Ñee rusihuinni ca oración stiluʼ nuuluʼ galán ne Jiobá la?
«Lii, Ni rucaadiaga oración, ra nuuluʼ zie guiráʼ xixé binni.» (SAL. 65:2)
1, 2. Xiñee zanda guni cré ca xpinni Dios zucaadiágabe laacaʼ ora guni orarcaʼ.
DIOS ni bizáʼ laanu qué ruteeguʼ diʼ diaga ora guni orar ca xpinni laa. Nga runi, zanda guni crenu dxandíʼ rucaadiágabe laanu. Ne nécapeʼ ñuni orar stale millón de testigu stiʼ Jiobá laabe tobi si hora la? nanna dxíchinu zanda gucaadiágabe cada tobi de laacaʼ.
2 Cumu gunna David, tobi de ca hombre ni bicaa salmo que, zucaadiaga Jiobá laa la? biindabe sicaríʼ: «Lii, Ni rucaadiaga oración, ra nuuluʼ zie guiráʼ xixé binni» (Sal. 65:2). Cumu qué nusaana David de ñuni ni na Jiobá la? bicábibe ca oración stiʼ. Laanu zanda guiníʼ íquenu sicaríʼ: «Ñee rusihuinni ca oración stinneʼ runeʼ cré zacané Dios naa ne ni jma risaca para naa nga guneʼ ni nabe la? Ñee rusihuinni ca oración stinneʼ nuaaʼ galán ne Jiobá la?».
Gudiʼnu lugar uguu jneza Jiobá laanu
3, 4. 1) Ximodo naquiiñeʼ guni orarnu Dios. 2) Xi naquiiñeʼ gúninu pa bíninu ti cosa nabé malu ne cuchiiñaʼ xquendabiaaninu laanu.
3 Pa racaláʼdxinu gucaadiaga Jiobá ca oración stinu la? naquiiñeʼ gudiʼnu lugar uguu jnézabe laanu (Sal. 138:6). Naquiiñeʼ guinábanu Jiobá guʼyaʼ chaahuiʼ ni nuu ndaaniʼ ladxidoʼno, cásica biʼniʼ David ora guníʼ ca diidxaʼ riʼ: «Dios, biiyaʼ chaahuiʼ guidubi nacaʼ, ne biiyaʼ xi nuu ndaaniʼ ladxiduáʼ. Biiyaʼ chaahuiʼ naa, ne biiyaʼ chaahuiʼ xi guiráʼ riníʼ iqueʼ ni riguu xizaa naa, ne biiyaʼ pa canazayaʼ lu ti neza ra zacanaʼyaʼ, ne biluíʼ naa ximodo sayaʼ lu neza ni qué zaluxe» (Sal. 139:23, 24). Peru cadi naquiiñeʼ si guni orarnu Dios, sínuque laaca naquiiñeʼ gúninu ni nabe ne chinándanu ca conseju ni zeeda lu Stiidxabe. Cadi guiaandaʼ laanu zanda gacanebe laanu sanu «lu neza ni qué zaluxe», nga riníʼ zacanebe laanu guibáninu modo ganda guicaanu guendanabani ni qué zaluxe.
4 Xi zanda gúninu pa maʼ bíninu ti cosa nabé malu ne nuunu xizaa pur laani yaʼ (biindaʼ Salmo 32:1-5). Naquiiñeʼ gucaadiáganu xquendabiaaninu pa cayábini laanu cadi jneza ni bíninu, purtiʼ pa qué gúninu ni zuchiiñani laanu dede zusidxágani laanu, casi raca ti yaga ni ribidxi gudxa stiʼ tiempu nandáʼ. David nabé biuubaʼ ladxidóʼ pur cosa malu ni biʼniʼ, ne zándaca dede guca huarabe. Peru dxi gúdxibe Dios ni bíʼnibe que la? maʼ gutadxí ladxidoʼbe. ¡Guníʼ ique pabiáʼ nayecheʼ guyuube ora gúnnabe bitiidilaʼdxiʼ Dios stóndabe! Laanu laaca zatadxí ladxidoʼno pa gábinu Dios xiixa cosa malu ni bíninu. Ne laaca zanda gacané ca binnigola laanu chuʼnu galán ne Dios (Pro. 28:13; Sant. 5:13-16).
