bizulú tema riʼ la? Xi zuni ti xpinni Cristu ni cayuni stipa pur cadi gucheené Dios ora guidxaagalú cani yaʼ. Hombrehuiiniʼ que gucalaʼdxiʼ nudxiilú cani cucaalú laa que, peru guníʼ íquebe jma galán guixélebe ne cadi gucaalube laacaʼ, purtiʼ bietenaláʼdxibe conseju riʼ: «Hermanu ni nadxiee caʼ, cadi uquixe tu ni guni cabe laatu, sínuque lausaana ni lu ná Dios, purti cá ni lu Xquiʼchi be ra na be: Xcuenta nuu ni, ne naa uquixe ni laacabe» (Rom. 12:19). Hombre ni maʼ bichaganáʼ ni cuyubi xiixa lu Internet que ñanda ñuuyabe diidxaʼ guidxa lu computadora stibe, peru bietenaláʼdxibe ca diidxaʼ ni guníʼ Job: «Maʼ bineʼ ti pactu ne bizaluáʼ. Nga runi, qué zanda diʼ guizaalaʼdxeʼ ti binnidxaapaʼ para guneniáʼ laa cosa dxabaʼ» (Job 31:1). Ngue runi qué ninabe ñuuyabe diidxaʼ guidxa lu computadora stibe ne biseegube ni purtiʼ biiyabe ni casi xiixa ni napa venenu. Ne gunaa Testigu ni nuu lade ti grupu de binni ra bizulú caníʼcabe mal de tuuxa que, bietenaláʼdxibe conseju riʼ: Cada tobi de laanu «guni nu ni chuʼlaʼdxi stobi, ti acané nu laa uzuhuaa chaahuiʼ» (Rom. 15:2). Laabe nánnabe qué riuulaʼdxiʼ diʼ Jiobá guiníʼcabe mal de stobi, purtiʼ qué zacané diʼ ni laacabe ne zusaanacabe binni ca mal. Ngue runi, lugar de niniʼbe casi caníʼ ca xhamígabe que la? biyúbibe modo guchaabe de diidxaʼ.
12 Pur ni gudixhe ique cada tobi de ca xpinni Cristu riʼ, bisihuínnicaʼ nápacaʼ Jiobá casi ti Dios Ni Jma Nandxóʼ ne racaláʼdxicaʼ gusiéchecaʼ ladxidoʼbe. Lii yaʼ. Ñee laaca rúniluʼ zacaca ora quixhe íqueluʼ gúniluʼ xiixa la? Pa zacá ni, zusihuínniluʼ cayúniluʼ ni na ca diidxaʼ sicarú ni cayabi Jiobá laanu lu Proverbios 27:11 riʼ: «Guluu xpiaanuʼ xiiñehuiineʼ ne bisiecheʼ ladxiduáʼ, ti ganda guicabeʼ ni cucaalú ne cuxidxi naa». ¡Aque ti ndaayaʼ nga gusiéchenu ladxidóʼ Jiobá! Cadi dxandíʼ nga risaca gúninu stipa pur cadi guchéʼnenu Dios la?
13. Ximodo bisihuinni Job ne David riquiiñeʼ Jiobá ca cosa jneza ni rúninu para guni juzgar laanu.
13 Casi maʼ bidúʼyanu ca, ora quixhe íquenu cadi guchéʼnenu Jiobá cusihuínninu nápabe derechu de guni mandarbe. Laaca zuni juzgarbe laanu pur cani gúninu ne nga nga stobi de ca cosa ni naquiiñeʼ gucaa laanu cadi guchéʼnenu laabe. Zacá biene Job ni (biindaʼ Job 31:6). Laabe nánnabe casi ñaca niguubiáʼ Jiobá binni lu ti balanza ni izáʼ, o biáʼsipeʼ modo riquiiñeʼ Jiobá guendaruni jneza stiʼ para guʼyaʼ pa qué huacheené binni laa. Laaca zacagá nga guníʼ David: «Jiobá zaníʼ nuu xi zazaaca ca guidxi ca. Ora guni juzgarluʼ naa Jiobá, cadi gusiaandaluʼ huayuneʼ ni jneza ne qué huacheeniáʼ lii. [...] Dios ni runi ni jneza ruuyaʼ ximodo nuu ladxidóʼ binni ne riñón sticaʼ» (Sal. 7:8, 9). Nánnanu zanda guʼyaʼ Dios xi guiráʼ nuu ndaaniʼ ladxidoʼno ne ximodo nuu riñón stinu. Nga runi, qué chuʼ dxi guiaandaʼ laanu xi ruuyaʼ Jiobá: casi na David, ruuyabe ca cosa jneza ni rúninu ne zaquiiñebe cani ora guni juzgarbe laanu.
