Gudiʼnu xquíxepeʼ ora guicaanu ne gudiʼnu de guidubi ladxidoʼno
BIXHÓZENU Jiobá nadxii laanu ne rizaalaʼdxiʼ cada tobi de ca xpinni casi na Biblia (1 Ped. 5:7). Tobi de ca modo rusihuínnibe rizaaláʼdxibe laanu nga ora racanebe laanu gúninu ni nabe sin gucheʼnu (Isa. 48:17). Laabe ribézabe iquiiñenu ni cudiibe laanu, jmaruʼ si ora cadxaagalunu xiixa guendanagana o cadídinu lu xiixa yuubaʼ. Guidúʼyanu ximodo bisihuinni Ley ni gucuaa Moisés que ni guninu ca.
Jiobá bisihuinni nadxii ca xpinni ra gudixhe Ley ni na naquiiñeʼ gacanécabe cani jma caquiiñeʼ chuʼ tu gacané laacaʼ, casi cani qué gapa bixhoze ne jñaa, ca viuda ne ca binni de sti guidxi ni yendeza ndaaniʼ guidxi Israel (Lev. 19:9, 10; Deu. 14:29). Ca dxi stinu riʼ, Jiobá laaca nanna nuu de ca xpinni caquiiñecaʼ gacané xcaadxi xpinni Cristu laacaʼ (Sant. 1:27). Nga runi, pa chuʼ tuuxa xpinni Cristu naʼ gacané laanu la? galán gudiʼnu lugar gúnibe ni, purtiʼ Jiobá nga cucaa laabe gacanebe laanu. Peru naquiiñeʼ gácanu nachaʼhuiʼ ora gacanécabe laanu.
Biblia na laaca zanda gudii guiráʼ cani nuu ndaaniʼ xquidxi Dios de guidubi ladxidoʼcaʼ. Ñee rietenaláʼdxiluʼ de relatu ni caníʼ de viuda pobre ni biʼyaʼ Jesús ndaaniʼ yuʼduʼ stiʼ Jerusalén que la? (Luc. 21:1-4.) Zándaca gucanécabe laabe pur Ley ni na naquiiñeʼ gacanécabe ca viuda. Neca pobre laabe, peru qué rietenaláʼdxinu laabe casi ti gunaa ni gucuaa si, sínuque casi ti gunaa ni guyuulaʼdxiʼ gudii. Nanna dxíchinu guyuube nayecheʼ pur ni bíʼnibe que, ne casi guníʼ Jesús: «Jma nayeche ni rudii que ni ricaa» (Hech. 20:35). Pur ni na ca diidxaʼ ca, ximodo zanda chuʼnu nayecheʼ ora gudiʼnu yaʼ (Luc. 6:38).
Ximodo zanda quíxenu Jiobá
Hombre ni bicaa Salmo riʼ gunabadiidxaʼ: «Ximodo quixeʼ Jiobá pur guiráʼ ni galán biʼniʼ pur naa yaʼ» (Sal. 116:12). Xi guiráʼ ndaayaʼ bidii Jiobá laabe yaʼ. Gucané Jiobá laabe dxi gúpabe guendanagana ne yuubaʼ. Dede bilá laabe para cadi ñátibe. Yanna laabe racaláʼdxibe quíxebe laa pur ni huayuni. Peru, ximodo zanda gúnibe ni yaʼ. Laca laabe guniʼbe: «Zuneʼ cani maʼ bidieeʼ stiidxaʼ Jiobá» (Sal. 116:3, 4, 8, 10-14). Hombre bicaa Salmo riʼ gudixhe ique guni guiráʼ ni maʼ bidii stiidxaʼ Jiobá ne cadi gusaana de guni cani canabaʼ Jiobá laa.
Laanu laaca zanda gúninu zacaca. Ximodo yaʼ. Ra cadi gusaana de gúninu ni na ca ley ne ca conseju stiʼ Dios. Nga runi, naquiiñeʼ guʼyaʼ chaahuinu pa jma rusisácanu guni adorarnu Jiobá lu xquendanabáninu ne pa cudiʼnu lugar gacané espíritu santu stibe laanu lu guiráʼ ni rúninu (Ecl. 12:13; Gál. 5:16-18). Nánnanu qué ziuu dxi quíxenu Jiobá guiráʼ ni maʼ huayuni pur laanu. Neca zacá, zanda gusiéchenu ladxidoʼbe pa gúninu stipa pur gúninu ni nabe de guidubi ladxidoʼno (Pro. 27:11). ¡Naroʼbaʼ ndaayaʼ nga ni nápanu ca!