Guinábanu Dios gacané laanu ne gudiʼnu xquíxepeʼ laabe
5. Xi naquiiñeʼ gúninu ora nuunu xizaa pur xiixa.
5 Intiisi cosa ni uguu xizaa laanu naquiiñeʼ chinándanu conseju riʼ: «Cadi chuʼ tu xizaa de gastiʼ, sínuque lainíʼ né Dios. Lainaba laa irá ni caquiiñe tu, ne laudii [xquíxepeʼ] laa» (Fili. 4:6). Ora cadxaagalunu guendanagana o canazanándacabe laanu la? óraca nga jma naquiiñeʼ guinábanu Dios gacané laanu o guluíʼ laanu xi gúninu.
6, 7. Gunáʼ nga ca razón ni nápanu para gudiʼnu xquíxepeʼ Dios ora guni orarnu laa.
6 Yanna, xi zahuinni nuu ndaaniʼ ladxidoʼno pa guni orarnu ora si caquiiñenu xiixa yaʼ. Pablu guníʼ naquiiñeʼ gudiʼnu xquíxepeʼ Dios ora guni orarnu. Ne nápanu stale razón para gudiʼnu xquíxepeʼ Jiobá, cásica biʼniʼ David que, laabe guniʼbe: «Nabé nandxoʼloʼ Jiobá, nápaluʼ poder ne sicaruluʼ ne risácaluʼ; purtiʼ guiráʼ ni nuu guibáʼ ne ni nuu lu guidxilayú riʼ stiluʼ cani. Stiluʼ reinu ca, Jiobá, ne laaca lii nga xaíque stiʼ guiráʼ cosa. [...] Ne yanna, Dios stidu, cudiʼdu xquíxepeʼ lii ne rusisácadu laluʼ purtiʼ nabé sicarú ni» (1 Cró. 29:11-13).
7 Jesús bidii xquíxepeʼ Bixhoze ora maʼ chitó gueta. Casi dxi gudixhestibe Guendaroxhi stiʼ Señor que la? bidiibe xquíxepeʼ Dios pur pan ne vinu ni biquiiñebe que (Mat. 15:36; Mar. 14:22, 23). Laanu laaca naquiiñeʼ gudiʼnu xquíxepeʼ Dios pur cani chiguidoʼno, peru laaca naquiiñeʼ gudiʼnu «xquíxepeʼ Jiobá [...] pur guiráʼ ni sicarú bíʼnibe para ca xiiñiʼ binni guidxilayú», ne pur ley stibe ni caníʼ modo gaca juzgar binni ne pur cani cayábibe laanu lu Biblia (Sal. 107:15; 119:62, 105).
Guni orarnu pur xcaadxi xpinni Cristu
8, 9. Xiñee naquiiñeʼ guni orarnu pur ca xpinni Cristu.
8 Cadi naquiiñeʼ si guni orarnu pur laanu, sínuque laaca naquiiñeʼ guni orarnu pur ca xpinni Cristu, dede ne cani qué runibiáʼ chaahuinu. Zándaca qué ñunibiáʼ Pablu guiráʼ ca xpinni Cristu de Colosas, peru guniʼbe sicaríʼ: «Cada iní né du Dios Bixhoze Jesucristu Señor stinu rudíʼ du [xquíxepeʼ] laa pur laatu. Purti gunna du pabiáʼ runi cre tu Cristu, ne nadxii tu irá ca xpinni Dios» (Col. 1:3, 4). Pablu laaca biʼniʼ orar pur ca xpinni Cristu de Tesalónica (2 Tes. 1:11, 12). Ora guni orarnu zacá rihuinni xi nuu ndaaniʼ ladxidoʼno ne ximodo ridúʼyanu ca xpinni Cristu.