14. Xiñee cadi naquiiñeʼ guiníʼ íquenu pur gulenenu donda qué zanda diʼ gúninu ni na Jiobá.
14 Guxuíʼlunu cayuuyaʼ Jiobá ladxidóʼ guiráʼ ca binni nuu lu Guidxilayú riʼ (1 Cró. 28:9). Cadi dxandíʼ huaxiéʼ si binni ni cadi cusaana de guni ni jneza zadxélabe la? Cadi guiaandaʼ laanu, neca nácanu binni ruchee, zanda gácanu tobi de ca binni ni cadi cusaana de guni ni nabe. Cásica Job ne David, laaca nápanu razón para guni crenu ruuyaʼ Jiobá laanu casi ti binni ni runi ni jneza, neca nácanu binni ruchee. Cadi purtiʼ gale tuuxa sin donda guiníʼ íquenu qué liica zucheenebe Dios. Biaʼ dxi huabani binni lu Guidxilayú chonna si binni ni qué gapa donda nga huayuu, peru chupa de laacaʼ bicheenecaʼ Jiobá: Adán ne Eva. Peru huayuu millón de binni ni gulené donda qué huasaanacaʼ de gúnicaʼ ni na Jiobá. Lii laaca zanda gúniluʼ ni nabe.
15. Ximodo bisihuinni David caquiiñeʼ gúninu stipa pur cadi gucheʼnu para ganda guicaanu ni chigudii Dios laanu.
15 Cumu zuni juzgar Jiobá laanu pur cani gúninu la? naquiiñeʼ gúninu stipa pur cadi guchéʼnenu laa, purtiʼ zacatiʼ nga zudiibe laanu guiráʼ ni maʼ guniʼbe. Zacaca biene David ni (biindaʼ Salmo 41:12). Nánnabe zaguu ndaayaʼ Jiobá laabe lu guidubi naca xquendanabánibe. Cásica ca xpinni Cristu ni nabani yanna, David laaca gudixhe ique guibani sin qué chuʼ dxi gati para guni ni na Dios ne chuʼ jma gaxha de laabe. Gúnnabe pa qué gucheenebe Dios zugaandabe cani gudixhe íquebe que. Laaca zacaanu ca ndaayaʼ ca pa qué gusaana de gúninu ni na Jiobá ne laaca zacanebe ne zuluiʼbe laanu xi gúninu.
16, 17. 1) Xiñee maʼ gudixhe íqueluʼ cadi gucheeneluʼ Jiobá. 2) Xi guendarinabadiidxaʼ zacábinu lu sti tema ca.
16 Cani chigudii Dios laanu ca dede ca yanna racanécani laanu chuʼnu nayecheʼ. Casi ora guidxaagalunu guendanagana ne laaca rápacani xquendabiaaninu. Cadi guiaandaʼ laanu, Biblia ruchaaga cani runi crenu chiguni Dios ca ne ti cascu (1 Tes. 5:8). Cásica rapa cascu ique ti soldadu, zacaca nga rapa cani cabézanu guni Jiobá xquendabiaaninu para cadi guiníʼ íquenu qué ziuu dxi guiluxe ca guendanagana ni ridxaagalunu lu guidxilayú riʼ. Ora qué ganna binni de cani chiguni Jiobá qué ribani nayecheʼ. Nga runi, galán nga guʼyaʼ chaahuinu pa cadi cuchéʼnenu Dios ne pa runi crérunu guiráʼ ni chigúnibe. Cadi guiaandaʼ laanu, pa quixhe íquenu cadi guchéʼnenu Dios cayuʼnu pur derechu ni nápabe para guni mandarbe, ne laaca qué zudiʼnu lugar chuʼ tu cueechú laanu de cani runi crenu. ¡Galán gúninu stipa pur cadi guchéʼnenu Dios!
17 Cumu nabé risaca nga cadi guchéʼnenu Dios la? lu sti tema ca zazíʼdinu: Xi caquiiñeʼ gúninu para cadi guchéʼnenu Dios. Ximodo zusihuínninu cadi cuchéʼnenu Dios neca guidxaagalunu guendanagana. Xi zanda guni ca binni ni maʼ bicheené Dios.
Xi nicábiluʼ
• Ximodo rusihuínninu qué rucheʼnu.
• Ximodo rusihuínninu napa Jiobá derechu de guni mandar ora qué ruchéʼnenu laa.
• Xiñee caquiiñeʼ gúninu stipa pur cadi gucheʼnu ti ganda guicaanu ni chigudii Dios laanu.
[Textu ni zeeda lu yaza 4]
1. Chuʼnu pur derechu napa Jiobá de guni mandar ne cadi guchéʼnenu laa
[Dibuju/foto ni zeeda lu yaza 5]
Guiráʼ dxi ridxaagalunu guendanagana ni rucaa laanu gusihuínninu pa qué zuchéʼnenu Dios
[Textu ni zeeda lu yaza 6]
2. Jiobá ruuyaʼ ca cosa jneza ni rúninu ne zaquiiñebe cani ora guni juzgarbe laanu
[Textu ni zeeda lu yaza 6]
3. Para guicaanu guiráʼ cani chigudii Jiobá laanu caquiiñeʼ gúninu stipa pur cadi guchéʼnenu laabe