Gacanenu chuʼ neza binni ridagulisaa galán
Zándaca guiranu nánnanu stale modo huayacané neza binni ridagulisaa laanu. Riquiiñeʼ Jiobá ni para gudii laanu guiráʼ ni caquiiñenu ti chúʼnenu laa galán, ne huaquiiñebe ni para gusiidibe laanu cani rusiidiʼ Biblia ne huayacanebe laanu guixélenu de religión ni qué rusiidiʼ ni dxandíʼ ne guixélenu de ca binni ni cayuni ni na Binidxabaʼ (Juan 8:32). Ne lu ca guendaridagulisaa ni rápanu guiráʼ semana ne ca guendaridagulisaa roʼ ni riguixhe «mozo ni nuu xpiaaniʼ ne ni runi jneza» gaca, rizíʼdinu jma de Dios ni zanda gacané laanu guibáninu sin qué chuʼ dxi gátinu ndaaniʼ ti paraísu ra maʼ qué ziuu yuubaʼ nin guendananá (Mat. 24:45-47). Dxandíʼ, stale ndaayaʼ nga maʼ bidii Dios laanu ndaaniʼ xquidxi ne stáleruʼ nga ni chiguicaanu. Yanna, xi zanda gúninu pur ca binni ni ridagulisaanenu.
Apóstol Pablu bicaa: «Laanu zeda aca nu casi cuerpu stibe, ne ma gudixhe chaahui be laanu casi nexhe chaahui irá ndaa lu ti cuerpu, ne biʼni be laanu tobi si, casi guiʼdi cada ndaa lu ti cuerpu, para cadi iree cueʼ nu. Pa jneza cayuni cada ndaa de ti cuerpu dxiiña la? jneza zaniisi binni que. Zaqueca laanu, pa cada tobi nu guni nu dxiiña ni gucuaa nu la? ze dxi jma rusi ziuzuhuáʼ chaahui nu ne ziyanaxhii saa nu» (Efe. 4:15, 16). Neca gucuá ca diidxaʼ riʼ para ca xpinni Cristu ni bibí pur espíritu santu, peru zanda gacané cani guiráʼ ca xpinni Cristu ni nuu yanna riʼ. Nga runi, guiráʼ ca xpinni Cristu ni nuu ndaaniʼ ti neza binni ridagulisaa zanda gacanecaʼ chuʼcaʼ galán ne guidálecaʼ. Ximodo yaʼ.
Zanda gúninu ni ora uguʼnu gana ne gacanenu ca xpinni Cristu gatadxí ladxidoʼcaʼ (Rom. 14:19). Sti cosa ni zanda gúninu para gacanenu guidale neza binni ridagulisaa nga gusihuínninu nápanu ca guenda stiʼ espíritu santu ra guidxaaganu xcaadxi xpinni Cristu (Gál. 5:22, 23). Laaca naquiiñeʼ chinándanu ni na conseju riʼ: «Ora tiica ganda acané nu binni la? guni nu ni, peru jma pe naquiiñe guni nu ni lade ca hermanu» (Gál. 6:10; Heb. 13:16). Casi guníʼ Pablu ca, cada tobi de laanu, cani nahuiiniʼ, cani maʼ huaniisi, ca hombre ne ca gunaa, zanda gacanenu ca binni ridagulisaa purtiʼ nadxiisaanu.
Laaca zanda iquiiñenu guiráʼ cani nánnanu, stipa stinu ne xpuéltunu para gucheechenu diidxaʼ. Jesús guníʼ: «Qué niguixe tu saca gudixhe irá ndi lu ná tu guni tu». Laanu yaʼ, xi caquiiñeʼ gúninu. Laca laabe guniʼbe: «Laguni cani sin guiaxa tu» (Mat. 10:8). Nga runi, cadi gusaana de gucheechenu stiidxaʼ Reinu ne gacanenu binni gaca xpinni Cristu (Mat. 24:14; 28:19, 20). Yanna, pa qué ganda gúninu biaʼ racaláʼdxinu yaʼ. Bietenalaʼdxiʼ de viuda pobre ni bizeeteʼ Jesús que. Neca huaxiéʼ bidiibe peru Jesús na bidiibe jma que xcaadxi que, purtiʼ ngue si nga nápabe (2 Cor. 8:1-5, 12).