9 Ca oración ni rúninu pur ca xpinni Cristu, casi cani bibí o cani zeeda gaca «xcaadxi dendxu» ca rusihuínnicani pabiáʼ rusisácanu xquidxi Dios (Juan 10:16). Pablu gunabaʼ ca xpinni Cristu de Éfeso guni orarcaʼ pur laabe ti gacané Jiobá laabe gánnabe xi gábibe binni ora guiníʼnebe laacaʼ ne gusiénebe tutiica «de stiidxa Cristu ni iruti ñanna chiqué» (Efe. 6:17-20). Ñee maʼ biaaluʼ guni orarluʼ pur ca xpinni Cristu la?
10. Xi zabeendunu pa guni orarnu pur xcaadxi xpinni Cristu.
10 Ora guni orarnu pur xcaadxi binni zacaneni laanu guchaʼnu modo riníʼ íquenu de laacabe. Yanna, pa nuu ti xpinni Cristu ni huaxiéʼ riuuláʼdxinu modo laa yaʼ, ñee cadi dxandíʼ qué zanda guni orarnu pur laabe ne laaca gúninu xiixa ni guniná laabe la? (1 Juan 4:20, 21.) Nga runi, pa guni orarnu pur xcaadxi xpinni Cristu la? zacaneni laanu guchaʼnu modo riníʼ íquenu de laacabe ne zacaneni laanu chuʼnu tobi si. Ne laaca zusihuínninu nadxiinu binni casi nadxii Cristu laacabe (Juan 13:34, 35). Guendarannaxhii ca nga tobi de ca guenda ni rudii espíritu santu. Ñee rinábanu Jiobá gudii laanu espíritu santu stiʼ la? Ñee rinábanu Jiobá gacané laanu gannaxhiinu binni, chuʼnu nayecheʼ, chuʼdxí ladxidoʼno, cadi guixhacaláʼdxinu stobi, gácanu nachaʼhuiʼ, gápanu fe, gácanu nadóʼ, ne gucueezanu laanu la? (Luc. 11:13; Gál. 5:22, 23.) Pa rúninu zacá la? zusihuínninu zinándanu ni na espíritu santu stiʼ Dios lu cani rininu ne lu cani rúninu (biindaʼ Gálatas 5:16, 25).
11. Xiñee jneza nga guinábanu xcaadxi xpinni Cristu guni orarcaʼ pur laanu.
11 Laaca nabé risaca nga guni orar binni pur ca xiiñiʼ. Casi pa ganna tuuxa riuulaʼdxiʼ ca xiiñiʼ guicaa copia lu stiʼ stobi ora gúnicaʼ examen la? zanda guni orarbe pur laacaʼ ne iquiiñebe Biblia para gacanebe laacaʼ gúʼyacaʼ pabiáʼ risaca nga guni binni ni jneza ne cadi gúnicaʼ ni riuuláʼdxicaʼ. Sicaríʼ gudxi Pablu ca xpinni Cristu de Corinto: «Rinaba du lu Dios cadi uchee tu» (2 Cor. 13:7). Pa guni orarnu Jiobá pur xcaadxi binni la? zusiéchenu laabe ne zusihuinni nga ximodo laanu (biindaʼ Proverbios 15:8). Ne laaca zanda guinábanu xcaadxi xpinni Cristu guni orarcaʼ pur laanu, cásica biʼniʼ Pablu. Laabe bicaabe ca diidxaʼ riʼ: «Lainíʼ né Dios pur laadu, purti nanna du nayá ladxidóʼ do nezalú be, ne ni racalaʼdxi du nga irá ni guni du, guni du jneza» (Heb. 13:18).
Ca oración ni rúninu rusihuínnicani xi nuu ndaaniʼ ladxidoʼno
12. Xi naquiiñeʼ guzéʼtenu lu ca oración stinu.
12 Ñee rusihuinni ca oración stinu nuunu nayecheʼ ne rúninu xhiiñaʼ Dios ne stale gana la? Ñee jma ricá íquenu gucheechenu diidxaʼ ne gaca ni maʼ gudixhe ique Dios guni, ne guihuinni napa Dios derechu de guni mandar ne guisaca labe la? Ca nga nga cani naquiiñeʼ guzéʼtenu lu ca oración stinu. Oración ni gudixhe Jesús chinándanu que ruzulú sicaríʼ: «Bixhózedu ni nuu guibáʼ guisácapeʼ laluʼ. Biseendaʼ reinu stiluʼ. Gaca ni naluʼ cásica guibáʼ zaqueca lu guidxilayú» (Mat. 6:9, 10, NM).
13, 14. Xi rihuinni nuu ndaaniʼ ladxidoʼno ora runi orarnu.
13 Ca oración ni rúninu Dios rusihuínnicani xi nuu ndaaniʼ ladxidoʼno, xii nga ni racaláʼdxinu ne xii nga ni rucaa laanu guinábanu laabe xiixa. Jiobá nanna ximodo laanu. Proverbios 17:3 na sicaríʼ: «Plata raca fundir ndaaniʼ crisol ne oro ndaaniʼ horno, peru Jiobá nga ni ruuyaʼ ni nuu ndaaniʼ ladxidoʼno». Nga rusihuinni nanna dxichi Jiobá xi nuu ndaaniʼ ladxidoʼno (1 Sam. 16:7). Nánnabe xi riníʼ íquenu de ca xpinni Cristu, de ca guendaridagulisaa ca ne xi runi sentirnu ora gucheechenu diidxaʼ. Ne nánnabe xi riníʼ íquenu de ca biʼchiʼ Cristu ni bibí pur espíritu santu (Mat. 25:40). Laabe nánnabe pa dxandíʼ racaláʼdxinu guicaanu ni canábanu o canábasinu ni laabe purtiʼ si maʼ biaʼnu gúninu ni ne guininu ngueca ca ngueca diidxaʼ. Jesús guníʼ: «Ora ma caníʼ né tu [Dios] la? cadi utale tu diidxa casi runi ca binni ni qué runibiáʼ Dios, purti zácaxa ca tisi iníʼ ca stale diidxa zucaa diaga be laacaʼ» (Mat. 6:7).
14 Ni rininu ora maʼ cayuni orarnu laaca rusihuinni pa runi crenu zacané Dios laanu. David gudxi Jiobá sicaríʼ: «Lii zeeda gácaluʼ ti lugar ra guilaʼyaʼ, ti torre ni naguidxi nezalú xhenemiguáʼ. Dxandipeʼ zabezaʼ ndaaniʼ tienda stiluʼ guiráʼ dxi; zucaacheluáʼ xaʼnaʼ xhialuʼ para guilaʼyaʼ» (Sal. 61:3, 4). Biblia na ruchiaabe tienda stibe luguianu, nga riníʼ rápabe laanu ne rulabe laanu (Rev. 7:15, NM). Nabé ratadxí ladxidoʼno purtiʼ ora guinínenu Jiobá nánnanu zacanebe laanu ora gápanu guendanagana (biindaʼ Salmo 118:5-9).
15, 16. Ximodo racané oración stinu laanu gánnanu xipeʼ nga cucaa laanu ugaandanu xiixa dxiiñaʼ lade ca binni ridagulisaa.