Gácanu nachaʼhuiʼ ora gacanécabe laanu
Ziuu ora zaquiiñeluʼ gacané ca xpinni Cristu ni ridagulisaaneluʼ lii. Ora gaca nga, bidii lugar gacanécabe lii biaʼ ganda gúnicabe ni, purtiʼ nga zacané lii gudxiiluluʼ ca guendanagana ni nuu lu guidxilayú riʼ. Jiobá maʼ gudixhe chuʼ caadxi hombre para gapa ca xpinni casi rapa pastor dendxuʼ stiʼ, ne rúnicaʼ ni ne guendarannaxhii. Bietenalaʼdxiʼ zanda gacanécabe lii ora gapuʼ xiixa guendanagana (Hech. 20:28). Ni racalaʼdxiʼ ca binnigola ne ca xpinni Cristu ni ridagulisaaneluʼ nga quixhedxicaʼ ladxidoʼloʼ, gápacaʼ ne gacanecaʼ lii (Gál. 6:2; 1 Tes. 5:14).
Nga runi, ora chuʼ tuuxa gacané lii guca nachaʼhuiʼ ne laa. Cadi guiaandaʼ gudiiluʼ xquíxepeʼ ca xpinni Cristu ni gacané lii. Bietenalaʼdxiʼ, rusihuinni Dios nachaʼhuiʼ ne lii ora chuʼ tu gacané lii (1 Ped. 4:10). Xiñee nabé risaca gúninu zacá yaʼ. Purtiʼ qué racaláʼdxinu gácanu casi ca binni ni qué rudii xquíxepeʼ ora gacanécabe laacaʼ.
Gácanu binni riene
Sicaríʼ guníʼ Pablu de Timoteu lu carta ni bicaa ra nuu neza binni ridagulisaa ni guyuu Filipos: «Laasi be lade irá ni runi né naa dxiiña zanaxhii laatu casi nadxiee laatu, ne zacané laatu de idubi ladxidóʼ». Despué guníʼrube: «Purti ca xcaadxi la? jma ricá ique ca laca laacaʼ, ne qué rizaalaʼdxi ca xhiiña Cristu» (Fili. 2:20, 21). Guiníʼ íquenu ca diidxaʼ ni guníʼ Pablu ca ne guinabadiidxanu laca laanu: «Xi zanda guneʼ para cadi guicá iqueʼ puru si ni riuuladxeʼ yaʼ».
Qué chuʼ dxi guicanu tema gudii ca xpinni Cristu laanu tiempu sticaʼ ne gacanecaʼ laanu lu xiixa guendanagana gápanu. Xiñee cadi naquiiñeʼ gúninu zacá yaʼ. Guiníʼ íquenu ndiʼ: Cadi dxandíʼ nudiʼnu xquíxepeʼ tuuxa xpinni Cristu ni ñacané laanu órapeʼ cadídinu lu xiixa guendanagana la? Peru laaca nánnanu cadi naquiiñeʼ gucaʼnu laacabe gacanécabe laanu. Zacaca nga naquiiñeʼ gúninu ora chuʼ tu cuee tiempu stiʼ para gacané laanu: neca riuuláʼdxicabe gacanécabe laanu, naquiiñeʼ gúʼyanu pabiáʼ zanda gudiicabe laanu ne cadi guinábanu laacabe jma de ni caquiiñeʼ. Ni racaláʼdxinu nga gacanécabe laanu de guidubi ladxidóʼcabe ne cadi purtiʼ cucaʼnu laacabe gúnicabe ni.
Neca nuuca ca xpinni Cristu ca listu para gacanecaʼ lii ora caquiiñeluʼ xiixa la? nuu tiru qué zanda gúnicabe ni. Óraca naquiiñeʼ gánnaluʼ zacané Jiobá lii cásica gucanebe hombre bicaa Salmo que (Sal. 116:1, 2; Fili. 4:10-13).
Casi maʼ bidúʼyanu, galán nga gudiʼnu lugar gacané Jiobá laanu, jmaruʼ si ora guidxaagalunu guendanagana (Sal. 55:22). Ribézabe gudiʼnu xquíxepeʼ laabe ora gacanebe laanu. Ne laaca ribézabe chuʼnu nayecheʼ ora gacanenu binni. Nga runi, gudixhe ique guni adorarluʼ Jiobá de guidubi ladxidoʼloʼ biaʼ ganda gúniluʼ ni (2 Cor. 9:6, 7). Pa gúniluʼ zacá, ora guicaaluʼ zudiiluʼ xquíxepeʼ ne ora gudiiluʼ zúniluʼ ni de guidubi ladxidoʼloʼ.
[Cuadro ne dibuju/foto ni zeeda lu yaza 31]
«Ximodo quixeʼ Jiobá pur guiráʼ ni galán biʼniʼ pur naa yaʼ» (Sal. 116:12)
▪ Biyubi gacaneluʼ binni ora tiica si
▪ Cadi gusaana de guʼnuʼ stipa pur uguuluʼ gana ne gacaneluʼ xcaadxi
▪ Biquiiñeʼ tiempu stiluʼ biaʼ gándatiʼ para gacaneluʼ binni gaca xpinni Cristu