15 Ora guni orarnu de guidubi ladxidoʼno zacaneni laanu guidúʼyanu xi cucaa laanu guinábanu Dios xiixa. Casi pa racaláʼdxinu gácanu binnigola ndaaniʼ xquidxi Dios, ñee racaláʼdxinu ni purtiʼ dxandíʼ rápanu gana gacanenu ca binni ridagulisaa ne gúninu jma lu xhiiñaʼ Reinu la? O purtiʼ racaláʼdxinu gusisácacabe laanu o dede gacaláʼdxinu gácanu xpixuaanaʼ xcaadxi ne guni mandarnu laacaʼ. Cadi zacá diʼ raca ca cosa ca ndaaniʼ xquidxi Jiobá (biindaʼ 3 Juan 9, 10 ne Lucas 22:24-27). Pa guni orarnu Dios de guidubi ladxidoʼno la? zacanebe laanu guidúʼyanu xi cucaa laanu gúninu xhiiñabe, ne pa cadi jneza ni, laaca zacanebe laanu cueenu ni de ladxidoʼno.
16 Zándaca stale gunaa xpinni Cristu racaláʼdxicaʼ gaca xheelacaʼ siervu ministerial ne despué gaca xheelacaʼ binnigola. Laacabe zanda gábicabe Jiobá ni racaláʼdxicabe ne laaca naquiiñeʼ sácabe jneza para gacanécabe xheelacabe ugaandacaʼ ni. Nabé risaca gúnicabe nga, purtiʼ ni guiníʼ ne ni guni binnilidxi ti hombre la? zucaani xcaadxi xpinni Cristu guiniʼcaʼ galán o mal de laabe.
Ora guni orarnu nezalú stale binni
17. Xiñee naquiiñeʼ guni orarnu stúbisinu.
17 Jesús nabé biyubi modo guni orar Dios stubi si ra cadi nuu binni (Mat. 14:13; Luc. 5:16; 6:12). Laanu laaca naquiiñeʼ gúninu zacá. Ora guni orarnu Dios sin guchiiñaʼ gastiʼ laanu jma nagueenda zaguixhe íquenu gúninu ni chuuláʼdxibe ne ni gacané laanu chuʼnu galán ne laabe. Jesús laaca biʼniʼ orar nezalú stale binni. Ximodo naquiiñeʼ guni orarnu ora gábicabe laanu gúninu ni pur xcaadxi binni yaʼ.
18. Xi naquiiñeʼ ganna ca hombre ni runi orar pur ca binni ridagulisaa.
18 Ra ridagulisaanu nuu hombre ni runi orar pur ca binni ridagulisaa (1 Tim. 2:8). Ora maʼ chiguiluxe oración ca guiráʼ ca binni ridagulisaa naquiiñeʼ guiniʼcaʼ «amén», diidxaʼ ca riniʼni «zacá gácani». Peru naquiiñeʼ gánnacabe xi guníʼ ni cayuni orar ca para guiníʼcabe «amén» ti gusihuínnicabe biaʼsi ruuyacabe cani bieeteʼ lu oración ca. Qué niníʼ diʼ Jesús xiixa ni nuchiichi binni o ni nuchiiñaʼ laacabe lu oración stiʼ padrenuestro que (Luc. 11:2-4). Laaca qué nuzeetebe xiixa guendanagana o xiixa ni caquiiñeʼ cada tobi de ca binni ni nuu ra nuube. Zanda guinábanu Dios xiixa ni caquiiñenu peru ora guni orarnu laabe stúbisinu ne cadi ra nuu stale binni. Ne naquiiñeʼ guidúʼyanu cadi guininu xiixa ni cadi naquiiñeʼ ganna xcaadxi ora guni orarnu nezalú stale binni.
19. Xi cadi naquiiñeʼ gúninu ora cayuni orar tuuxa pur laanu.
19 Ora maʼ cayuni orar tuuxa pur laanu la? naquiiñeʼ gusihuínninu ridxíbinu Dios, o gusihuínninu nápanu stale respetu laabe (1 Ped. 2:17). Nuu caadxi cosa ni maʼ biaʼnu gúninu ne jneza cani pa gúninu cani ora naquiiñeʼ ne ra naquiiñeʼ gácacani, peru cadi jneza gúninu cani ra ridagulisaanu (Ecl. 3:1). Casi pa tuuxa gacalaʼdxiʼ gucaa ti grupu de ca xpinni Cristu guinaazecaʼ nacaʼ o guinaazecaʼ xíʼquecaʼ ora cayaca oración la? zándaca guchiichini o guchiiñani xcaadxi, casi cani chiganna laanu. Zándaca nuu tuuxa xpinni Cristu gacalaʼdxiʼ guinaaze naʼ xheelaʼ sin guirutiʼ gudii cuenta, peru pa quiidxibe laa la? zándaca pur nga gucaabe tuuxa guchee. Ora gúnibe zacá, zusihuínnibe jma nuube xizaa pur chuʼbe galán ne xheelabe que chuʼbe galán ne Jiobá. Nga runi, gusihuínninu ridxíbinu Dios ne runi respetarnu laa, gúninu guiráʼ cosa para gusisácanu Dios ne cadi gúninu xiixa ni guchiichi, guchiiñaʼ o gucaa tuuxa guchee (1 Cor. 10:31, 32; 2 Cor. 6:3).
Xi naquiiñeʼ guinábanu
20. Ximodo nusiéneluʼ Romanos 8:26, 27.
20 Zándaca ziuu biaje qué zánnanu xi guinábanu Dios ora maʼ cayuni orarnu stúbinu. Sicaríʼ guníʼ Pablu: «Qué ganna di nu guni nu ni jneza, peru ora qué ganda idxela nu xi iní nu la? ricaalaʼdxi si nu, ne Espíritu [santu] que riníʼ pur laanu ra nuu Dios. Purti nanna Dios xi nuu ndaani ladxidóʼ irá binni, ne riene xi na Espíritu» (Rom. 8:26, 27). Jiobá biquiiñeʼ ca xpinni para gucaacaʼ stale oración lu Biblia. Cumu Dios nga guníʼ guicá ca oración ca lu Biblia la? nánnabe xii nga gucalaʼdxiʼ ca hombre ca niniʼcaʼ. Ne laabe runibiáʼ chaahuibe laanu. Nga runi rucaadiágabe ca oración ca casi ñaca de ndaaniʼ ladxidoʼno caree ca diidxaʼ ni guininu ca ne rudiibe ni guinábanu laabe. Jiobá ricabi ca oración ni gúninu laa ora guiníʼ espíritu santu stibe pur laanu. Ora jma gunibiaʼnu Stiidxaʼ Dios, jma qué zaca nagana para laanu gánnanu xi guinábanu laabe.
21. Xi chiguizíʼdinu lu sti tema ca.
21 Casi maʼ bidúʼyanu ca, ca oración ni rúninu rusihuínnicani xi nuu ndaaniʼ ladxidoʼno. Rusihuínnicani pa nuunu galán ne Dios ne pa runibiáʼ chaahuinu Stiidxaʼ Dios (Sant. 4:8). Lu sti tema ca zadúʼyanu caadxi oración ne caadxi diidxaʼ ni zusihuinni nápanu respetu Dios ne zeedacani lu Biblia ne zacanécani laanu guiníʼ íquenu ximodo runi orarnu Dios.
Xi nicábiluʼ
• Ximodo naquiiñeʼ guni orarnu Dios.
• Xiñee naquiiñeʼ guni orarnu pur ca xpinni Cristu.
• Ximodo racané oración stinu laanu gánnanu xi nuu ndaaniʼ ladxidoʼno ne xi rucaa laanu ugaandanu xiixa dxiiñaʼ lade ca binni ridagulisaa.
• Xi cadi naquiiñeʼ gúninu ora cayuni orar tuuxa pur laanu.
[Dibuju/foto ni zeeda lu yaza 4]
Ñee maʼ biaaluʼ gusisácaluʼ Jiobá ne gudiiluʼ xquíxepeʼ laabe la?
[Dibuju/foto ni zeeda lu yaza 6]
Ni gúninu ora cayuni orar tuuxa pur laanu naquiiñeʼ gusisácani Jiobá